1 MAHOSI 7

₁Solomoni a ita na u ḓifhaṱela pfamo, a fhedza miṅwaha ya 13 a tshi khou i fhaṱa. ₂O fhaṱa na nnḓu ye ya vha i tshi pfi “Maṱaka a Libanoni”, ya vhunavha ha mitha dza 50 na vhuphara ha mitha dza 25 na vhulapfu u ya nṱha ha mitha dza 15, i na miduba miṋa ya phuphu dza mukedara dzo tika thanda dza mukedara. ₃Nṱha ha balaga dzo ḓitikaho nga phuphu yo vha yo fulelwa nga mukedara, hú na balaga dza 45, muduba muṅwe na muṅwe u na 15. ₄Mafasiṱere ayo o vha o rwa miduba miraru, muṅwe u nṱha ha muṅwe, o lavhelesana. ₅Miṋango yoṱhe yo vha i na mihangammbwa ya khuḓa nṋa, yo vha i kha masia mapfufhi, miraru miraru kha luvhondo, yo lavhelesana.

₆Solomoni a fhaṱa lukumbi lwa dziphuphu lwa vhunavha ha mitha dza 25 na vhuphara ha mitha dza 15. Phanḓa halwo ho vha hu na guḓa, ṱhanga yayo yó tikwa nga dziphuphu.

₇Solomoni a fhaṱa holo ya khuluṋoni, ye ya vha i tshi pfi Holo ya Khaṱhulo, he a vha a tshi ḓo haṱula hone milandu, a i tibedza nga mabaphathi a mukedara u bva fhasi u swika nga silini. ₈Pfamo ye a vha a tshi ḓo dzula khayo yo vha i murahurahu, kufhaṱelwe yo vha i tshi fana na dziṅwe nnḓu. Solomoni a ita na u fhaṱela mufumakadzi wawe ṅwananyana wa Farao pfamo i no fana na yeneyo holo.

₉Zwifhaṱo zwoṱhe hezwo, u bva nnḓa u ya muṱani muhulu na u bva kha muteo u swika nṱha, zwo vha zwo fhaṱwa nga matombo avhuḓi o vhaḓiwa a tou eliwa, a tumulelwa nga saha masia oṱhe nnḓa na ngomu. ₁₀Miteo yo vha yo tewa nga matombo mahulwane avhuḓi, maṅwe e na vhulapfu ha mitha ṱhanu na hafu, maṅwe e na vhulapfu ha mitha nṋa. ₁₁Mbondo dzo vha dzo fhaṱwa nga matombo avhuḓi, o vhaḓiwa a tou eliwa, na thanda dza mukedara. ₁₂Muṱa muhulu wo vha wo tangwa nga luvhondo lwa maalo mararu a matombo o vhaḓiwaho na ḽialo ḽithihi ḽa thanda dza mukedara dzo tumulelwaho, lu tshi ḓi gonya nga u ralo, u fana na lutambwe lu monaho na thembele ya Muṋe washu na guḓa ḽayo.

₁₃Khosi Solomoni a vhidzisa munna we a vha a tshi pfi Huramu, mutsila a dzulaho muḓini wa Tiro. ₁₄Mufu khotsi awe vho vha vhe mutsila makone kha zwa u shuma nga musinaseṱha, vhone vho vha vhe vha Tiro, mme awe vho vha vhe vha tsinde ḽa Nafuthali. Huramu o vha e na vhuṱali, e na nḓivho ya zwa vhutsila. Ene a tenda musi Solomoni a tshi mu vhidza uri a lange mushumo woṱhe wa u shuma nga musinaseṱha.

₁₅Huramu a fula phuphu mbili dza musinaseṱha, iṅwe na iṅwe i na vhulapfu ha mitha ṱhanu na nṋa u ya nṱha, na mitha ṱhanu na nthihi u mona nayo, a dzi vhea muṋangoni wa thembele. ₁₆A fula na ṱhoho mbili dza musinaseṱha, iṅwe na iṅwe i na vhulapfu ha mitha dza 2,5, dza u vhea nṱha ha dzenedzo phuphu. ₁₇Ṱhoho dzenedzo dzi re nṱha ha phuphu dzo vha dzo ṱamiwa nga sase ḽo lukiwaho nga geḓane, ṱhoho iṅwe na iṅwe i na geḓane ṱhanu na mbili. ₁₈Huramu a ita miduba mivhili ya maramba a musinaseṱha a mona na dzenedzo geḓane dzo tandekanaho uri dzi ṱame idzo ṱhoho dzi re nṱha ha phuphu. Ṱhoho iṅwe na iṅwe a i ita zwenezwo. ₁₉Ṱhoho dzi re nṱha ha phuphu ngomu guḓani dzo vha dzi na tshivhumbeo tsha maromboḓa, vhulapfu hadzo dzi mitha mbili. ₂₀Ṱhohoni dza idzo phuphu mbili, nṱha ha tshipiḓa tsho vhumbwaho unga ndilo tsini ha geḓane dzo tandekanaho, ho vha hu na maramba a 200 o ita miduba u mona hoṱhe. ₂₁Huramu a fhaṱa dziphuphu guḓani ḽa thembele. Phuphu ya thungo ya tshipembe a ri i pfi Jakhini, ya thungo ya devhula a ri i pfi Buasi. ₂₂Ṱhoho nga nṱha dzo vha dzi na tshivhumbeo tsha maromboḓa. Ha vha hu hone mushumo wa phuphu wo khunyelela.

₂₃Huramu a ita thannge ya tshitengelele ya musinaseṱha, u ya nṱha dzi mitha mbili na hafu, u buḓekanya vhukati hayo u bva kha ḽiṅwe sia u swika kha ḽiṅwe dzi mitha ṱhanu, u mona hoṱhe dzi mitha dza 15. ₂₄Hoṱhe u mona lumemeni lwa nnḓa lwa iyo thannge ho vha hu na miduba mivhili ya phaphana dza musinaseṱha dze dza vha dzo fulwa dzo momekana dzoṱhe na thannge, dzoṱhe dzi 300. ₂₅Thannge iyo yo vha yo ima nṱha ha miṱoḓo ya mboho dza 12 dza musinaseṱha dze dza vha dzo lavhelesa nnḓa, sia ḽiṅwe na ḽiṅwe hú na tharu, devhula na vhukovhela na tshipembe na vhubvaḓuvha. ₂₆Mbondo dza thannge dzo vha dzi milimitha dza 90 vhudenya. Lubomo lwayo lwo vha lu tshi nga lubomo lwa tshinwelo, lwo kombamela nnḓa unga nḓevhe dza maromboḓa. Thannge iyo yo vha i tshi fara maḓi a ḽitha dza 40 000.

₂₇Huramu a ita na zwigoloi zwa fumi zwa musinaseṱha. Tshiṅwe na tshiṅwe tsho vha tshi mitha mbili vhunavha na vhuphara, vhulapfu u ya nṱha tshi mitha na hafu. ₂₈Zwigoloi izwo zwo vha zwo itwa nga mabaphathi o longwaho vhukati ha dzifureme, ₂₉hú na zwifanyiso zwa dzindau na kholomo na vhakherube khao, nṱha ha fureme, na nṱha na fhasi ha dzenedzo ndau na mboho, ho vha hu na dzikhare. ₃₀Tshigoloi tshiṅwe na tshiṅwe tsho vha tshi na milinga miṋa ya musinaseṱha i na asi dza musinaseṱha. Khuḓani nṋa ho vha hu na thikho dza musinaseṱha dzo tikaho tshidzulo, thanda idzo dzo vha dzo ṱamiwa nga dzikhare. ₃₁Kha sia ḽa ngomu ḽa tshidzulo ho vha hu na buli ḽa fureme ya tshitengelele, ḽo tsa ḽa ita hafu ya mitha. Buli iḽo ḽo vha ḽi tshitengelele, ḽó ṱangana na fureme yaḽo ḽo vha ḽi tshi ita 75 cm. Ho vha hu na makolo o koriwaho u mona na iḽo buli. Mabaphathi a tshidzulo o vha o eḓana vhulapfu na vhuphara, a si zwitengelele. ₃₂Milinga iyo miṋa yo vha i fhasi ha mabaphathi, asi dza milinga dzo vha dzi tshithu tshithihi na tshigoloi. U aṱama ha milinga u bva sia ḽiṅwe u swika kha ḽiṅwe ho vha hu 75 cm. ₃₃Milinga iyo yo vha yo itwa unga ya gariki ya nndwa, asi na mbomo na zwipoko na dzihabu, zwoṱhe zwo vha zwo tou fulwa. ₃₄Tshigoloi tshiṅwe na tshiṅwe tsho vha tshi na mikungelo miṋa, khuḓa iṅwe na iṅwe i na muthihi, tshi tshithu tshithihi na tshigoloi. ₃₅Nṱha ha tshidzulo ho vha hu na tshiraho tsha tshitengelele tshe tsha vha tshi 75 cm u lapfela nṱha. Thikho na mabaphathi zwo vha zwo ṱumetshedzwa ṱhodzini ya tshigoloi. ₃₆Huramu a kora makolo a vhakherube na ndau na mitshevho nṱha ha idzo thikho na nṱha ha mabaphathi, hoṱhe hu re na tshikhala, na khare u mona hoṱhe. ₃₇Hoku ndi kwone kuitele kwa zwigoloi zwa fumi. Zwoṱhe zwo vha zwo fulwa nga u fana, zwi tshi fana nga vhuhulu na nga tshivhumbeo.

₃₈Huramu a konou ita masambelo a fumi a musinaseṱha, tshigoloi tshiṅwe na tshiṅwe tshi na ḽithihi. Sambelo ḽiṅwe na ḽiṅwe ḽo vha ḽi mitha mbili u bva sia ḽiṅwe u swika kha ḽiṅwe, ḽi tshi kona u fara maḓi a ḽitha dza 800. ₃₉Zwigoloi zwiṱanu a zwi vhea thungo ya tshipembe ya thembele, zwiṱanu a zwi vhea thungo ya devhula. Thannge a i vhea sia ḽa tshipembe, khuḓani ya vhubvaḓuvhatshipembe ha thembele.

₄₀Huramu a ita na masambelo na dzifosholo na ndilo dza u fara zwa u handulula. Ha mbo vha hu hone Huramu o khunyeledza mushumo woṱhe we a u shumela khosi Solomoni thembeleni ya Muṋe washu:

Thundu idzo dzoṱhe dza thembele ya Muṋe washu dze Huramu a itela khosi Solomoni dzo vha dzi dza musinaseṱha wo kulutedzwaho. ₄₆Khosi yo zwi vhumbisa ngomu ha dziforomo dza vumba mudavhini wa Jorodani vhukati ha Sukotho na Tsarethani. ₄₇Solomoni zwithu zwoṱhe hezwo ho ngo vhuya a zwi kala, ngauri zwo vha zwo ḓalesa, tshileme tsha musinaseṱha a tsho ngo vhuya tsha ḓivhea.

₄₈Solomoni a vhumbisa na thundu dza thembele ya Muṋe washu:

₅₁Musi khosi Solomoni o vuledza mushumo woṱhe wa thembele ya Muṋe washu, a dzhenisa zwithu zwe khotsi awe Dafita a vha o zwi kumedza Mudzimu, siliva na musuku na thundu, a zwi vhea mbulungeloni dza thembele ya Muṋe washu.