2 MAHOSI 15

₁Nga ṅwaha wa 27 wa muvhuso wa Jerobiamu khosi ya Israele, Uzia ṅwana wa Amasia a vha khosi ya Juda. ₂A tshi thoma u vhusa o vha e na miṅwaha ya 16, a vhusa e Jerusalema a fhedza miṅwaha ya 52. Mme awe o vha a tshi pfi Jekholia wa Jerusalema. ₃Uzia o ita zwi takadzaho Muṋe washu, u ḓi nga khotsi awe Amasia; ₄o ro sa thutha zwitembele zwa zwikwarani, vhathu vho ḓi ṋekedza zwiṱhavhelo vha dubisa zwioro henefho. ₅Muṋe washu a tambudza Uzia nga vhulwadze vhu ofhisaho ha lukanda, a lwala a tshi dzula e eṱhe a vhuya a dzama. Jothamu ṅwana wa khosi o vha e murangaphanḓa wa vhahulwane vha shango a tshi langa pfamo.

₆Mafhungo maṅwe a Uzia na zwoṱhe zwe a ita o ṅwalwa buguni ya Histori ya Mahosi a Juda. ₇Uzia a dzama, a zwiṱwa zwaloni zwa musanda Muḓini wa Dafita, ṅwana wawe Jothamu a vha khosi vhudzuloni hawe.

₈Nga ṅwaha wa 38 wa muvhuso wa Uzia khosi ya Juda, Zakaria ṅwana wa Jerobiamu a vha khosi ya Israele, a vhusa e Samaria a fhedza miṅwedzi miṱanu na muthihi. ₉Zakaria a ita zwi sa takadzi Muṋe washu, u ḓi nga vhokhotsi awe. Ho ngo laṱa vhuvhi ha Jerobiamu ṅwana wa Nebati we a ita uri Vhaisraele vha tshinye.

₁₀Shalumu ṅwana wa Jabeshe a itela khosi Zakaria tshimbevha, a mu dzhena nga pfumo, a mu vhulaha muḓini wa Ibiliamu, a vha khosi vhudzuloni hawe. ₁₁Mafhungo maṅwe a Zakaria o ṅwalwa buguni ya Histori ya Mahosi a Israele. ₁₂Ha mbo vha u khunyelela zwe Muṋe washu a vhudza Jehu zwiḽa a tshi ri, “Vhaḓuhulu vhau vha ḓo vha mahosi a Israele ha vhuya ha fhira murafho wa vhuṋa.”

₁₃Shalumu ṅwana wa Jabeshe o vha khosi ya Israele nga ṅwaha wa 39 wa muvhuso wa Uzia khosi ya Juda, a vhusa e Samaria a fhedza ṅwedzi muthihi fhedzi. ₁₄Menaheme ṅwana wa Gadi a takuwa Thiritsa a ya Samaria, a lwa na Shalumu ṅwana wa Jabeshe henefho Samaria, a mu vhulaha, a vha khosi vhudzuloni hawe. ₁₅Mafhungo maṅwe a Shalumu na tshimbevha tshe a tshi ita, o ṅwalwa buguni ya Histori ya Mahosi a Israele.

₁₆Menaheme a tshi bva Thiritsa, a dia muḓi wa Thaphua, a fhedza vhathu vhoṱhe vha re muḓini na vha shango ḽo u tangaho, nge vha hana u mu vulela khoro dzavho. A hushula thumbu dza vhasadzi vhoṱhe vho vhifhaho muvhilini.

₁₇Menaheme ṅwana wa Gadi o vha khosi ya Israele nga ṅwaha wa 39 wa muvhuso wa Uzia khosi ya Juda, a vhusa e Samaria a fhedza miṅwaha ya fumi. ₁₈Menaheme a ita zwi sa takadzi Muṋe washu. Misi yoṱhe a tshi vhusa ho ngo vhuya a laṱa vhuvhi ha Jerobiamu ṅwana wa Nebati we a ita uri Vhaisraele vha tshinye. ₁₉Zwino Thigilathi Philisere khosi ya Ashuru a dia shango, Menaheme a mu luvha nga siliva ya khilogiramu dza 34 000 uri a mu tikedze a khwaṱhise muvhuso wawe. ₂₀Menaheme o wana iyo tshelede kha vhapfumi vha Israele nga u kombetshedza muṅwe na muṅwe uri a bvise mangwende a 50 a siliva i luvhe khosi ya Ashuru. Ndi hone khosi ya Ashuru a tshi ṱuwa shangoni iḽo a vhuelela shangoni ḽawe.

₂₁Mafhungo maṅwe a Menaheme na zwoṱhe zwe a ita, o ṅwalwa buguni ya Histori ya Mahosi a Israele. ₂₂Menaheme a dzama, a swiṱwa, ṅwana wawe Phekahia a vha khosi vhudzuloni hawe.

₂₃Phekahia ṅwana wa Menaheme a vha khosi ya Israele nga ṅwaha wa 50 wa muvhuso wa Uzia khosi ya Juda, a vhusa e Samaria a fhedza miṅwaha mivhili. ₂₄Phekahia a ita zwi sa takadzi Muṋe washu. Ho ngo vhuya a laṱa vhuvhi ha Jerobiamu ṅwana wa Nebati we a ita uri Vhaisraele vha tshinye. ₂₅Pheka ṅwana wa Remalia, we a vha e muswikeli wa khosi, a mu itela tshimbevha, e na vhanna vha 50 vha Giliadi, vha vhulaha Phekahia khathihi na Arigobo na Arie, dzhavheloni ḽa ngomu ḽa pfamo henefho Samaria. Pheka o ri u vhulaha Phekahia a vha khosi vhudzuloni hawe.

₂₆Mafhungo maṅwe a Phekahia na zwoṱhe zwe a ita, o ṅwalwa buguni ya Histori ya Mahosi a Israele.

₂₇Pheka ṅwana wa Remalia a vha khosi ya Israele nga ṅwaha wa 52 wa muvhuso wa Uzia khosi ya Juda, a vhusa e Samaria, a fhedza miṅwaha ya 20. ₂₈Pheka a ita zwi sa takadzi Muṋe washu. Ho ngo vhuya a laṱa vhuvhi ha Jerobiamu ṅwana wa Nebati we a ita uri Vhaisraele vha tshinye.

₂₉Misi ya ene Pheka khosi ya Israele, Thigilathi Philisere khosi ya Ashuru a ḓa a thuba miḓi ya Iyoni na Abele Bethe Maakha na Janua na Kedeshe na Hatsoro na shango ḽa Giliadi na Galelia na Nafuthali, a dzhia vhathu vha ayo mashango a vha isa vhuthubwani Ashuru. ₃₀Ndi hone Hoshia ṅwana wa Ela a tshi itela Pheka ṅwana wa Remalia tshimbevha, a lwa nae, a mu vhulaha, a vha khosi vhudzuloni hawe nga ṅwaha wa 20 wa muvhuso wa Jothamu ṅwana wa Uzia. ₃₁Mafhungo maṅwe a Pheka na zwoṱhe zwe a ita, o ṅwalwa buguni ya Histori ya Mahosi a Israele.

₃₂Jothamu ṅwana wa Uzia o vha khosi ya Juda nga ṅwaha wa vhuvhili wa muvhuso wa Pheka ṅwana wa Remalia khosi ya Israele. ₃₃Jothamu a tshi thoma u vhusa o vha e na miṅwaha ya 25, a vhusa e Jerusalema a fhedza miṅwaha ya 16. Mme awe vho vha vha tshi pfi Jerusha ṅwananyana wa Tsadoko. ₃₄Jothamu o vha a tshi takadza Muṋe washu, u ḓi nga khotsi awe Uzia, ₃₅o ro sa thutha zwitembele zwa zwikwarani, vhathu vho ḓi ṋekedza zwiṱhavhelo vha fhisa zwioro henengei. Jothamu ndi ene we a vusa khoro ya devhula ya thembele ya Muṋe washu.

₃₆Mafhungo maṅwe a Jothamu na zwe a ita, o ṅwalwa buguni ya Histori ya Mahosi a Juda. ₃₇Misi yeneyo Muṋe washu a thoma u ruma Retsini khosi ya Aramu na Pheka ṅwana wa Remalia u ḓa u dia ḽa Juda. ₃₈Jothamu a dzama, a swiṱwa zwaloni zwa musanda Muḓini wa Dafita, ṅwana wawe Ahasi a vha khosi vhudzuloni hawe.