2 KORONIKA 14

₁Khosi Abia a dzama a zwiṱwa zwaloni zwa musanda Muḓini wa Dafita. Ṅwana wawe Asa a vha khosi vhudzuloni hawe, misi yawe shango ḽa lala ha vhuya ha fhela miṅwaha ya fumi.

₂Asa a ita zwi takadzaho Muṋe washu Mudzimu wawe, a ita zwi re zwone. ₃A thutha aḽiṱari dzisili na zwitembele zwa zwikwarani, a pwasha matombo a zwitungulo. A remekanya tshifanyiso tsha thanda tsha Ashera mudzimu wa tshisadzi. ₄A laya vhathu vha Juda uri vha ite zwine Muṋe washu Mudzimu wa vhokhotsi avho a zwi funa, vha tevhedza milayo yawe na ndaela dzawe. ₅A thutha zwitembele zwa zwikwarani na aḽiṱari dza u fhisela zwioro miḓini yoṱhe ya Juda, muvhusoni wawe ha vha na mulalo. ₆A vusa miḓi yo tangedzwaho nga mitsheṱo kha ḽa Juda; ngauri ḽo vha ḽo lala. A ho ngo vha na we a lwa nae miṅwaha yeneyo, nge Muṋe washu a ladza shango ḽawe. ₇A vhudza vhathu vha Juda a ri, “Nga ri tsireledze miḓi hei nga u i tangedza nga mitsheṱo na dzithawara na dzigethe na khoṋo dza tsimbi. Shango ḽi kha ḓi vha ḽashu nge ra ita zwine Mudzimu Muṋe washu a zwi funa. Ro mu ṱoḓa, ndi zwe a ri ladzela shango masia oṱhe.” Ndi hone vha tshi fhaṱa, zwa vha nakela.

₈Khosi Asa o vha e na mmbi ya vhanna vha 300 000 vha Juda, vho shoma zwiṱangu zwihulu, vhe na mafumo, na vha Benyamini vha 280 000, vho shoma zwiṱangu zwiṱuku, vhe na vhura. Vhoṱhe havho vho vha vhe vhahali nndwani.

₉Zera wa Kushu a bva a yo lwa navho e na mmbi khulu na gariki dza 300, a vhuya a swika Maresha. ₁₀Asa a bva a yo lwa nae, vha imedzana govhani ḽa Tsefathi tsini ha Maresha.

₁₁Ndi hone Asa a tshi rabela Muṋe washu Mudzimu wawe a ri, “Muṋe washu, a hu na a no nga Iwe ane a nga farisa a shayaho nungo a tshi lwa na wa maanḓa. Yawee Muṋe washu, Mudzimu washu, ri farise, hufha ri tshi ḓitika nga Iwe, ro ḓa u lwa na mmbi hei khulu nga dzina ḽau. Yawee Muṋe washu, Iwe u Mudzimu washu, u songo tenda muthu a tshi u kunda.”

₁₂Muṋe washu a kunda Vhakushu vha tshi lwa na Asa na mmbi ya Juda. Vhakushu vha shavha, ₁₃Asa na mmbi yawe vha vha pandamedza u vhuya u swika Gerara. Ha vhulawa Vhakushu vhanzhi mmbi yavho ya si tsha vha na nungo, vha tou pwashekanywa vha tshi lwa na Muṋe washu na mmbi dzawe. Vhanna vha Juda vha thuba thundu nnzhi. ₁₄Vha phusukanya miḓi yoṱhe yo tangaho Gerara, nge Muṋe washu a vha o i dzhenisa nyofho. Vha ṱangula miḓi yoṱhe nge henefho ha vha hu na thundu nnzhi. ₁₅Vha ita na u dia mishasha ya vhalisa, vha thuba nngu nnzhi na mbudzi na dzigamela. Ndi hone vha tshi vhuelela Jerusalema.