2 KORONIKA 36

₁Vhahulwane vha shango vha dzhia Juahasi ṅwana wa Josiasi, vha mu vhumba khosi muḓini wa Jerusalema vhudzuloni ha khotsi awe. ₂Juahasi a tshi vha khosi ya Juda o vha e na miṅwaha ya 23, a vhusa e Jerusalema a fhedza miṅwedzi miraru. ₃Khosi Nikho wa Egipita a mu bvisa vhuhosini muḓini wa Jerusalema, a thelisa vhathu vha Juda khilogiramu dza 3 400 dza siliva na khilogiramu dza 34 dza musuku. ₄Khosi Nikho wa Egipita a dzhia Eliakimu, murathu wa Juahasi, a mu ita khosi ya Juda na Jerusalema, a shandukisa dzina ḽawe a vho pfi Jehoyakimu. Nikho a hwala Juahasi mukomana wa Eliakimu, a mu isa Egipita.

₅Jehoyakimu a tshi vha khosi ya Juda o vha e na miṅwaha ya 25, a vhusa e Jerusalema a fhedza miṅwaha ya 11. Jehoyakimu o ita zwi sa takadzi Muṋe washu Mudzimu wawe. ₆Nebukhadnetsara khosi ya Babele a dia shango ḽa Juda, a fara Jehoyakimu a mu vhofha nga geḓane dza musinaseṱha, a mu isa Babele. ₇Nebukhadnetsara a ita na u dzhia zwiṅwe zwithu thembeleni ya Muṋe washu a zwi isa Babele a swika a zwi vhea thembeleni yawe henengei.

₈Mafhungo maṅwe a Jehoyakimu na zwithu zwi nengisaho zwe a ita, na zwe zwa itea misi yawe, o ṅwalwa buguni ya Histori ya Mahosi a Israele na a Juda. Ṅwana wawe Jehoyakhini a vha khosi vhudzuloni hawe.

₉Jehoyakhini a tshi vha khosi o vha e na miṅwaha ya 18, a vhusa e Jerusalema a fhedza miṅwedzi miraru na maḓuvha a fumi. Jehoyakhini o ita zwi sa takadzi Muṋe washu. ₁₀Ṅwaha u tshi fhela khosi Nebukhadnetsara a dzhia Jehoyakhini a mu isa Babele, a dzhia na zwithu zwa mutengo muhulu thembeleni ya Muṋe washu. Ndi hone Nebukhadnetsara a tshi dzhia Tsedekia khotsimunene wa Jehoyakhini, a mu vhumba khosi ya Juda na Jerusalema.

₁₁Tsedekia a tshi vha khosi ya Juda o vha e na miṅwaha ya 21, a vhusa Jerusalema a fhedza miṅwaha ya 11. ₁₂Khosi Tsedekia a ita zwi sa takadzi Muṋe washu Mudzimu wawe, a si ḓiṱukufhadze a tshi kaidzwa nga muporofita Jeremia, we a vha a tshi mu vhudza ndaela dza Muṋe washu.

₁₃Zwino Tsedekia a shandukela khosi Nebukhadnetsara, we a vha o mu anisa nga dzina ḽa Mudzimu. Tsedekia a ita tshipimbi, a konḓisa mbilu yawe, a si rembulutshele ha Muṋe washu Mudzimu wa Israele. ₁₄Tshiṅwe hafhu, vharangaphanḓa vhoṱhe na vhotshifhe na vhathu, u sa fulufhedzea havho ha tou kalula, vha tshi kanda vhuṱalani ha dzitshakha ha u ita zwi nengisaho, vha shata thembele ya Muṋe washu tshika, ye Muṋe washu Ene muṋe a i ita khethwa muḓini wa Jerusalema.

₁₅Muṋe washu Mudzimu wa vhokhotsi avho a isa maipfi khavho nga vhaḓinḓa vhawe a dovha, nge a vha a tshi pfela vhathu vhawe na vhudzulo hawe vhuṱungu. ₁₆Vhone vha ḓi kolela vhaḓinḓa vha Mudzimu, vha nyadza maipfi awe vha nzhonzhowedza vhaporofita vhawe, Muṋe washu a vhuya a sinyutshela vhathu vhawe, ha si tsha vha na u lamulelwa.

₁₇Muṋe washu a vha ḓisela khosi ya Babele ya lwa navho, ya vhulaha vhaṱhannga vhavho fhethu hukhethwa ya si khathutshele muṱhannga kana musidzana, mulala kana a si na nungo. Mudzimu a vha kumedza vhoṱhe zwanḓani zwa Nebukhadnetsara. ₁₈A hwala zwithu zwoṱhe zwa thembele ya Mudzimu, zwihulwane na zwiṱuku, a zwi isa Babele, a hwala na lupfumo lwa thembele ya Muṋe washu na lupfumo lwa khosi na lwa vharangaphanḓa. ₁₉Vha fhisa thembele ya Mudzimu, vha pwashekanya mutsheṱo wa Jerusalema, vha fhisa pfamo dzoṱhe, vha phusukanya tshiṅwe na tshiṅwe tsha mutengo muhulu henefho. ₂₀A dzhia tsalela dzo ponyokaho pfumo, a vha hwala a vha isa vhuthubwani Babele, vha vha phuli dzawe na dza vhana vhawe muvhuso wa vhuya wa dzhiwa nga Vhapheresia. ₂₁Ha vha hone hu tshi khunyelela zwe Muṋe washu a dzula o amba nga mulomo wa muporofita Jeremia a tshi ri, “Shango ḽi ḓo sala ḽi si na vhathu ha vhuya ha fhela miṅwaha ya 70, ha vhuya ha lixwa vhuawelo ha Sabatha he ha vha vhu si tsha tevhedzwa.”

₂₂Nga ṅwaha wa u thoma wa muvhuso wa khosi Khoreshe wa Pheresia, Muṋe washu a ita uri zwe a amba nga mulomo wa muporofita Jeremia zwi khunyelele. Muṋe washu a karusa mbilu ya khosi Khoreshe wa Pheresia uri a ḓivhadze muvhusoni wawe woṱhe, a tou zwi ṅwala a ri,

₂₃“Khosi Khoreshe wa Pheresia u ri, ‘Yahavee Mudzimu wa ḽiṱaḓulu o nṋea mivhuso yoṱhe ya ḽifhasi, a mmbea uri ndi mu fhaṱele thembele muḓini wa Jerusalema shangoni ḽa Juda. Zwino ufhio na ufhio wa vhathu vhawe vha no dzula na vhoinwi, mu litsheni a vhuelele hayani. Ngavhe Yahavee Mudzimu wawe a tshi vha nae.’ ”