1 MAHOSI 20

₁Beni Hadadi khosi ya Aramu a ramba mmbi yawe yoṱhe, a tikedzwa nga mahosi maṅwe a 32 nga bere dzavho na dzigariki, a gonya a yo govhela Samaria, a u dia. ₂A ruma vhaḓinḓa muḓini ha khosi Ahaba wa Israele vha swika vha ri, “Beni Hadadi u ri, ₃‘Siliva yau na musuku wau ndi zwanga, vhafumakadzi vhau na vhana vhavhuḓi ndi vhanga.’ ”

₄Ahaba khosi ya Israele a fhindula a ri, “Muṋe wanga, zwine vha amba ndi a tenda, nṋe ndi wavho, na zwoṱhe zwine nda vha nazwo ndi zwavho.”

₅Vhaḓinḓa vha dovha vha vhuya ha Ahaba vha ri, “Beni Hadada u ri, ‘Ndo ruma vhaḓinḓa nda ri ndi ṱoḓa siliva yau na musuku wau na vhafumakadzi vhau na vhana vhau. ₆Zwino matshelo nga tshenetshi tshifhinga ndi ḓo ruma magota anga vha ḓa u ṱangula pfamo yau na nnḓu dza magota au, vha dzhia madzanga oṱhe vha zwi hwala vha zwi ḓisa ngeno.’ ”

₇Ahaba khosi ya Israele a vhidza vhahulwane vhoṱhe vha shango a vha vhudza a ri, “Edzonu vhona uri munna uyu u khou levha hani! Musi a tshi ruma vhaḓinḓa a ri vhafumakadzi vhanga na vhana vhanga na siliva yanga na musuku wanga ndi zwawe, nṋe a tho ngo hana lini.”

₈Vhahulwane na vhathu vhoṱhe vha fhindula vha ri, “Vhone vha songo mu thetshelesa; vha songo tenda uri vha ḓo mu fha zwine a ṱoḓa.”

₉Ndi hone Ahaba a tshi fhindula vhaḓinḓa vha Beni Hadada a ri, “Tshimbilani ni yo vhudza muṋe wanga thovhele ni ri, ‘Nṋe ndi ḓo ita zwoṱhe zwe vha thoma u mmbudza uri vha a zwi ṱoḓa, hone zwine vha ri vha a zwi ṱoḓa zwino ndi nga si zwi kone.’ ”

Vhaḓinḓa avho vha ṱuwa vha swikisa iyo phindulo ha Beni Hadada. ₁₀Beni Hadada a dovha a ruma vhaḓinḓa ha Ahaba a ri, “Ngavhe midzimu yanga i tshi nthwa ya dovha arali Samaria ha sala milora ine ya nga ḓadza zwanḓa zwa vhanna vhanga vhoṱhe.”

₁₁Ahaba khosi ya Israele a fhindula a ri, “Tshimbilani ni yo mu vhudza ni ri, ‘Muthu u ḓikhoḓa a tshi vhuya nndwani, ha ḓikhoḓi a sa athu kunda.’ ”

₁₂Beni Hadadi o pfa ayo mafhungo musi ene na vhaṅwe mahosi vhane vha ima nae vha tshi khou nwa denndeni dzavho, a vhudza vhanna vhawe a ri, “Ḓilugiseni ni yo dia uyo muḓi.” Vhone vha ḓilugisela u yo u dia.

₁₃Ha ḓa muporofita ha Ahaba khosi ya Israele a mu ḓivhadza a ri, “Muṋe washu u ri, ‘Mmbi iyi khulu u khou i vhona? Ndi ḓo i kumedza zwanḓani zwau ṋamusi, ndi hone u tshi ḓo zwi ḓivha uri ndi Nṋe Yahavee.’ ”

₁₄Ahaba a vhudzisa a ri, “Muṋe washu izwo u ḓo zwi ita nga nnyi?”

Muporofita a fhindula a ri, “Muṋe washu u ri, ‘Izwo zwi ḓo itwa nga vhahali vha vhaṱhannga vhane vha langwa nga vhavhusi vha dzingu.’ ”

Khosi ya vhudzisa ya ri, “Ane a ḓo thoma iyo nndwa ndi nnyi?”

Muporofita a fhindula a ri, “Hu ḓo thoma iwe.”

₁₅Ndi hone Ahaba a tshi ramba vhahali vha vhaṱhannga vha 232, vhane vha langwa nga vhavhusi vha dzingu. Ahaba a konou kuvhanganya Vhaisraele vhoṱhe vhe tshivhalo tshavho tsha vha tshi 7 000 vho ṱangana. ₁₆Vha takuwa masiari tshivhangalala musi Beni Hadadi na mahosi a 32 vhane vha ima nae vhe denndeni dzavho vha tshi khou kambwa. ₁₇Vhahali vha vhaṱhannga vha vhalangammbi ya dzingu vha vha vhone vhane vha thoma u bva. Zwino Beni Hadadi o vha o vhea ṱholi, dza ḓa dza mu vhudza dza ri, “Ri vhona Samaria hu tshi khou bva vhanna.”

₁₈Beni Hadadi a ri, “Arali vha tshi khou ḓa nga mulalo, vha fareni vha tshi khou tshila; naho vha tshi khou ḓa nga nndwa, vha fareni vha tshi khou tshila.”

₁₉Vhahali vha vhaṱhannga vha vhavhusi vha dzingu vha bvela khagala, vha tevhelwa nga mmbi ya Vhaisraele. ₂₀Muṅwe na muṅwe a vhulaha ane a lwa nae. Vhaaramu vha tshi vhona zwenezwo vha shavha, Vhaisraele vha vha pandamedza. Huno Beni Hadadi khosi ya Aramu a shavha nga bere e na vhaṅwe vhanameli vhawe vha bere. ₂₁Khosi ya Israele a swika a kunda mmbi ya dzibere na dzigariki, a tshinyadza Vhaaramu zwihulu.

₂₂Ngavhuya uḽa muporofita a ḓa ha khosi ya Israele a ri, “Kha vha khwaṱhise mmbi yaho, vha vhone zwine zwa nga itwa, ngauri khosi ya Aramu i ḓo dovha ya vha dia nga tshifhinga tsha ṱhumalurere.”

₂₃Magota a khosi Beni Hadadi wa Aramu vha mu eletshedza vha ri, “Midzimu ya Vhaisraele ndi midzimu ya dzithavhani, ndi zwe Vhaisraele vha ri kunda. Hone arali ra lwa navho mudavhini, vhukuma ri ḓo vha kunda. ₂₄Zwino vhone nga vha ite hezwi: Nga vha sudzuluse mahosi oṱhe kha mmbi dzavho dzine vha dzi langa, vha vhee magota maṅwe vhudzuloni havho. ₂₅Vha ite na mmbi i no nga iḽa ye ya lovha, i vhe na bere na gariki dzi no eḓana na dzenedziḽa ri konou yo lwa navho mudavhini. Vhukuma ndi hone ri tshi ḓo kona u kunda Vhaisraele.”

Beni Hadadi a thetshelesa nyeletshedzo yavho, a ita nga u ralo.

₂₆Tshifhinga tsha ṱhumalurere tshi tshi swika Beni Hadadi a ramba Vhaaramu a gonya navho muḓini wa Afeke u yo lwa na Vhaisraele. ₂₇Vhaisraele na vhone vha rambana vha ṋewa mbuvha, vha bva vha yo ṱangana navho. Vhaisraele vha ṱoka mishasha vho livhana navho vha tshi nga zwisambi zwivhili zwa mbudzi, ngeno Vhaaramu vho ḓadza shango vha tshi tou suvha.

₂₈Uḽa muḓinḓa wa Mudzimu a ya ha khosi ya Israele a ri, “Muṋe washu u ri, ‘Vhunga Vhaaramu vha tshi ri Nṋe Yahavee ndi mudzimu wa dzithavhani, a thi mudzimu wa magovhani, mmbi hei khulu ndi ḓo i kumedza zwanḓani zwau, ndi hone u tshi ḓo zwi ḓivha uri ndi Nṋe Yahavee.’ ”

₂₉Vhaaramu na Vhaisraele vha dzula mishashani yavho vho livhana vha fhedza maḓuvha maṱanu na mavhili, nga ḓuvha ḽa vhuṱanu na vhuvhili vha thoma u lwa, Vhaisraele nga ḓuvha ḽithihi vha vhulaha vhahali vha Vhaaramu vha 100 000 vha tshimbilaho nga milenzhe. ₃₀Vhaṅwe vhoṱhe vho ponyokaho pfumo vha shavhela muḓini wa Afeke, henefho 27 000 vhavho vha welwa nga mutsheṱo wa muḓi.

Beni Hadada a shavhela muḓini, a dzumbama kamarani ya ngomu-ngomu ya nnḓu.

₃₁Magota awe vha mu vhudza vha ri, “Ro pfa hu tshi pfi mahosi a Vhaisraele a na khathutshelo. Nga vha litshe ri ye ha khosi ya Israele ro ambara madzanganda khunduni dzashu, ro vhofha ṱhoho nga thambo, khamusi vha ḓo vha litsha vha si vha vhulahe.”

₃₂Ndi hone vha tshi ambara madzanganda khunduni, vha vhofha ṱhoho dzavho nga thambo, vha ya ha khosi ya Israele vha swika vha ri, “Mulanda wavho Beni Hadada u ri, ‘Nga vha nnditshe ndi tshile.’ ”

Ahaba a fhindula a ri, “Mathina u kha ḓi tshila? Hafhu ndi murathu wanga.”

₃₃Vhanna avho vha vhona itsho tshi tshiga tshavhuḓi, vha mbo ḓi ṱavhanya vha tevhedza ipfi ḽawe vha ri, “Ee, Beni Hadada ndi murathu wavho!”

Khosi ya ri, “Iyani u mu dzhia ni mu ḓise fhano.” Musi Beni Hadadi a tshi swika, Ahaba a ri a ḓe garikini yawe a namele nae. ₃₄Beni Hadadi a vhudza Ahaba a ri, “Ndi ḓo dovha nda vha ṋea miḓi ye khotsi anga vha dzhiela khotsi avho, nahone vha nga ḓi fhaṱa fhethu ha vhushavhi Damasko sa zwe khotsi anga vha ita Samaria.”

Ahaba a fhindula a ri, “Arali ra vhofha mulangano wo raloho, izwo ndi a vha vhofholola.” Ndi hone a tshi vhofha mulanga nae, a mu litsha a ṱuwa.

₃₅Muṅwe wa vhaporofita a vhudza khonani yawe o laiwa nga Muṋe washu a ri, “Nkovhole!” hone uyo munna a hana. ₃₆Muporofita uyo a ri, “Vhunga u songo thetshelesa Muṋe washu, zwenezwi u tshi ṱuwa kha nṋe u ḓo vhulawa nga ndau.” Munna uyo a tshi tou ṱuwa, a ṱangana na ndau ya mu vhulaha.

₃₇Muporofita uyo a wana muṅwe munna a ri, “Nkovhole!” Munna uyo a mu kovhola a tou mu huvhadza. ₃₈Ndi hone uyo muporofita a tshi ḓikhakhisa nga u sendedza luṅwenda lwa ṱhoho maṱoni, a ṱuwa a yo ima nḓilani a lindela khosi ya Israele i tshi fhira. ₃₉Musi khosi i tshi khou fhira, muporofita a i vhidzelela a ri, “Ndo vha ndi vhukatikati ha nndwa ndi tshi khou lwa, muṅwe muthu a ḓa ha nṋe e na ḽithubwa a ri, ‘Linda munna hoyu; arali a shavha, u ḓo lifha nga ṱhoho yau kana wa lifha nga mangwende a 3 000 a siliva.’ ₄₀Musi ndi tshee ndo farakanea nga zwiṅwe, ḽithubwa ḽa mbo ḓi shavha.”

Khosi ya Israele ya ri, “Khaṱhulo yaṋu ndi yeneyo, no tou i bula inwi muṋe.”

₄₁Ndi hone muporofita a tshi mbo ḓi ṱavhanya a bvisa ṅwenda we a thivha maṱo ngawo, khosi ya Israele ya mu ḓivha uri ndi muṅwe wa vhaporofita. ₄₂Muporofita a vhudza khosi a ri, “Muṋe washu u ri, ‘Wo vhofholola munna we nda ri a vhulawe. Zwenezwo u ḓo lifha vhutshilo hawe nga ṱhoho yau, wa lifha vhathu vhawe nga vhathu vhau.’ ”

₄₃Khosi ya Israele ya vhuelela pfamoni yayo i re Samaria yo ṱungufhala, yo sinyuwa.