2 MAHOSI 21

₁Manase a tshi vha khosi ya Juda o vha e na miṅwaha ya 12, a vhusa e Jerusalema a fhedza miṅwaha ya 55. Mme awe o vha a tshi pfi Hefetsiba. ₂Manase a ita zwi sa takadzi Muṋe washu, a edzisa maitele a nengisaho a tshakha dze Muṋe washu a dzi thatha afho shangoni musi Vhaisraele vha tshi swika. ₃Manase a vusa zwitembele zwa zwikwarani zwe khotsi awe a vha o zwi thutha, a ita na u fhaṱa aḽiṱari dza Baali, a imisa thanda ya Ashera mudzimu wa musadzi, a kanda vhuṱalani ha Ahaba khosi ya Israele. A gwadamela ṋaledzi dzoṱhe a dzi luvha. ₄A fhaṱa na aḽiṱari dza u luvha midzimu thembeleni ya Muṋe washu, fhethu he Muṋe washu a vha o ri, “Ndi ḓo vhea dzina ḽanga Jerusalema.” ₅Miṱani ya thembele ya Muṋe washu, vhuvhili hayo, a fhaṱa dziaḽiṱari a tshi fhaṱela ṋaledzi dzoṱhe.

₆A ita na u ṋekedza ṅwana wawe wa mutuka a mu ita nduvho i fhiswaho, a edzisa zwa manditi na u tungula ṱhangu, a yo vhudzisa vhaambeli na vha malombo na vhabvumbi. A tshinya zwihulu zwi sa takadzi Muṋe washu, a mu sinyusa. ₇A dzhia thanda ya Ashera mudzimu wa musadzi yo vhaḓwaho, ye ene muṋe a tou ḓivhaḓela, a i vhea thembeleni, he Muṋe washu a vha o vhudza Dafita na ṅwana wawe Solomoni a ri, “Thembeleni hei, fhano Jerusalema, fhethu he nda hu nanga kha shango ḽoṱhe ḽa matsinde a 12 a Vhaisraele, ndi hone hune dzina ḽanga ḽa ḓo vha hone lini na lini. ₈A thi tsha ḓo dovha nda ita uri ṋayo dza Vhaisraele dzi tendeleke kule na shango ḽe nda ḽi ṋea vhomakhulukuku wavho, arali vha ita zwoṱhe zwe nda vha laya, vha vhulunga Mulayo woṱhe we vha ṋewa nga Mushe muḓinḓa wanga.” ₉Hone vhathu vha si thetshelese. Manase a vha xedza, vha ita vhuvhi vhu no fhira ha tshakha dze Muṋe washu a dzi lozwa Vhaisraele vha tshi swika.

₁₀Muṋe washu a amba nga milomo ya vhaḓinḓa vhawe vhaporofita a ri, ₁₁“Manase khosi ya Juda o ita vhuvhi hovhu vhu nengisaho. O ita vhuvhi vhu no fhira ha Vhaamori vho mu rangaho phanḓa, a ita uri na vhathu vha Juda vha tshinye nga u luvha midzimu yawe i nengisaho. ₁₂Zwenezwo Yahavee Mudzimu wa Israele u ri, ‘Ndi ḓo ḓisela Jerusalema na Juda khombo khulu lune nḓevhe dza muṅwe na muṅwe ane a zwi pfa dza ḓo luma. ₁₃Ndi ḓo ita Jerusalema zwenezwo zwe nda ita Samaria, na zwe nda ita Ahaba khosi ya Israele na nnḓu yawe. Ndi ḓo swiela Jerusalema ha sala he swoto unga muthu a tshi phumula ndilo, a ri u i phumula, a i tiba. ₁₄Ndi ḓo ṱutshela tsalela dza vhathu vhanga, nda vha kumedza maswina avho. Vha ḓo kundwa, vha ṱangulwa nga maswina avho oṱhe, ₁₅nge vha ita zwi sa ntakadzi vha ntsinyusa u bva tshee vhomakhulukuku wavho vha pfuluwa Egipita u swika na ṋamusi.’ ”

₁₆Manase o ita na u shulula malofha manzhi a vhathu vha si na mulandu a ḓadza mikoto yoṱhe ya Jerusalema, hu sa vhalwi zwe a ita uri na vhathu vha Juda vha tshinye, vha ite zwi sa takadzi Muṋe washu.

₁₇Mafhungo maṅwe a Manase na zwoṱhe zwe a ita, hu tshi katelwa na vhuvhi he a ita, o ṅwalwa buguni ya Histori ya Mahosi a Juda. ₁₈Manase a dzama, a swiṱwa ngadeni ya pfamo yawe, ngade ya Uza. Ṅwana wawe Amoni a vha khosi vhudzuloni hawe.

₁₉Amoni a tshi vha khosi ya Juda o vha e na miṅwaha ya 22, a vhusa miṅwaha mivhili e Jerusalema. Mme awe o vha a tshi pfi Mishulimethe, ṅwananyana wa Harutsi wa muḓi wa Jotoba. ₂₀Amoni a ita zwi sa takadzi Muṋe washu, u ḓi nga khotsi awe Manase. ₂₁A kanda vhuṱalani hoṱhe ha khotsi awe, a luvha midzimu i nengisaho ye ya vha i tshi luvhiwa nga khotsi awe, a i gwadamela. ₂₂A landula Muṋe washu Mudzimu wa vhomakhulukuku wawe, a si tshimbile nḓilani yawe.

₂₃Magota a Amoni a mu langana, a mu vhulaha e pfamoni. ₂₄Vhaḓivhalea vha shango vha vhulaha vhoṱhe vhe vha langana khosi Amoni, vha dzhia ṅwana wawe Josiasi vha mu vhumba khosi vhudzuloni hawe.

₂₅Mafhungo maṅwe awe na zwe a ita, o ṅwalwa buguni ya Histori ya Mahosi a Juda. ₂₆Amoni o swiṱwa tshaloni tshawe ngadeni ya Uza. Ṅwana wawe Josiasi a vha khosi vhudzuloni hawe.