1 SAMUELE 6

₁Mbulungelo ya Muṋe washu yo dzula shangoni ḽa Vhafilista ha vhuya ha fhela miṅwedzi miṱanu na mivhili, ₂Vhafilista vha vhidza vhotshifhe vhavho na mingome yavho vha ri, “Ri ḓo itani nga mbulungelo ya Yahavee? Ri vhudzeni uri ri ḓo i vhuedzedza hani fhethu hayo.”

₃Vhone vha fhindula vha ri, “Arali na humisa mbulungelo ya Mudzimu wa Israele, ni songo i vhuedzedza i si na tshithu, lingani nga nungo dzoṱhe u mu rumela tshipfumelo. Ndi hone ni tshi ḓo fhola, na ḓo kona u ḓivha uri ndi mini tshanḓa tshawe tshi songo litsha u ni tsikeledza.”

₄Vhafilista vha vhudzisa vha ri, “Ri ḓo mu rumela tshipfumelo-ḓe?” Vhone vha fhindula vha ri, “Zwifanyiso zwiṱanu zwa zwitshimbili zwo vhumbwaho nga musuku, na mbevha ṱhanu dza musuku, zwi tshi ya nga tshivhalo tsha vhavhusi vha Vhafilista, ngauri dwadze ḽeneḽo ḽo wela noṱhe inwi na vhavhusi vhaṋu. ₅Vhumbani zwifanyiso zwa zwitshimbili na zwa mbevha dze dza tshinyekanya shango ḽashu, ni hulise Mudzimu wa Israele. Khamusi u ḓo sudzulusa tshanḓa tshawe kha inwi na kha midzimu yaṋu na shango ḽaṋu. ₆Ni kha ḓi itelani tshipimbi unga Vhaegipita na Farao? Musi a tshi vha sumbedza maanḓa awe, a vho ngo vhofholola Vhaisraele uri vha pfuluwe naa?

₇“Zwino-ha, itani goloi ntswa, na kholomo mbili dza nzadze, dzi sa athu vhewa dzhogo. Kholomo idzo ni dzi pane kha iyo goloi, hone ṋamana dzadzo ni dzi swoge dzi dzhene dangani. ₈Ni dzhie mbulungelo ya Yahavee ni i longe ngomu goloini, bogisini ḽi re tsini hayo ni longe izwo zwithu zwa musuku zwine na zwi isa khae uri tshi vhe tshipfumelo. Goloi iyo nga i takuwe, ₉hone ni ḓi ita ni tshi i sedza. Arali ya gonya shangoni ḽayo, yo livha Bethe Shemeshe, ri ḓo ḓivha uri Yahavee ndi Ene o ri ḓiselaho khombo hei khulu. Hone arali ya sa livha hone ri ḓo ḓivha uri izwo a si tshanḓa tsha Yahavee tshe tsha ri rwa, zwo sokou itea-vho.”

₁₀Ndi hone Vhafilista vha tshi ita zwenezwo zwe vha eletshedzwa. Vha dzhia kholomo mbili dza tsadzi dzo raloho, vha dzi pana kha goloi, ṋamana dzadzo vha dzi khadela dangani. ₁₁Vha vhea mbulungelo ya Muṋe washu kha goloi, tsini hayo vha vhea bogisi ḽi re na mbevha dza musuku na zwitshimbili zwo vhumbwaho. ₁₂Ndi hone idzo kholomo dzi tshi gonya dzo livha Bethe Shemeshe, dzi sa bvi gondoni, dzi tshi khou tshimbila dzi tshi lila, dzi sa vhuyi dza pambutshela tshauḽa kana tshamonde. Vhavhusi vha Vhafilista vha dzi tevhela vha vhuya vha swika masakhani a Bethe Shemeshe.

₁₃Zwino vhathu vha Bethe Shemeshe vho vha vha tshi khou kaṋa goroi yavho govhani. Vha tshi takusa maṱo vha vhona mbulungelo, vha takala vha tshi zwi vhona. ₁₄Goloi ya swika tsimuni ya Joshua wa Bethe Shemeshe, ya ima henefho tsini ha tombo ḽihulu. Vhathu vha fhanza matanda a goloi, vha ṱhavha idzo kholomo, vha dzi ṋekedza Muṋe washu tsha vha tshiṱhavhelo tshi fhiswaho. ₁₅Vhalivi vha tsisa mbulungelo ya Muṋe washu, khathihi na bogisi ḽi re na zwithu zwa musuku, vha zwi vhea nṱha ha iḽo tombo ḽihulu. Musi wonoyo vhathu vha Bethe Shemeshe vha ṋekedza Muṋe washu nduvho dzo fhiswaho na zwiṱhavhelo. ₁₆Vhavhusi vhaṱanu vha Vhafilista vho vha vha tshi khou zwi vhona zwoṱhe hezwo, vha konou humela Ekroni wonoyo musi.

₁₇Vhafilista vha tshi ṋea Muṋe washu tshifhiwa tsha zwitshimbili zwiṱanu zwa musuku tsho vha tshipfumelo, vha Ashidodo na vha Gaza na vha Ashkeloni na vha Gathi na vha Ekroni, vhoṱhe vho bvisa tshithihi. ₁₈Vha ita na u isa mbevha dza musuku, muṅwe na muṅwe wa miḓi heyo ine ya vhuswa nga mahosi maṱanu a Vhafilista wa bvisa mbevha nthihi, vhoṱhe vha miḓi yo tangeledzwaho nga mitsheṱo na i songo tangeledzwaho. Tombo ḽihulu ḽe vha vhea mbulungelo ya Muṋe washu khaḽo ḽi kha ḓi vha ṱhanzi na ṋamusi henengei tsimuni ya Joshua wa Bethe Shemeshe.

₁₉Huno Mudzimu a vhulaha vhanna vha 70 vha Bethe Shemeshe nge vha ṱolela ngomu ha mbulungelo ya Muṋe washu. Vhathu vha lila nge Muṋe washu a vha rwa zwingafho.

₂₀Vhanna vha Bethe Shemeshe vha vhudzisa vha ri, “Ndi nnyi ane a nga ima phanḓa ha Muṋe washu, hoyu Mudzimu mukhethwa? Mbulungelo i songo dzula fhano, hone i tshi ṱuwa i ḓo ya ha nnyi?”

₂₁Vha ruma vhaḓinḓa ha vhathu vha Kiriathi Jiarimu vha swika vha ri, “Vhafilista vho vhuisa mbulungelo ya Muṋe washu. Iḓani ni i dzhie ni gonye nayo ha haṋu.”