Naamani a tshi fhodzwa vhulwadze vhu ofhisaho ha lukanda
1Ho vha hu na mulangammbi wa khosi ya Aramu we a vha a tshi pfi Naamani. Muṋe wawe o vha o mu vhea huhulwane, a tshi mu hulisa, nge Muṋe washu a ita uri Vhaaramu vha kunde ngae. O vha e muhali a sa humi, hone a vha na vhulwadze vhu ofhisaho ha lukanda.
2Zwino dziṅwe mmbi dza Vhaaramu dzo vha dzo ya u dia, dza thuba na muṅwe ṅwananyana wa Muisraele, a vha phuli ya musadzi wa Naamani. 3Ṅwananyana uyo a vhudza musadzi uyo a ri, “Ngavhe muṋe wanga vha tshi nga ya ha muporofita a re ngei Samaria! O vha a tshi ḓo vha fhodza vhulwadze havho.”
4Naamani a ya ha muṋe wawe a mu vhudza zwe zwa ambiwa nga ṅwananyana wa Muisraele. 5Khosi ya Aramu ya fhindula ya ri, “Iyani no rudza mbilu. Ndi ḓo ṅwalela khosi ya Israele luṅwalo.”
Naamani a takuwa e na khilogiramu dza 340 dza siliva na khilogiramu dza 70 dza musuku na zwiambaro zwa fumi zwa maṱeleṱele. 6Luṅwalo lwe a vha a tshi lu isa ha khosi ya Israele lwo vha lwo ṅwalwa upfi, “Ndi khou ruma mulanda wanga Naamani ha vhone na luṅwalo holu uri vha mu fhodze vhulwadze hawe ha lukanda.”
7Khosi ya Israele i tshi vhala ulwo luṅwalo, ya kherukanya zwiambaro zwayo ya ri, “Ndi nṋe Mudzimu naa? Ndi a kona u vhulaha nda dovha nda tshidza naa, a tshi ruma muthu ha nṋe uri ndi mu fhodze? Ni khou zwi vhona uri hoyu muthu u khou nṱunga!”
8Elisha muḓinḓa wa Mudzimu a tshi pfa uri khosi ya Israele yo kherukanya zwiambaro zwayo, a ruma muḓinḓa khayo a swikisa mafhungo a no ri, “Ndi mini vho kherukanya lupila lwavho? Nga vha rume uyo munna kha nṋe, ndi hone a tshi ḓo zwi ḓivha uri Israele hu na muporofita.”
9Naamani a ṱuwa nga bere dzawe na gariki yawe a swika a ima muṋangoni wa nnḓu ya Elisha. 10Elisha a ruma muḓinḓa a swika a mu vhudza a ri, “Nga vha ye mulamboni wa Jorodani vha ṱambe kaṱanu na kavhili, vhulwadze havho vhu ḓo fhola tshoṱhe.”
11Huno Naamani a ṱuwa o sinyuwa a ri, “Ndo vha ndi tshi ri vhukuma u ḓo bva a ḓa kha nṋe a ima a rabela Yahavee Mudzimu wawe, a dzungudza tshanḓa tshawe hune ha vhavha, a fhodza vhulwadze hanga! 12Hufha Damasko hu na milambo ya Abana na Pharaphara i re na maḓi ane a fhira a Israele! Ndo vha ndi tshi ḓo vha ndo ṱamba khayo nda fhola.” A mbo ḓi rembuluwa a ṱuwa o sinyuwa.
13Vhashumi vha Naamani vha ya khae vha ri, “Muṋe wanga, ngavhe muporofita a vha vhudze u ita tshiṅwe tshithu tshi konḓaho vho vha vha sa ḓo tshi ita? Zwino a tshi tou ri, ‘Nga vha yo ṱamba vha fhole,’ zwi a konḓa naa?” 14Ndi hone Naamani a tshi tsela Jorodani a ṱamba kaṱanu na kavhili, nga he muḓinḓa wa Mudzimu a mu vhudza, a mbo ḓi fhola tshoṱhe, lukanda lwawe lwa tou kuna unga lwa mutukana muṱuku.
15Ndi hone Naamani na vhalanda vhawe vhoṱhe vha tshi vhuelela ha muḓinḓa wa Mudzimu, a ima phanḓa hawe a ri, “Zwino ndi a zwi ḓivha uri shangoni ḽoṱhe a hu na muṅwe Mudzimu, u Israele fhedzi. Zwino nga vha ṱanganedze tshifhiwa tshanga ngetshi.”
16Muporofita a fhindula a ri, “Nga Muṋe washu a tshilaho ane nda vha muḓinḓa wawe, a thi nga ṱanganedzi tshithu.” Naamani a ḓi sivhelela uri muporofita a ṱanganedze itsho tshifhiwa, hone Elisha a landula.
17Naamani a ri, “Arali vha sa ṱanganedzi tshifhiwa tshanga, izwo nga vha litshe ndi dzhie mavu ane a nga hwalwa nga meila mbili ndi ṱuwe nao ndi tshi humela hayani, ngauri u bva zwino a thi tsha ḓo ṋekedza muṅwe mudzimu nduvho dzi fhiswaho kana zwiṱhavhelo, ndi ḓo zwi ṋekedza Yahavee fhedzi. 18Hone hu na tshithu tshithihi tshine Yahavee a fanela u nkhangwela tshone: musi khosi yanga i tshi dzhena thembeleni ya Rimoni mudzimu wa Aramu u luvha, ndi a mu fhelekedza, na nṋe nda gwadama henefho, musi ndi tshi gwadama thembeleni ya Rimoni, ngavhe Yahavee a tshi nkhangwela!”
19Elisha a ri, “Nga vha tshimbile nga mulalo.”
Musi Naamani o no tshimbila tshikhalanyana, 20Gehasi, mushumi wa Elisha muḓinḓa wa Mudzimu, a elekanya a ri, “Muṋe wanga o litsha uyu Muaramu Naamani, a ṱuwa a songo bvisa tshithu! O vha o fanela o ṱanganedza zwe a ḓa nazwo. Nga Muṋe washu a tshilaho, ndi ḓo gidima nda mu tevhela nda wana tshiṅwe tshithu khae.”
21Ndi hone Gehasi a tshi gidima a tevhela Naamani. Musi Naamani a tshi mu vhona a tshi gidima a tshi ya khae, a tsa kha gariki a yo ṱangana nae a mu vhudzisa a ri, “Ho tshinyalani?”
22Gehasi a fhindula a ri, “A hu na tsho tshinyalaho. Muṋe wanga o nthuma uri ndi vha vhudze ndi ri, ‘Hu kha ḓi bva u swika vhaṱhannga vhavhili vha tshigwada tsha vhaporofita vha tshi bva mivhunduni ya Efraimi. Nga vha vha ṋee khilogiramu dza 34 dza siliva na zwiambaro zwivhili zwa u pfundulula.’ ”
23Naamani a ri, “Dzhiani khilogiramu dza 68 dza siliva.” Naamani a ita lunzili uri Gehasi a a ṱanganedze, a konou longa iyo siliva kha mikhwama mivhili a peta na zwiḽa zwiambaro zwivhili, a zwi ṋea vhavhili vha vhashumi vhawe, vha zwi hwala vha fhira phanḓa ha Gehasi. 24Musi Gehasi a tshi swika tshikwarani, a dzhiela avho vhashumi izwo zwithu, a yo zwi vhea nḓuni yawe. Gehasi a fhelekedza avho vhanna vha ṱuwa. 25Gehasi a dzhena, a ima phanḓa ha muṋe wawe Elisha. Elisha a mu vhudzisa a ri, “Ni bvafhi Gehasi?”
Gehasi a fhindula a ri, “A hu na he nda ya.”
26Huno Elisha a mu vhudza a ri, “Muya wanga wo vha u si na inwi zwiḽa uḽa munna a tshi tsa kha gariki yawe a ḓa a ni ṱanganedza? Tshino ndi tshone tshifhinga tsha u dzhia tshelede kana tsha u ṱanganedza zwiambaro na masimu a miolivi na a minḓirivhe na masambi a nngu na masambi a kholomo na phuli dza vhanna na vha vhasadzi? 27Zwino vhulwadze ha Naamani vhu ḓo nambatela inwi na vhaḓuhulu vhaṋu lini na lini.” Gehasi a ṱuwa kha Elisha, a nambatelwa nga vhulwadze, lukanda lwawe lwó tshena sa gabugu.
