Tshivenda 1998 (VEN98)
10

Khosi ya Sheba ya mufumakadzi a tshi dalela Solomoni

(2 Koron. 9:1-12)

101

10:1-10
Mat. 12:42
Khosi ya Sheba ya mufumakadzi na ene o pfa bvumo ḽa Solomoni na dzina ḽa Yahavee, a fara lwendo a ya Jerusalema u yo mu linga nga u mu vhudzisa mbudziso dza u konḓa. 2A swika Jerusalema e na vhaḓinḓa vhanzhi na gamela dzo hwala zwilungi na musuku munzhi na matombo a mutengo muhulu, a ḓa ha Solomoni a mu vhudzisa zwoṱhe zwe zwa vha zwi mbiluni yawe. 3Solomoni a fhindula mbudziso dzoṱhe, ha si vhe na tshine tsha konḓela Solomoni u ṱalutshedza iyo khosi. 4Khosi ya Sheba ya pfa vhuṱali hoṱhe ha Solomoni, a vhona pfamo ye Solomoni a fhaṱa, 5na zwiḽiwa zwine zwa ḓiswa ḓafulani ḽawe na hune ha dzula magota na vhashumi vha pfamoni na zwiambaro zwavho na vhashumi vhane vha mu shumela vhuṱamboni na zwiṱhavhelo zwine a ṋekedza thembeleni ya Muṋe washu, zwa mu akhamadza. 6A vhudza khosi Solomoni a ri, “Zwe nda zwi pfa ndí shangoni ḽanga nga vhuṱali havho na mishumo yavho ndi ngoho! 7Huno izwo zwithu a tho ngo zwi tenda nda vhuya nda tou ḓa nda zwi vhona nga anga maṱo. Vhukuma ndo vha ndi songo vhuya nda vhudzwa na hafu yazwo; vhuṱali havho na lupfumo lwavho zwi fhira zwe nda vhudzwa. 8Vhathu vhavho vha na mashudu hani! Na magota avho vhane vha dzula navho vha tshi endela u pfa vhuṱali havho vha na mashudu! 9Nga hu rendwe Yahavee Mudzimu wavho we a vha takalela, a vha vhea kha khuluṋoni ya Israele. Yahavee o vha vhea khosi uri vha vhe na khaṱhulo mbuya, vha ite zwi re zwone nge a funa Israele nga lufuno lu sa gumi.”

10A ṋea khosi Solomoni zwifhiwa zwe a ḓa nazwo, zwa musuku une wa fhira khilogiramu dza 4 000 na zwilungi zwinzhi na matombo a mutengo muhulu. A ho ngo dovha ha ḓiswa zwilungi zwinzhi zwi no eḓana na zwe khosi ya Sheba ya mufumakadzi ya ṋea khosi Solomoni.

11

10:11
1 Mah. 9:26-28
Zwikepe zwa Hiramu zwe zwa vha zwo ḓisa musuku u tshi bva Ofiri, zwa ḓisa na matanda manzhi a musandala na matombo a mutengo muhulu zwi tshi bva henengei. 12Solomoni a ita thikho dza thembele ya Muṋe washu na dza pfamo ya musanda nga eneo matanda, a ita na haripa na zwihwana zwa vhaimbi. O vha e one matanda avhuḓi a musandala e a vhuya a ḓiswa kha ḽa Israele, o raloho ho ngo tsha dovha a vhonwa.

13Khosi Solomoni a ṋea khosi ya Sheba zwoṱhe zwe a zwi tama a zwi humbela, a dovha a mu tonda nga zwiṅwe. Ndi hone khosi ya Sheba i tshi humela shangoni ḽa Sheba na vhalanda vhayo.

Lupfumo lwa khosi Solomoni

(2 Koron. 9:13-29)

14Ṅwaha muṅwe na muṅwe khosi Solomoni o vha a tshi ḓiselwa musuku une wa nga lemela khilogiramu dza 23 000, 15hu sa vhalwi mithelo ine ya theliwa nga vhashavhi na mbuelo ine ya bva kha mabindu na muthelo une wa theliwa nga mahosi a Maarabia na vhavhusi vha madzingu a Israele.

16Khosi Solomoni a ita zwiṱangu zwihulu zwa 200, tshiṅwe na tshiṅwe tsha fhomiwa musuku wo fuliwaho une wa lemela khilogiramu ṱhanu na mbili. 17

10:17
1 Mah. 7:2
A ita na zwiṱangu zwiṱuku zwa 300, tshiṅwe na tshiṅwe a tshi fhoma musuku wo fuliwaho une wa ṱoḓou lemela khilogiramu mbili. Khosi ya zwi vhea huvhewazwihali ha Maṱaka a Libanoni.

18Khosi ya itisa na khuluṋoni khulu, ya tibedzwa nga ṋanga dza nḓou, ya dovha ya fhomiwa na musuku u songo vangiwaho. 19Khuluṋoni iyo yo vha i na zwiṱepisi zwiṱanu na tshithihi, nga murahu hayo i na muṱumba wa ṱhoho ya mboho.ṱhoho ya mboho: Ipfi ḽa Tshiheberu ḽi nga amba uri “tshitendeledzi” kana “mboho”. Ṱhalutshedzo ya Tshigiriki yo nanga “mboho”. Masia oṱhe a tshidzulo ho vha hu na zwitikatshanḓa, hu na tshifanyiso tsha ndau yo imaho tsini ha tshiṅwe na tshiṅwe. 20Ho vha hu na zwifanyiso zwa ndau dza 12 dzo ima kha zwiṱepisi izwo zwiṱanu na tshithihi, magumoni a tshiṱepisi tshiṅwe na tshiṅwe ho ima ndau, nthihi ngeno nthihi ngeno. Mashangoni oṱhe a hu na iṅwe khosi ye ya vhuya ya itelwa khuluṋoni yo raloho.

21Zwinwelo zwoṱhe zwa khosi Solomoni zwo vha zwi zwa musuku, na thundu dzoṱhe dza nḓuni ya huvhewazwihali ha Maṱaka a Libanoni dzo vha dzi dza musuku u songo vangiwaho. Ho vha hu si na tsho itwaho nga siliva, ngauri siliva yo vha i si na mutengo misi ya Solomoni. 22Khosi yo vha i na zwikepe zwine zwa vhambadza thundu lwanzheni zwi tshi tshimbila na zwa Hiramu. Ho vha hu tshi ri u fhela miṅwaha miraru zwa vhuya zwo hwala musuku na siliva na ṋanga dza nḓou na dziṱhoho na mapfeṋe.

23Khosi Solomoni o vha a tshi fhira mahosi oṱhe a ḽifhasi nga lupfumo na nga vhuṱali. 24Vhathu vha mashango oṱhe vho vha vha tshi tama u thetshelesa Solomoni uri vha pfe vhuṱali he Mudzimu a vha o vhu vhea mbiluni yawe. 25Ṅwaha nga ṅwaha, muṅwe na muṅwe we a ḓa o vha a tshi ḓa na nduvho, zwithu zwa siliva na musuku na dziphuraphura na zwihali na zwilungi na dzibere na dzimeila.

26Solomoni o vha e na gariki nnzhi na bere, o vha e na gariki dza 1 400 na bere dza 12 000, zwe a vha o zwi vhea miḓini ya dzigariki, zwiṅwe a tshi dzula nazwo Jerusalema. 27

10:27
Dot. 17:17
Khosi ya khokha siliva nnzhi Jerusalema ya nga matombo, mikedara ya anda unga mihuyu zwigodini. 28
10:28
Dot. 17:16
Bere dza Solomoni dzo vha dzi tshi bva Egipita na Kue, vhashavhi vha musanda vho vha vha tshi dzi renga dzi tshi bva Kue. 29Vho vha vha tshi renga gariki nthihi i no bva Egipita nga mangwende a 600 a siliva, bere i tshi rengwa nga mangwende a 150 a siliva. Vho vha vha tshi ita na u dzi rengisela mahosi a Vhahithi na Vhaaramu.