1 SAMUELE 8

₁Musi Samuele o no kalaha, a vhea vhana vhawe uri vha vhe vharangaphanḓa vha Israele. ₂Tanzhe ḽawe o vha a tshi pfi Juele, wa vhuvhili a tshi pfi Abia, vhone vho vha vhe vharangaphanḓa muḓini wa Bierisheba. ₃Huno vhana vha Samuele a vho ngo kanda vhuṱalani hawe, vho ḓipfumisa nga u vhaisa vhaṅwe, vha ṱanganedza tshanḓanguvhoni, vha tshinya khaṱhulo.

₄Ndi hone vhahulwane vhoṱhe vha Israele vha tshi kuvhangana vha ya Rama ha Samuele. ₅Vha mu vhudza vha ri, “Nga vha vhone, vhone vho no kalaha, nahone vhana vhavho a vha kandi vhuṱalani havho. Zwino nga vha ri vhumbele khosi ine ya ḓo ri vhusa, u ḓi nga dziṅwe tshakha dzi nayo.”

₆Huno Samuele zwa si mu takadze musi vha tshi ri, “Nga vha ri vhumbele khosi ine ya ḓo ri vhusa.” Ndi hone Samuele a tshi rabela Muṋe washu. ₇Muṋe washu a ri, “Thetshelesa zwoṱhe zwine vhathu vha u vhudza. Vhathu avha a vho ngo landula iwe, vho landula Nṋe uri ndi si vhe khosi yavho. ₈Vha khou u ita zwenezwo zwe vha ita Nṋe, tshee nda vha pfulusa Egipita u swika zwino, vho ḓi ntshandukela vha luvha miṅwe midzimu. ₉Zwino vha ṋee tshine vha ṱoḓa. Vha ṱalutshedze mafhungo haya zwavhuḓi, u vha vhudze zwine khosi ine ya ḓo vha vhusa ya ḓo ita.”

₁₀Samuele o swikisa maipfi oṱhe a Muṋe washu kha vhathu vhe vha humbela khosi. ₁₁Samuele a ri, “Khosi ine ya ḓo ni vhusa i ḓo ita hezwi: U ḓo dzhia vhana vhaṋu vha vhatuka a vha ita vhadziammbi, vhaṅwe a vha isa kha gariki dzawe dza nndwa, vhaṅwe vha fara bere dzawe, vhaṅwe vha gidima phanḓa ha gariki dzawe dza nndwa. ₁₂Vhaṅwe u ḓo vha ita vhalangammbi, vhaṅwe vhalangagomane, vhaṅwe vha mu limela masimu, vha kaṋa zwiliṅwa zwawe, vhaṅwe vha mu fulela zwihali zwa nndwa vha ita na thundu ya gariki dzawe dza nndwa. ₁₃Vhananyana vhaṋu u ḓo vha dzhia vha mu itela zwiḓolo zwi nukhelelaho, vha vha vhabiki vhawe na vhabagi vhawe. ₁₄U ḓo dzhia masimu aṋu avhuḓi a no fhira oṱhe na masimu a minḓirivhe na masimu a miolivi, a ṋea magota awe. ₁₅U ḓo ni dzhiela tshafumi tsha zwiliṅwa zwaṋu zwa thoro na tsha nḓirivhe dzaṋu a ṋea magota awe na vhalanda vhawe vha pfamoni. ₁₆Phuli dzaṋu dza vhanna na dza vhasadzi na vhaṱhanngana vhaṋu na kholomo dzaṋu dzi fhiraho dzoṱhe, na donngi, u ḓo dzhia zwa shumela ene. ₁₇U ḓo dzhia tshafumi tsha masambi aṋu a nngu, na inwi vhaṋe na vha phuli dzawe. ₁₈Musi wonoyo ni ḓo ṱavha mukosi na lila uri ni rulwe muhwalo we na hweswa nga khosi yeneyo ye na i nanga, hone Muṋe washu a nga si ni thetshelese.”

₁₉Huno vhathu vha hana u thetshelesa Samuele vha ri, “Aiwa, ri ṱoḓa khosi ya u ri vhusa. ₂₀Ndi hone ri tshi ḓo nga dziṅwe tshakha, rí na khosi ine ya ri vhusa, a ri ranga phanḓa ri tshi bva pfumo, a ri lwela nndwani.”

₂₁Samuele a thetshelesa maipfi oṱhe e vhathu vha amba, a ya a a vhudza Muṋe washu. ₂₂Muṋe washu a fhindula a ri, “Vha itele zwine vha zwi funa, u vha vhumbele khosi.”

Ndi hone Samuele a tshi vhudza vhanna vha Israele a ri, “Zwino noṱhe ṱuwani ni ye hayani.”