1 SAMUELE 31

₁Vhafilista vha lwa na Vhaisraele, ha shavha Vhaisraele, ha vhulawa vhanzhi henefho thavhani dza Gilibua. ₂Vhafilista vha pandamedza Saulo na vhana vhawe, vha vhulaha vhana vhawe Jonathani na Abinadaba na Malakhishua, ₃nndwa ya hulela he Saulo a vha e hone, a pfulwa nga musevhe wa maswina a huvhala nga maanḓa.

₄Saulo a amba na o mu hwalelaho zwihali a ri, “Ṱomola banga ḽau u mmbulahe, mashuvhuru aya a sa ḓo ḓa a mmbulaha nga nḓila i shonisaho.”

Hone muhwali wa zwihali zwawe a hana nga mulandu wa nyofho. Ndi hone Saulo a tshi dzhia banga ḽawe a wela nṱha haḽo. ₅Muhwali wa zwihali a tshi vhona uri Saulo o fa, na ene a wela nṱha ha banga ḽawe a fa nae. ₆Ngauralo ho fa Saulo na vhana vhawe vhararu na muhwali wa zwihali zwawe na vhanna vhoṱhe vhe a vha e navho musi wonoyo muthihi. ₇Musi Vhaisraele vhe vha vha vhe seli ha govha ḽa Jesriele na seli ha Jorodani vha tshi vhona uri mmbi ya Vhaisraele yo shavha na uri Saulo na vhana vhawe vho fa, vha ṱutshela miḓi yavho vha shavha. Vhafilista vha ḓa vha dzula khayo.

₈Nga matshelo Vhafilista vha tshi ḓa u ṱangula zwitumbu, vha wana Saulo na vhana vhawe vhararu vho rambalala thavhani dza Gilibua. ₉Vha tumula ṱhoho ya Saulo, vha mu bvula tshiambaro tsha nndwa, vha ruma vhaḓinḓa shangoni ḽoṱhe ḽa Vhafilista uri vha ḓivhadze ayo mafhungo thembeleni ya midzimu yavho ya zwifanyiso na kha vhathu vha havho. ₁₀Vha dzhia tshiambaro tsha Saulo tsha nndwa vha tshi vhea thembeleni ya Ashtharotho mudzimu wa musadzi, tshitumbu tshawe vha tshi ombela kha mutsheṱo wa muḓi wa Bethe Shiani.

₁₁Musi vhathu vha Jabeshe kha ḽa Giliadi vha tshi pfa zwe Vhafilista vha ita Saulo, ₁₂vhanna vha havho vhoṱhe vha re na vhuhali vha lala vha tshi tshimbila vhusiku vha tshi ya Bethe Shiani. Vha tsitsa tshitumbu tsha Saulo na zwa vhana vhawe afho luvhondoni lwa Bethe Shiani, vha humela Jabeshe, vha zwi fhisela hone. ₁₃Vha konou dzhia marambo avho vha a swiṱa fhasi ha muri wa muṱamarisiki henefho Jabeshe, vha ḓidzima zwiḽiwa vha fhedza maḓuvha maṱanu na mavhili.