Lufu lwa Samuele. Musadzi o ṱalifhaho wa munna wa tsilu
1Zwino Samuele a dzama, Vhaisraele vhoṱhe vha kuvhangana, vha mu lila, vha mu swiṱa hayani hawe muḓini wa Rama.
Ndi hone Dafita a tshi tsela sogani ḽa Pharani. 2Muṅwe munna wa Maoni o vha e na thundu henefho Kharamele. O vha o pfuma zwihulu, e na zwigidi zwiraru zwa nngu na tshigidi tsha mbudzi. Dzo vha dzi tshi khou vheulwa henefho Kharamele nga hetsho tshifhinga. 3Munna uyo o vha a tshi pfi Nabali, musadzi wawe a tshi pfi Abigaili. Musadzi uyo o vha o ṱalifha nahone o naka, hone munna wawe vhutshilo hawe ho vha vhu tshi konḓa, a sa anḓani na muthu. O vha e Mukhalebe.
4Musi Dafita e henefho phangani, a pfa uri Nabali u khou vheula nngu. 5Ndi hone a tshi ruma vhaṱhannga vha fumi a vha vhudza a ri, “Iyani ha Nabali ngei Kharamele ni mu reshe nga dzina ḽanga. 6Ni tshi swika ni mu vhudze ni ri, ‘Nga vha lalame! Ngavhe vhone na muṱa wavho vha tshi vha na mutakalo. Zwoṱhe zwine zwa vha zwavho zwi vhe na mutakalo! 7Zwino ndi pfa uri ndi tshifhinga tsha u vheula nngu. Musi vhalisa vhavho vha nngu vhe na riṋe a ro ngo vha dina, misi yoṱhe vhe Kharamele a ho ngo vhuya ha xela na tshithihi tshavho. 8Nga vha vhudzise vhashumi vhavho, vha ḓo vha vhudza. Zwenezwo nga vha ṱanganedze vhaṱhannga vhanga nga vhuthu ngauri ri ḓa nga ḓuvha ḽa vhuṱambo. Nga vha ṱanganedze avho vhalanda vhavho na nṋe ṅwana wavho Dafita, vha vha ṋee zwine vha vhona.’ ”
9Vhaḽa vhanna vha no bva ha Dafita vha tshi swika, vha swikisa mafhungo ayo nga dzina ḽa Dafita, vha konou lindela. 10Nabali a hambekanya vhaḓinḓa vha Dafita a ri, “Dafita ndi nnyi? Uyo ṅwana wa Isai ndi nnyi? Maḓuvha ano hu na phuli nnzhi dzi no shavha vhaṋe vhadzo. 11Ndi nga kona hani u dzhia zwiḽiwa zwanga na maḓi, na ṋama ye nda ṱhavhela vhavheuli vhanga, nda zwi ṋea vhanna vhane nda si ḓivhe na hune vha bva hone?”
12Vhaḽa vhanna vha bvaho ha Dafita vha mbo humela hune vha bva hone. Musi vha tshi swika vha mu toololela zwoṱhe. 13Dafita a amba na avho vhanna a ri, “Kungelani zwihali zwaṋu.” Ndi hone vha tshi kungela zwihali zwavho, na Dafita a kungela zwawe. Ha takuwa vhane vha nga vha 400 vha ṱuwa na Dafita, vha 200 vha sala vho linda thundu.
14Muṅwe wa vhashumi a vhudza Abigaili musadzi wa Nabali a ri, “Dafita o ruma vhaḓinḓa vha tshi bva phangani uri vha ḓe vha reshe muṋe washu, hone muṋe washu vho vha hambekanya. 15Vhanna avho riṋe vho ri tonda vhukuma. A vho ngo ri dina, misi yoṱhe ri navho ngei pfuloni a ho ngo vhuya ha xela tshithu. 16Misi yoṱhe ri tshi khou lisa nngu dzashu ri navho vho vha vha tshi tou vha mutsheṱo washu wo ri tsireledzaho vhusiku na masiari. 17Zwino nga vha zwi elekanye, vha vhone uri vha nga itani, ngauri muṋe washu vha ḓo ṱuwa vha tshi welwa nga khombo, na muṱa wavho woṱhe. Hone ene ha ḓivhalekani, a hu na ane a nga amba nae.”
18Abigaili a si vhuye a fhedza tshifhinga, a mbo ḓi dzhia mikonde ya 200 ya vhurotho na mikumba mivhili ya waini na nngu ṱhanu dzo ṱhaṱhiwaho na khilogiramu dza 17 dza thoro dzo hadzingwaho na khekhe dza ḓana dza mpale wa nḓirivhe na khekhe dza 200 dza mpale wa mahuyu, zwa hweswa dzidonngi. 19Ndi hone a tshi vhudza vhashumi vhawe a ri, “Fhirani phanḓa, nṋe ndi ḓo ni tevhela.” Hone ayo mafhungo a si a vhudze Nabali munna wawe.
20Musi a tshi khou ḓa o namela donngi yawe a tshi tsa na phara, a tshenuwa ó ṱangana na Dafita na vhanna vhawe vha tshi khou tsela sia ḽawe, a vha ṱanganedza. 21Dafita o vha a tshi kha ḓi bva u ri, “Zwiḽa ndi tshi linda thundu ya uyu munna ngei phangani ha si xele na tshithihi tshawe, zwo vha zwi mahandana fhedzi. Nṋe ndo mu itela zwivhuya ene a nnyita vhuvhi! 22Muṋe washu nga a nthwe nga maswina anga a dovhe arali ḽi tshi nga dovha ḽa tsha ndo sia muthihi zwawe wa Nabali a re munna.”
23Musi Abigaili a tshi vhona Dafita, a ṱavhanya a tsa kha donngi yawe a wa nga tshifhaṱuwo phanḓa hawe. 24A wela milenzheni ya Dafita a ri, “Mulandu nga u vhe wanga ndi ndoṱhe, muṋe wanga. Nga vha litshe ndi ambe navho, nga vha thetshelese zwine nda vha vhudza. 25Muṋe wanga vha songo londa zwa houḽa Nabali muthu a sa ḓivhalekani. U tou fana na dzina ḽawe, dzina ḽawe ḽi pfi Tsilu, u dzula a tshi ita zwa vhutsilu. Huno a vha nṋe a tho ngo vhona vhaḓinḓa vhavho vha tshi ḓa. 26Zwino vhunga Muṋe washu o ita uri muṋe wanga vha si shulule malofha, vha si ḓilifhedzele nga zwanḓa zwavho, ndi ana nga Muṋe washu a tshilaho na nga vhone ndi ri, maswina avho na vhoṱhe vhane vha ṱoḓa u vha huvhadza ngavhe vha tshi nga Nabali. 27Ngavhe muṋe wanga vha tshi ṱanganedza nduvho iyi ine nda vha ṋea, vha tshi ṋea vhanna vhane vha vha navho. 28Nga vha nkhangwele mulandu wanga, ngauri vhukumakuma Muṋe washu u ḓo vha vhumba khosi, vhone muṋe wanga na vhaḓuhulu vhavho, ngauri vha khou lwa nndwa dza Muṋe washu. Zwenezwo vha songo vhuya vha ovha mulandu vhutshilo havho hoṱhe. 29Arali muṅwe a vha pandamedza uri a vha vhulahe, Muṋe washu Mudzimu wavho u ḓo vha tsireledza unga munna a tshi linda nungu ya mutengo muhulu. Hone vhutshilo ha maswina avho u ḓo vhu posa kule unga muthu a tshi posa tombo nga gatho. 30Musi Muṋe washu o no vha ṋea zwivhuya zwoṱhe zwe a vha fulufhedzisa, o no vha ita murangaphanḓa wa Israele, 31muṋe wanga vha ḓo pfa luvaloni lwavho hu si na muhwalo u lemelaho wa u sokou shulula malofha kana wa u ḓilifhedzela. Nahone musi Muṋe washu o no ita uri zwi vha nakele vha songo nkhangwa nandi.”
32Dafita a amba na Abigaili a ri, “Nga hu rendwe Muṋe washu Mudzimu wa Israele, we a vha ruma ṋamusi uri vha ḓe vha ṱangane na nṋe. 33Ngavhe vha tshi shudufhadzelwa ṱhalukanyo yavho, nge vha ita uri ndi si shulule malofha ṋamusi, ndi si ḓilifhedzele nga zwanḓa zwanga. 34Ndi ana nga Muṋe washu Mudzimu wa Israele a tshilaho, we a ita uri ndi si vha huvhadze, ndi ri, ngavhe vhone vha si ṱavhanye vha ḓa vha ṱangana na nṋe, ḽo vha ḽi tshi ḓo ri ḽi tshi tsha ha vha hu si tshee na na muthihi wa vhanna vha Nabali a tshilaho.”
35Ndi hone Dafita a tshi ṱanganedza zwe uyo musadzi a mu ḓisela, a ri, “Nga vha humele hayani nga mulalo. Maipfi avho ndo a pfa, ndi ḓo ita zwe vha nkhumbela.”
Dafita a tshi dzea Abigaili
36Abigaili a vhuelela ha Nabali, a wana Nabali e nḓuni a tshi khou ita vhuṱambo vhu no nga ha khosi. O vha o takalesa, o kambeswa. Abigaili a si vhudze Nabali tshithu ḽa vhuya ḽa tsha. 37Zwino nga matsheloni Nabali o no kambuluwa, musadzi wawe a mu vhudza zwithu hezwo zwoṱhe, mbilu yawe ya kundelwa, a tou oma unga tombo. 38Ho no fhela maḓuvha a fumi, Muṋe washu a rwa Nabali a fa.
39Musi Dafita a tshi zwi pfa uri Nabali o fa, a ri, “Nga hu rendwe Muṋe washu, o nndifhedzela kha Nabali we a nnyadza. O ita uri ndi si khakhe, a ita uri vhutshinyi ha Nabali vhu mu ḽe ṱhoho.”
Ndi hone Dafita a tshi ruma vhaḓinḓa ha Abigaili, vha yo mu ambisa. 40Vhashumi vhawe vha ya Kharamele vha swika vha vhudza Abigaili vha ri, “Dafita o ri ruma kha vhone uri ri ḓe ri vha vhinge vha vhe musadzi wawe.”
41Abigaili a wa nga tshifhaṱuwo a ri, “Ndi fhano, ndo ḓiimisela u ni shumela, nda ṱanzwa milenzhe ya vhaḓinḓa vha muṋe wanga.” 42Abigaili a mbo ḓi ṱavhanya a namela ḓonngi, e na pheletshedzi dzawe ṱhanu, a dzewa nga vhaḓinḓa vha Dafita, a vha musadzi wa Dafita.
43Dafita o vha o no dzea Ahinuamu a no bva Jesriele, zwino a vha e na vhasadzi vhavhili. 44Huno Saulo o vha o dzhia ṅwananyana wawe Mikhala, musadzi wa Dafita, a mu ṋea Phalatiele ṅwana wa Laishi, we a vha a tshi bva Galimu.
