1 SAMUELE 4

₁Ipfi ḽa Samuele ḽa pfiwa nga Vhaisraele vhoṱhe.

Muṅwe musi Vhaisraele vha bva pfumo vha yo lwa na Vhafilista. Vhaisraele vha ṱoka mishasha Ebenezere, Vhafilista vha ṱoka yavho Afeke. ₂Vhafilista vha bvisa mmbi yavho u yo ṱangana na Vhaisraele, govholano ḽa phaḓalala, Vhaisraele vha kundwa nga Vhafilista, ha vhulawa Vhaisraele vhane vha nga swika 4 000 henefho nndwani. ₃Musi vhanna vha tshi humela mishashani, vhahulwane vha Israele vha vhudzisa vha ri, “Ndi mini Muṋe washu o ita uri ri kundwe nga Vhafilista ṋamusi? Nga ri yo hwala mbulungelo ya mulanga ya Muṋe washu i re Shilo ri i ḓise fhano i tshimbile na riṋe, i ri lamulele kha maswina ashu.”

₄Ndi hone vhathu vha tshi ruma vhanna Shilo, vha vhuya na mbulungelo ya mulanga ya Muṋe washu Mulangazwoṱhe, we a dzula kha khuluṋoni vhukati ha vhakherube vhavhili. Vhana vha Eli vhavhili, Hofuni na Finiasi, vho vha vhe henefho vhe na mbulungelo ya mulanga ya Mudzimu. ₅Musi mbulungelo ya mulanga ya Muṋe washu i tshi dzhena mishashani, Vhaisraele vhoṱhe vha ṱavha mukosi mavu a tou dzinginyea.

₆Vhafilista vha tshi pfa uyo mukosi vha vhudzisa vha ri, “Mukosi uyo u re mishashani ya Vhaheberu ndi wa mini?”

Musi vha tshi pfa uri mbulungelo ya Muṋe washu yo dzhena mishashani, ₇vha farwa nga nyofho vha ri, “Mudzimu wo dzhena mishashani. Zwo ri vhifhela! Zwa u rali a zwi athu vhuya zwa itea. ₈Ro welwa nga khombo! Ndi nnyi ane a ḓo ri lamulela zwanḓani zwa midzimu iyo ya maanḓa? Ndi vhaḽa vhadzimu vhe vha vhulaha Vhaegipita nga madwadze a sa konadzei ngei phangani. ₉Vhafilista, imani ni khwaṱhe! Ivhani vhanna ni sa ḓo vha phuli dza Vhaheberu unga vhone vho vha vhe phuli dzaṋu. Ivhani vhanna ni lwe!”

₁₀Ndi hone Vhafilista vha tshi lwa, Vhaisraele vha kundwa, muṅwe na muṅwe a shavhela hayani. Ha vhulawa vhanzhi, ha vhulawa vhanna vha Israele vha 30 000 vha no lwa vhá songo namela bere. ₁₁Ha thubiwa na mbulungelo ya Mudzimu; vhana vha Eli vhavhili, Hofuni na Finiasi, na vhone vha vhulawa.

₁₂Musi wonoyo ha ḓa munna a no bva kha tsinde ḽa Benyamini, a gidima a tshi bva nndwani a ya Shilo; zwiambaro zwawe zwo vha zwo kherukana, ó ḓishela mavu ṱhohoni. ₁₃Musi a tshi swika a wana Eli o dzula kha tshidzulo tshawe tsini ha gondo ó lindela, ngauri o vha o dinalea nga mbulungelo ya Mudzimu. Uyo munna a tshi dzhena afho muḓini, a ḓivhadza zwe zwa itea, muḓi woṱhe wa vusa tshililo.

₁₄Eli a tshi pfa tshililo a vhudzisa a ri, “Tshililo itshi ndi tsha mini?”

Uḽa munna a gidimela ha Eli u mu vhudza zwo iteaho. ₁₅Eli o vha o no vha na miṅwaha ya 98 nahone o pofula tshoṱhe. ₁₆Uḽa munna a vhudza Eli a ri, “Ndi kha ḓi bva u swika, ndi bva tshivhindini tsha nndwa, ndo shavha hone ṋamusi ḽino.”

Eli a mu vhudzisa a ri, “Ho iteani ṅwananga?”

₁₇Uḽa muḓinḓa a fhindula a ri, “Vhaisraele vho pandamedzwa nga Vhafilista, ho tshinyala vhanzhi, na vhana vhavho vhavhili Hofuni na Finiasi vho vhulawa, na mbulungelo ya Mudzimu yo thubiwa.”

₁₈Uyo munna a ri u bula mbulungelo ya Mudzimu, Eli a mbo wa nga tshitiko e tshidzuloni tshawe tsini ha khoro. A vunḓea mutsinga a fa, ngauri o vha o kalaha nahone e na muvhili. O vha e murangaphanḓa wa Israele miṅwaha ya 40.

₁₉Musadzi wa Finiasi ṅwana wa Eli o vha a songo takala muvhili, e tsini na u vhofholowa. Musi a tshi pfa mafhungo a u ri mbulungelo ya Mudzimu yo thubiwa na uri khotsi a munna wawe na munna wawe vho fa, a farwa nga maṱungu a vhudzadze a mbo ḓi vhofholowa, a ṋoka. ₂₀Musi a tshi khou fa, vhasadzi vhe vha vha vha tshi khou mu bebisa vha ri, “Ni songo ṱovhowa, no beba mutuka.” Hone ene ho ngo vhuya a fhindula kana a zwi londa. ₂₁21 Mutukana uyo a ri u pfi Ikhabodo (Vhugala-vhu-ngafhi?), a ri, “Vhugala ha Mudzimu ho pfuluwa Israele,” ngauri ho thubiwa mbulungelo ya Mudzimu, ha fa khotsi a munna wawe na munna wawe. ₂₂Ndi zwe a ri, “Vhugala ha Mudzimu ho pfuluwa Israele, ngauri mbulungelo ya Mudzimu yo thubiwa.”