1 KORONIKA 9

₁Vhaisraele vhoṱhe vho vha vho ṅwalwa kha mutevhe zwi tshi ya nga miṱa yavho, mafhungo ayo a ṅwalwa buguni ya Mahosi a Israele.

Vhathu vha Juda vho hwalwa vha iswa vhuthubwani Babele nge vha vha vha sa fulufhedzei. ₂Zwino vhe vha thoma u dovha vha dzula shangoni ḽavho miḓini yavho vho vha vhaṅwe Vhaisraele na vhotshifhe na Vhalivi na vhashumi vha thembeleni. ₃Vhathu vhane vha bva kha matsinde a Juda na Benyamini na Efraimi na Manase vhe vha vha vha tshi dzula Jerusalema, ₄ndi Uthai ṅwana wa Amihudu, ṅwana wa Omuri, ṅwana wa Imiri, ṅwana wa Bani, wa lutsinga lwa Pheretse ṅwana wa Juda. ₅Vha Shilo ndi Asaya wa tanzhe na vhana vhawe. ₆Vha Zera ndi Jeuele. Vhathu vha no bva kha ḽa Juda vho vha vhe 690. ₇Vha tsinde ḽa Benyamini ndi Salu ṅwana wa Mishulamu, ṅwana wa Hodavia, ṅwana wa Hasenua, ₈na Ibinea ṅwana wa Jerohamu na Ela ṅwana wa Uzi, ṅwana wa Mikhiri, na Mishulamu ṅwana wa Shefatia, ṅwana wa Reuele, ṅwana wa Ibinia.

₉Vhathu vha tsinde ḽa Benyamini nga he vha ṅwalwa kha mitevhe zwi tshi ya nga miṱa yavho vho vha vhe 956. Vhanna vhoṱhe havho vho vha vhe ṱhoho dza miṱa yavho.

₁₀Vha nnḓu ya vhotshifhe ndi Jedaya na Jehoyaribu na Jakhini ₁₁na Azaria ṅwana wa Hilikia, ṅwana wa Mishulamu, ṅwana wa Tsadoko, ṅwana wa Mirayotho, ṅwana wa Ahitubu ene gota ḽa nnḓu ya Mudzimu, ₁₂na Adaya ṅwana wa Jerohamu, ṅwana wa Phashuru, ṅwana wa Malikhia, na Maasai ṅwana wa Adiele, ṅwana wa Jasere, ṅwana wa Mishulamu, ṅwana wa Mishilemithi, ṅwana wa Imere.

₁₃Vhotshifhe vhe vha vha vhe ṱhoho dza miṱa vho vha vhe 1 760. Vho vha vhe vhomakone mishumoni ya nnḓu ya Mudzimu.

₁₄Vha nnḓu dza Vhalivi ndi Shemaya ṅwana wa Hashubu, ṅwana wa Azirikamu, ṅwana wa Hashabia wa mutupo wa Mirari, ₁₅na Bakabakara na Hereshe na Galali na Mathania ṅwana wa Mika, ṅwana wa Zikhiri, ṅwana wa Asafu, ₁₆na Obadia ṅwana wa Shemaya, ṅwana wa Galali, ṅwana wa Jeduthuni, na Berekhia ṅwana wa Asa, ṅwana wa Elikana we a vha a tshi dzula miḓanani ya Vhanetofa.

₁₇Vhalindakhoro ndi Shalumu na Akubu na Talamoni na Ahimani na mashaka avho. Shalumu o vha e ene muhulwane wavho. ₁₈U swika tshifhinga tshenetsho o vha o vhewa Khoroni ya Musanda thungo ya vhubvaḓuvha. Havho vho vha vhe vhalindakhoro vha mishasha ya Vhalivi. ₁₉Shalumu ṅwana wa Kore, ṅwana wa Ebiasafu, ṅwana wa Kora, na vhalindakhoro ngae vha muṱa wa hawe, vha mutupo wa Kora, vho vha vha tshi linda zwiukhuvha zwa dennde ya Muṋe washu u ḓi nga vhokhotsi avho vhe vha vha vha tshi linda muṋango une wa dzhena hune Muṋe washu a dzula hone. ₂₀Zwiḽa kale Finiasi ṅwana wa Eliasara o vha a tshi langa vhalindakhoro; Muṋe washu a mu elelwe! ₂₁Zakaria ṅwana wa Mishelemia o vha e mulindakhoro muṋangoni une wa dzhena denndeni ya u ṱangana na Muṋe washu.

₂₂Vho nangwaho uri vha vhe vhalindakhoro zwiukhuvhani vhó ṱangana vhoṱhe vho vha vhe 212. Vho vha vho ṅwalwa zwi tshi ya nga miṱa miḓanani yavho. Vhalindakhoro vho vha vho vhewa vhuimoni uho vhune ha ṱoḓa muthu a fulufhedzeaho, nga khosi Dafita na Samuele wa muvhoni. ₂₃Vhone na vha lutsinga lwavho vho vha vha tshi langa zwa u linda khoro dza nnḓu ya Muṋe washu, nnḓu i no pfi Dennde. ₂₄Vhalindakhoro vho vha vhe kha masia maṋa, vhubvaḓuvha na vhukovhela na devhula na tshipembe. ₂₅Vha havho vha re miḓanani yavho vho vha vha tshi ita vha tshi ḓa, vha kovhekana mishumo yavho vha fhedza maḓuvha maṱanu na mavhili. ₂₆Hone vhalindakhoro vhahulwane vhaṋa vho vha vhe Vhalivi, vhenevho vho vha vho vhewa uri vha ṱwe vha tshi londola dzikamara na zwisiku zwa nnḓu ya Mudzimu. ₂₇Vho vha vha tshi ima u mona na nnḓu ya Mudzimu vhusiku hoṱhe ngauri vho vha vha tshi i linda nahone vho vha vha tshi fara khii ya u i vula misi yoṱhe ḽi tshi tsha.

₂₈Vhaṅwe vhavho vho vha vha tshi londola midzio ine ya shumiswa thembeleni. Iyo midzio vho vha vha tshi i vhala musi i tshi bvisiwa na musi i tshi vhuiswa. ₂₉Vhaṅwe vho vha vho ṋewa mushumo wa u londola thundu na zwiṅwe zwithu zwa hukhethwa, khathihi na vhukhopfu na waini na mapfura na zwioro na zwilungi. ₃₀Hone vhaṅwe vhotshifhe mushumo wavho wo vha u wa u vanganya zwilungi.

₃₁Muṅwe Mulivi we a vha a tshi pfi Mathithia, tanzhe ḽa mutuka ḽa Shalumu wa mutupo wa Kora, o vha o ṋewa mushumo wa u bika vhurotho vhune ha ṋekedzwa Mudzimu. ₃₂Vhaṅwe vha havho vha mutupo wa Kehathi vho vha vho ṋewa mushumo wa u baga vhurotho vhune ha vhewa ḓafulani nga Sabatha iṅwe na iṅwe.

₃₃Ṱhoho dza miṱa ya Vhalivi, vhe vha vha vha tshi sika nyimbo, vho vha vha tshi dzula kamarani dza thembele, vha sa shumi miṅwe mishumo ngauri vho vha vha tshi shuma uyo mushumo vhusiku na masiari.

₃₄Vhoṱhe havho vho vha vhe ṱhoho dza miṱa ya Vhalivi na vhahulwane nga he vha ṅwalwa kha mutevhe wa vha lutsinga lwa havho nahone vho vha vha tshi dzula Jerusalema.

₃₅Jeiele o fhaṱa muḓi wa Gibioni a dzula henefho. Mufumakadzi wawe o vha a tshi pfi Maakha, ₃₆tanzhe ḽawe ḽa mutuka ḽi tshi pfi Abidoni, a tevhelwa nga Tsuru na Kishi na Baali na Nere na Nadaba ₃₇na Gedoro na Ahio na Zakaria na Mikilotho. ₃₈Mikilotho o vha khotsi a Shimia. Na vhone vho vha vha tshi dzula Jerusalema tsini na mashaka avho.

₃₉Nere o vha e khotsi a Kishi, khotsi a Saulo, khotsi a Jonathani na Malakhishua na Abinadaba na Eshbaali. ₄₀Ṅwana wa Jonathani ndi Meribaali khotsi a Mika. ₄₁Vhana vha Mika ndi Phithoni na Melekhe na Tharia na Ahasi. ₄₂Ahasi o vha e khotsi a Jada, khotsi a Alemethe na Asimavethe, na Zimiri khotsi a Motsa. ₄₃Motsa o vha e khotsi a Binia, khotsi a Refaya, khotsi a Eliasa, khotsi a Atsele.

₄₄Atsele o vha e na vhana vhaṱanu na muthihi, vhone vho vha vha tshi pfi Asirikamu na Bokheru na Ishmaele na Shearia na Obadia na Hanani. Ndi vhone vhana vha Atsele.