2 KORONIKA 22

₁Vhathu vha Jerusalema vha dzhia Ahasia, phedzi ya Jehoramu, vha mu vhumba khosi vhudzuloni ha khotsi awe, ngauri iḽa gomane ye ya vha yo ḓa na Maarabia afho mishashani, yo vhulaha vhakomana vhawe vhoṱhe. Ndi hone Ahasia ṅwana wa Jehoramu khosi ya Juda a tshi thoma u vhusa.

₂Ahasia o vha khosi e na miṅwaha ya 22, a vhusa e Jerusalema a fhedza ṅwaha muthihi. Mme awe o vha a tshi pfi Athalia, muḓuhulu wa khosi Omuri. ₃Ahasia na ene a kanda vhuṱalani ha nnḓu ya Ahaba, nge mme awe vha mu ṱuṱuwedza u ita zwo vhifhaho. ₄Ahasia a ita zwi sa takadzi Muṋe washu, nga he zwa itwa nga nnḓu ya Ahaba, nge khotsi awe vha ri u dzama ha sala vhenevho vhe vhaeletshedzi vhawe, ha vha u mu lozwa. ₅A ita na u thetshelesa nyeletshedzo yavho musi a tshi ṱuwa na Joramu ṅwana wa Ahaba khosi ya Israele vha bva pfumo u yo lwa na Hazaele khosi ya Aramu muḓini wa Ramotho kha ḽa Giliadi. Vhaaramu vha huvhadza Joramu, ₆a vhuelela Jesriele uri a fhole mbonzhe dze a huvhadzwa muḓini wa Ramotho a tshi lwa na Hazaele khosi ya Aramu. Ahasia ṅwana wa Jehoramu khosi ya Juda a tsela Jesriele u vhona Joramu ṅwana wa Ahaba nge Joramu a vha o huvhala.

₇Ndi Mudzimu we a ita uri Ahasia a lovhe musi a tshi yo dalela Joramu. Musi Ahasia a tshi swika, a bva na Joramu u yo lwa na Jehu ṅwana wa Nimishi, we Muṋe washu a vha o mu ta uri a lozwe nnḓu ya Ahaba. ₈Musi Jehu a tshi khou fhedza nnḓu ya Ahaba nga he a laedzwa ngaho a wana hu na vharangaphanḓa vha Juda na vhana vha vhakomana vha Ahasia vhe vha vha vho fhelekedza Ahasia, a vha vhulaha. ₉Zwenezwo a mbo ḓi ṱuwa a yo ṱoḓa Ahasia, a mu fara o dzumbama Samaria, a iswa ha Jehu, a vhulawa. Vha mu swiṱa, nge vha ri, “O vha e muḓuhulu wa khosi Josafati we a vha a tshi shumela Muṋe washu nga mbilu yawe yoṱhe.” Zwenezwo kha nnḓu ya Ahasia ho vha hu si tshee na o thanyaho we a vha a tshi nga sala a tshi vhusa.

₁₀Musi Athalia mme a khosi Ahasia a tshi pfa uri ṅwana wawe o vhulawa, a mbo ḓi vhulahisa vhoṱhe vha nnḓu ya musanda wa Juda. ₁₁We a ponyoka ndi Juasi ṅwana wa Ahasia fhedzi. O vha a tshi ṱoḓou vhulawa na vhaṅwe, hone a lamukiswa nga makhadzi wawe Jehoshiba, ṅwananyana wa khosi Jehoramu, mufumakadzi wa tshifhe Jehoyada, a dovha a vha khaladzi ya Ahasia. Jehoshiba a mu dzhia na muleli wawe a vha dzhenisa kamarani ya u eḓela thembeleni, a mu dzumba uri Athalia a si mu vhone, ndi zwe a si vhulawe. ₁₂Jehoshiba a mu londola, a mu dzumba na muleli wawe thembeleni ya Muṋe washu ha vhuya ha fhela miṅwaha miṱanu na muthihi, musi Athalia a tshi khou vhusa shango.