1 SAMUELE 17

₁Zwino Vhafilista vha ramba mmbi dzavho uri vha bve pfumo, vha kuvhangana Sokho kha ḽa Juda. Vha ṱoka mishasha fhethu hune ha pfi Efese Damimu, vhukati ha Sokho na Azeka. ₂Saulo na Vhaisraele vha kuvhangana, vha ṱoka mishasha govhani ḽa Ela, vha ḓilugisela u lwa na Vhafilista. ₃Vhafilista vha ima muvhunduni muṅwe, Vhaisraele vha ima kha muṅwe, vhukati havho ha vha na govha.

₄Ha ḓa ngweṋa i tshi bva mishashani ya Vhafilista. O vha a tshi pfi Goliada, wa muḓi wa Gathi. Vhulapfu hawe ho vha vhu tshi hovhelela mitha tharu. ₅Ṱhohoni o vha o ambara nguwane ya musinaseṱha, a ita na u ambara lupila lwa u ḓitsireledza lwa musinaseṱha lune lwa lemela khilogiramu dza 57. ₆Milenzhe o vha o i pila nga makamasi a musinaseṱha, shaḓani ḽawe o hwala banga ḽa musinaseṱha. ₇Thende ya pfumo ḽawe yo vha i ndenya i tshi nga luṱanga lwa muluki, ṱhodzi yaḽo ya tsimbi i tshi lemela khilogiramu dzine dza nga vha ṱhanu na mbili. O vha o rangwa phanḓa nga muhwali wa tshiṱangu tshawe.

₈Goliada a ima, a ṱambuludza Vhaisraele a ri, “No bvelani pfumo no rwa muduba? Nṋe ndo imela Vhafilista, inwi ni phuli dza Saulo. Nangani munna a tsele ngeno kha nṋe! ₉Arali a tshi kona u lwa a mmbulaha, riṋe ri ḓo vha vhalanda vhaṋu, hone arali nda mu kunda nda mu vhulaha, inwi ni ḓo vha vhalanda vhashu na ri shumela.” ₁₀A dovha a ri, “Ṋamusi ndi nyadza mmbi ya Israele! Bvisani munna ri lwe.” ₁₁Saulo na Vhaisraele vhoṱhe vha ri u pfa maipfi a uyo Mufilista vha hanganea, vha farwa nga nyofho.

₁₂Zwino Dafita o vha e ṅwana wa Muefratha ane a pfi Isai we a vha a tshi dzula Betlehema kha ḽa Juda. Isai o vha e na vhana vhaṱanu na vhararu vha vhatuka. Misi ya Saulo o vha o kalaha, o no ḓi vha wa maḓuvha. ₁₃Vhana vha Isai vhararu vhahulwane vho vha vho bva pfumo na Saulo. Wa tanzhe o vha e Eliaba, wa vhuvhili e Abinadaba, wa vhuraru e Shama. ₁₄Dafita o vha e ene phedzi. Avho vhararu vhahulwane vha bva pfumo na Saulo, ₁₅hone Dafita o vha a tshi ḓi ita a tshi ya ha Saulo a dovha a humela Betlehema a yo lisa nngu dza khotsi awe.

₁₆Mufilista uyo o vhuya a fhedza maḓuvha a 40, a tshi ḓi sendela nga matsheloni na nga madekwana, a yo pikisa Vhaisraele.

₁₇Zwino Isai a vhudza ṅwana wawe Dafita a ri, “Dzhia thoro hedzi dzo hadzingwaho dza khilogiramu dza fumi na mikonde hei ya fumi ya vhurotho u ṱavhanye u yo ṋea vhakomana vhau ngei mishashani yavho. ₁₈U dzhie na tshisi hedzi dza fumi u yo ṋea mulangammbi. U ḓo vhuya u tshi mmbudza uri vhakomana vhau vha vuwa hani na uri vha ri mini. ₁₉Vha na Saulo na vhanna vhoṱhe vha Israele ngei govhani ḽa Ela, vha khou lwa na Vhafilista.”

₂₀Dafita a fhinduwa, a sia nngu na mulisa, a hwala izwo zwiḽiwa, a tshimbila nga he a laiwa nga Isai. A swika mishashani musi mmbi i tshi khou bva i tshi yo ima vhuimoni hayo ha nndwa, i tshi khou ṱavha mukosi wa nndwa. ₂₁Vhaisraele na Vhafilista vha ima vho lavhelesana. ₂₂Dafita a sia zwithu zwawe na mulondoli wa thundu, a gidimela hune ha lwiwa, a resha vhakomana vhawe. ₂₃Musi a tshi khou amba navho, Goliada wa Mufilista, ene ngweṋa i no bva Gathi, a bvela khagala, a ḓi pikisa Vhaisraele Dafita a zwi pfa. ₂₄Vhaisraele vha tshi vhona uyo munna, vhoṱhe vha mu shavha vho farwa nga nyofho khulu.

₂₅Zwino Vhaisraele vho vha vha tshi khou ḓi ri, “Ni khou mu vhona uyu munna a tshi khou ḓi sendela? U khou ḓa u nyefula Israele. Khosi i ḓo pfumisa munna ane a nga mu vhulaha. I ḓo ita na u mu ṋea ṅwananyana wayo uri a vhe musadzi wawe, ya dovha ya litshisa muṱa wa hawe u bvisa mithelo ya Israele.”

₂₆Dafita a vhudzisa vhanna vho imaho henefho tsini nae a ri, “Munna ane a vhulaha uyu Mufilista, a ita uri Vhaisraele vha si tsha nyadziwa, u ḓo ṋewani? Mufilista uyu wa shuvhuru ane a nyefula mmbi dza Mudzimu a tshilaho ndi nnyi?”

₂₇Vhone vha dovholola zwe vha vha vha tshi khou amba vha mu vhudza vha ri, “Munna ane a mu vhulaha u ḓo itwa tsha uri na tsha uri.”

₂₈Musi Eliaba mukomana wa Dafita muhulwane a tshi mu pfa a tshi khou amba na avho vhanna, a mu sinyutshela a mu vhudzisa a ri, “No ḓelani fhano? Dziḽa nngu no dzi sia na nnyi ngei sogani? Ndi a ḓivha uri ni a ḓihudza, ni na mbilu mmbi! No tou ḓa u vhona nndwa!”

₂₉Dafita a vhudzisa a ri, “Zwino ndo itani? Ndi songo vhuya nda amba?” ₃₀Dafita a rembulutshela kha muṅwe a dovholola ayo mafhungo, vhanna vha ḓi mu fhindula unga zwiḽa u rangani.

₃₁Zwe Dafita a amba zwa pfiwa, zwa swikiswa ha Saulo, Saulo a mu vhidzisa.

₃₂Dafita a amba na Saulo a ri, “Hu songo vha na ane a kulea nungo nga hoyu Mufilista, nṋe ndi ḓo ya nda lwa nae.”

₃₃Saulo a fhindula a ri, “Ni nga si kone u bva na yo lwa na hoyo Mufilista, ni kha ḓi vha mutukana, ene o ḓi vha muhali wa nndwa u bva hanani hawe.”

₃₄Huno Dafita a amba na Saulo a ri, “Nṋe ndi mulisa wa nngu dza khotsi anga. Musi hu tshi ḓa ndau kana biara ya hwala nngu sambini, ₃₅ndo vha ndi tshi i londa, nda i kovhola, nda lamukisa nngu mulomoni wayo. Musi i tshi rembulutshela kha nṋe, ndo vha ndi tshi i fara nga mamvele ayo, nda lwa nayo nda i vhulaha. ₃₆Hufha ndo no vhulaha ndau na biara, na Mufilista hoyu wa shuvhuru ndi ḓo mu ita zwenezwo, ngauri u nyefula mmbi dza Mudzimu a tshilaho. ₃₇Muṋe washu we a nndamukisa kha shimba ḽa ndau na ḽa biara u ḓo nndamukisa zwanḓani zwa hoyu Mufilista.”

Saulo a vhudza Dafita a ri, “Tshimbilani, Muṋe washu a vhe na inwi.”

₃₈Ndi hone Saulo a tshi ambadza Dafita zwihali zwawe: nguwane ya musinaseṱha na lupila lwa nndwa. ₃₉Dafita a vhofhelela banga ḽawe nṱha ha lupila, a edzisa u tshimbila, ngauri o vha a songo zwi ḓowela.

Dafita a vhudza Saulo a ri, “Ndi nga si kone u tshimbila ndo zwi ambara; a tho ngo zwi ḓowela.” Ndi hone a tshi zwi bvula, ₄₀a fara mbaḓa yawe, a nanga matombo maṱanu a no suvhelela mulambwanani, a a longa mukhwamani wawe wa mulisa wa nngu, a fara gatho, a sendela tsini ha uyo Mufilista.

₄₁Zwenezwo uyo Mufilista a ḓi sendela tsini ha Dafita o rangwa phanḓa nga muhwali wa tshiṱangu tshawe. ₄₂A tshi sedza Dafita a vhona a tshi tou vha mutukana, e na vala ḽavhuḓi na tshivhumbeo tshavhuḓi, a mu nyadza. ₄₃Goliada a amba na Dafita a ri, “U vhona unga nṋe ndi mmbwa u tshi nnḓela na lubaḓa?” A teketela Dafita nga midzimu yawe a ri, ₄₄“Iḓa fhano, ṋama yau ndi ḓo i fha zwiṋoni zwi fhufhaho na zwivhanda zwa ḓaka!”

₄₅Dafita a fhindula uyo Mufilista a ri, “Vhone vha nnḓela vho fara tshusa na pfumo na banga, hone nṋe ndi ḓa u lwa navho nga dzina ḽa Muṋe washu Mulangazwoṱhe, Mudzimu wa mmbi dza Israele, we vhone vha mu nyefula. ₄₆Ṋamusi ḽino Muṋe washu u ḓo vha kumedza nṋe, ndi ḓo vha vhulaha nda tumula ṱhoho yavho. Ṋamusi zwitumbu zwa mmbi ya Vhafilista ndi ḓo zwi fha zwiṋoni na zwivhanda, shango ḽoṱhe ḽa konou zwi ḓivha uri Mudzimu wa Israele u hone. ₄₇Vhoṱhe vho kuvhanganaho fhano vha ḓo zwi ḓivha uri Muṋe washu ha tshidzi nga banga kana pfumo, ngauri nndwa ndi ya Muṋe washu, noṱhe u ḓo ni kumedza zwanḓani zwashu.”

₄₈Huno Goliada a tshi khou ḓi sendela tsini uri a mu thome, Dafita a ṱavhanya a gidimela hune ha lwiwa hone uri a ṱangane nae. ₄₉Dafita a longa tshanḓa mukhwamani wawe a bvisa tombo, a ḽi posa nga gatho a rwa Goliada kha phanḓa. Tombo iḽo ḽa sunguvhela kha phanḓa yawe, a wela fhasi nga tshifhaṱuwo. ₅₀Ngauralo Dafita o mu kunda nga gatho na tombo, a mu rwa a wela fhasi, a mu vhulaha a songo fara banga.

₅₁Dafita a gidima a ima nṱha hawe, a fara banga ḽa Goliada, a ḽi ṱomola kha tshilanda, a mu vhulaha, a tumula ṱhoho yawe nga ḽeneḽo banga.

Musi Vhafilista vha tshi vhona uri muhali wavho o fa, vha rembuluwa vha shavha. ₅₂Ndi hone vhanna vha Israele na Juda vha tshi takuwa vha ṱavha mukosi, vha pandamedza Vhafilista vha vha swikisa muṋangoni wa Gathi na khoroni dza Ekroni. Zwitumbu zwavho zwa rambalala na gondo ḽa Shaarimu u vhuya u swika Gathi na Ekroni. ₅₃Musi Vhaisraele vha tshi vhuya u pandamedza Vhafilista, vha ṱangula mishasha yavho. ₅₄Dafita ene a dzhia ṱhoho ya Goliada, a i isa Jerusalema, zwihali zwa Goliada a zwi vhea denndeni yawe.

₅₅Musi Saulo o lavhelesa Dafita a tshi bva a tshi yo ṱangana na uḽa Mufilista, a vhudzisa Abinere ane a vha mulangammbi, a ri, “Abinere, uḽa muṱhannga ndi ṅwana wa nnyi?”

Abinere a fhindula a ri, “Thovhele, nga vhutshilo havho, a thi mu ḓivhi.”

₅₆Khosi ya ri, “Vhudzisani uri muṱhannga uyu ndi ṅwana wa nnyi?”

₅₇Musi Dafita a tshi vhuya a tshi bva u vhulaha uḽa Mufilista, Abinere a mu dzhia a mu swikisa ha Saulo a tshee o fara ṱhoho ya Mufilista. ₅₈Saulo a mu vhudzisa a ri, “Muṱhannga, ni ṅwana wa nnyi?”

Dafita a fhindula a ri, “Ndi nṋe ṅwana wa mulanda wavho Isai wa Betlehema.”