1 SAMUELE 27

₁Dafita a elekanya a ri, “Muṅwe musi Saulo u ḓo vhuya a mmbulaha. Tsha khwiṋe tshine nda nga ita ndi u shavhela shangoni ḽa Vhafilista. Ndi hone Saulo a tshi ḓo litsha u nṱoḓa kha ḽoṱhe ḽa Israele, nda ḓo konou mu ponyoka.”

₂Ndi hone Dafita na vhanna vha 600 vhe vha vha vhe nae vha tshi ṱuwa vha livha ha Akhishi ṅwana wa Maokho khosi ya Gathi. ₃Dafita na vhanna vhe a vha e navho vha dzula Gathi na Akhishi. Munna muṅwe na muṅwe o vha e na muṱa wawe, na Dafita e na vhasadzi vhawe vhavhili, Ahinuamu a no bva Jesriele na Abigaili a no bva Kharamele, tshilikadzi ya Nabali. ₄Saulo a tshi pfa uri Dafita o shavhela Gathi, a litsha u mu ṱoḓa.

₅Dafita a amba na Akhishi a ri, “Arali vha tshi ntakalela, nga vha mphe muṅwe wa miḓi ya kule ndi dzule hone. Nṋe ndi nga dzula hani navho fhano musanda?”

₆Musi wonoyo Akhishi a ṋea Dafita muḓi wa Tsikilaga, u bva zwenezwo wa mbo ḓi vha wa mahosi a Juda. ₇Dafita a dzula shangoni ḽa Vhafilista a fhedza ṅwaha na miṅwedzi miṋa.

₈Zwino Dafita na vhanna vhawe vha gonya vha yo ṱangula Vhageshuru na Vhagirisi na Vhaamaleke. U bva tsha kale tshakha idzo dzo vha dzi tshi dzula henefho shangoni ḽeneḽo vhukati ha Telamu na Shuru u vhuya u swika Egipita. ₉Musi Dafita a tshi tshoṱhela fhethu o vha a tshi vhulaha vhanna na vhasadzi, hone nngu na kholomo na donngi na gamela na zwiambaro o vha a tshi dzhia. Zwo no ralo a humela ha Akhishi.

₁₀Musi Akhishi a tshi mu vhudzisa a ri, “Ṋamusi no vha no yo ṱangula ngafhi?” Dafita o vha a tshi fhindula a ri, “Ro vha ro ya u tshoṱhela Negeve kha ḽa Juda,” kana, “Ro vha ro ya u tshoṱhela Negeve kha ḽa Jeramiele,” kana a ri, “Negeve kha ḽa Vhakeni.” ₁₁Dafita ho ngo vhuya a litsha u vhulaha munna na muthihi kana musadzi na muthihi a ḓiswa Gathi, nge a humbula a ri, “Vha nga ḓo ri ambulula vha ri, ‘Dafita o ita hezwi.’ ” Dafita o ḓi ita nga u ralo misi yoṱhe a tshi kha ḓi dzula shangoni ḽa Vhafilista. ₁₂Akhishi o vha a tshi fulufhedza Dafita, a elekanya a ri, “O no luṱana tshoṱhe na Vhaisraele vha hawe, u vho ḓo shumela nṋe tshoṱhe.”