2 MAHOSI 3

₁Nga ṅwaha wa 18 wa muvhuso wa Josafati khosi ya Juda, Joramu ṅwana wa Ahaba a vha khosi ya Israele, a vhusa e Samaria a fhedza miṅwaha ya 12. ₂Joramu a ita zwi sa takadzi Muṋe washu, naho a songo ita vhuvhi vhu no swika kha ha khotsi awe na mme awe Jesebele. Ene o tupula tombo ḽa u hulisa Baali ḽe ḽa vha ḽo itwa nga khotsi awe. ₃Naho zwo ralo a ḓi nambatela vhuvhi he Jerobiamu ṅwana wa Nebati a ita uri Vhaisraele vha tshinye ngaho, a si vhuye a vhu laṱa.

₄Zwino Mesha khosi ya Muaba o vha e mufuwi muhulu wa nngu, ṅwaha muṅwe na muṅwe a tshi luvha khosi ya Israele nga ngwana dza 100 000 na vhukuse ha thutha dza 100 000. ₅Hone Ahaba khosi ya Israele o ri u dzama, Mesha khosi ya Muaba a shandukela khosi ya Israele. ₆Khosi Joramu a mbo ḓi takuwa Samaria, a ramba mmbi yawe yoṱhe ya Israele. ₇Joramu a ita na u ruma vhaḓinḓa ha Josafati khosi ya Juda a ri, “Khosi ya Muaba yo ntshandukela. Ri nga bva roṱhe pfumo ra yo lwa na Vhamuaba naa?”

Khosi Josafati a fhindula a ri, “Ndi ḓo bva navho pfumo, nṋe na vhone ri tshithu tshithihi, vhathu vhanga ndi vhathu vhavho, bere dzanga ndi dzavho.”

₈Joramu a vhudzisa a ri, “Ri tshi vha dia ri ḓo fara nḓila ifhio?”

Josafati a fhindula a ri, “Ri ḓo fara nḓila ya phanga ya Edomo.”

₉Khosi ya Israele na khosi ya Juda na khosi ya Edomo vha takuwa. Musi vho no tshimbila maḓuvha maṱanu na mavhili vha fhelelwa nga maḓi a vhathu na a zwifuwo zwine vha vha nazwo.

₁₀Khosi ya Israele ya tshenuwa ya ri, “Vhanna! Muṋe washu o tou kunga riṋe mahosi mararu a ri kuvhanganya uri a ri kumedze zwanḓani zwa Vhamuaba!”

₁₁Huno khosi Josafati a vhudzisa a ri, “A hu na muporofita fhano ane a nga ri pfela ha Muṋe washu?”

Ḽiṅwe gota ḽa Joramu khosi ya Israele ḽa fhindula ḽa ri, “Elisha ṅwana wa Shafati u fhano. O vha e mufunziwa wa Elia a tshi ḓi mu ṱulutshedza maḓi.”

₁₂Khosi Josafati a ri, “Ipfi ḽa Muṋe washu ḽi kha Elisha.” Ndi hone khosi ya Israele na Josafati na khosi ya Edomo vha tshi tsela ha Elisha.

₁₃Elisha a vhudza khosi ya Israele a ri, “Nṋe na vhone hu na mafhungo ane ra nga amba lini? Nga vha ye kha vhaporofita vha khotsi avho na mme avho.”

Joramu khosi ya Israele a fhindula a ri, “Aiwa nandi, ndi uri Muṋe washu o tou kunga riṋe mahosi mararu a ri kuvhanganya uri a ri kumedze zwanḓani zwa Vhamuaba.”

₁₄Elisha a fhindula a ri, “Nga Muṋe washu Mulangazwoṱhe a tshilaho, ane nda vha muḓinḓa wawe, ngavhe hu si vhe u hulisa Josafati khosi ya Juda a re fhano, ndo vha ndi sa nga vhuyi nda vha sedza, ndo vha ndi tshi ḓo tou tsinya iṱo nda nga thi vha vhoni. ₁₅Zwino nga vha nṱoḓele mulidzi wa haripa.”

Musi mulidzi wa haripa a tshi khou lidza, maanḓa a Muṋe washu a ḓa kha Elisha, ₁₆a ri, “Muṋe washu u ri, ‘Ibwani madindi hoṱhe hafha govhani.’ ₁₇Ndi uri Muṋe washu a tshi amba u ri a ni nga vhoni ḓumbu kana mvula, naho zwo ralo govha heḽino ḽi ḓo ḓala maḓi, inwi na nwa khathihi na kholomo dzaṋu na zwiṅwe zwifuwo zwaṋu. ₁₈Muṋe washu hezwo a zwi mu konḓeli, u ḓo dovha a kumedza na Vhamuaba zwanḓani zwaṋu. ₁₉Ni ḓo kunda muḓi muṅwe na muṅwe wo tangwaho nga mutsheṱo na ḓorobo dzoṱhe khulwane. Ni ḓo rema miri yoṱhe ya mitshelo ya wela fhasi, na thivha mabidzi oṱhe na tshinya masimu oṱhe avhuḓi nga u a ḓadza matombo.”

₂₀Nga matshelo, nga tshifhinga tsha u ṋekedza nduvho, zwa vha zwo itea, maḓi a vha a tshi khou ela a tshi bva siani ḽa Edomo! Shango ḽa ḓala maḓi.

₂₁Zwino vhoṱhe Vhamuaba vho vha vho no zwi pfa uri mahosi ayo mararu o ḓa u lwa navho, zwenezwo ha rambwa munna muṅwe na muṅwe, muhulwane na muṱuku, we a vha a tshi kona u fara pfumo, a vhewa masakhani. ₂₂Musi vha tshi vuwa nga matshelonitsheloni, ḓuvha ḽo vha ḽi tshi khou penya nṱha ha maḓi. Vhamuaba vha re seli vha vhona ayo maḓi o tswuka unga malofha. ₂₃Vhamuaba vha ri, “Ndi malofha! Mahosi haaḽa mararu a fanela u vha o lwa nga tshao a vhulahana. Zwino riṋe Vhamuaba nga ri ye u vha ṱangula!”

₂₄Huno musi Vhamuaba vha tshi swika mishashani ya Israele, Vhaisraele vha takuwa vha lwa navho vha vhuya vha shavha. Vhaisraele vha dia iḽo shango vha vhulaha Vhamuaba. ₂₅Vhaisraele vha phusukanya miḓi, munna muṅwe na muṅwe a posa tombo tsimuni iṅwe na iṅwe yavhuḓi ya vhuya ya tibedzwa. Vha thivha mabidzi oṱhe, vha rema miri yoṱhe ya mitshelo. Ho vha ho tou sala muḓi wa Kiri Herese fhedzi na matombo awo a tshee o dzula vhudzuloni hao, hone vhanna vho faraho magatho vha u tanga, na wone vha u dia.

₂₆Musi khosi ya Muaba i tshi vhona uri nndwa yo i vhifhela, ya dzhia vhanna vha 700 vho faraho mapanga ya linga uri i fhire vhukati ha mmbi ya maswina uri i shavhele ha khosi ya Aramu, hone vha kundwa. ₂₇Ndi hone i tshi dzhia tanzhe ḽayo ḽa mutuka, we a vha a tshi ḓo vha khosi vhudzuloni hawe, a mu ṋekedza nṱha ha mitsheṱo ya muḓi tsha vha tshiṱhavhelo tsha mudzimu wa Muaba. Vhaisraele vha sinyuwa zwihulu, vha huma, vha vhuelela shangoni ḽa havho.