1 KORONIKA 4

₁Vhana vha Juda ndi Pheretse na Esromu na Kharami na Huru na Shobala. ₂Shobala o vha khotsi a Reaya, khotsi a Jahathi, khotsi a Ahumai na Lahadi. Ndi vhone vha miṱa ya vhapo vha Tsora.

₃Vhana vha Etamu ndi Jesriele na Ishima na Idibashi. Khaladzi avho o vha a tshi pfi Hatseleponi. ₄Phenuele o fhaṱa muḓi wa Gedoro, Ezere a fhaṱa wa Husha. Ndi vhone vhana vha Huru, tanzhe ḽa uḽa musadzi a no pfi Efuratha, ndi ene o fhaṱaho muḓi wa Betlehema.

₅Ashuhuru o fhaṱaho muḓi wa Thekua o vha e na vhasadzi vhavhili, Hela na Naara. ₆Naara a mu bebela Ahuzamu na Hefere na Themeni na Haahashithari. Ndi vhone vhana vha Naara. ₇Vhana vha Hela ndi Tserethe na Tsohara na Ethinani na Kotso.

₈Kotso o vha khotsi a Anubu na Tsobeba, ndi ene makhulu wa miṱa ya vhana vha Aharahele ṅwana wa Harumu.

₉Jabetse o vha a tshi hulisea u fhira vhaṅwe vhana vha khotsi awe. Mme awe o ri u pfi Jabetse (Ntshengedzeni) nge a tshi mu beba a pfa vhuṱungu nga maanḓa. ₁₀Jabetse a rabela Mudzimu wa Israele a ri, “Ngavhe u tshi ntshudufhadza, wa engedza shango ḽanga! Ivha na nṋe u ntsireledze ndi si welwe nga khombo ndi si shengele.” Mudzimu a mu ṋea hezwo zwe a humbela.

₁₁Khalebe murathu wa Shuha o vha khotsi a Mehiri, khotsi a Eshthoni, ₁₂khotsi a Bethe Rafa na Phasia na Thehina we a fhaṱa muḓi wa Nahashi. Ndi vhone vhanna vhe vha vha vha tshi dzula Rekha.

₁₃Vhaḓuhulu vha Kenasi ndi Othiniele na Seraya. Vhana vha Othiniele ndi Hathathi na Mionothai. ₁₄Mionothai o vha khotsi a Ofura.

Seraya o vha khotsi a Juaba, mufhaṱi wa Govha ḽa Vhatsila; ho vha hu tshi vhidzwa nga u ralo nge vhathu vhaho vha vha vhe vhatsila.

₁₅Vhana vha Khalebe ṅwana wa Jefune ndi Iru na Ela na Naamu. Ṅwana wa Ela ndi Kenasi.

₁₆Vhana vha Jehalelele ndi Zifi na Zifa na Thiria na Asarele.

₁₇Vhana vha Esra ndi Jethere na Mirede na Efere na Jaloni. Mufumakadzi muṅwe wa Mirede o beba Miriamu na Shamai na Ishiba khotsi a Eshthemua. ₁₈Mufumakadzi wa Mirede wa tsinde ḽa Juda o beba Jerede we a fhaṱa muḓi wa Gedoro na Hebere we a fhaṱa Sokho na Jekuthiele we a fhaṱa Zanua. Havhaḽa vhaṅwe vho vha vhe vhana vha ṅwananyana wa Farao a no pfi Bithia we a vha e mufumakadzi wa Mirede.

₁₉Hodia o dzea khaladzi a Nahaimi, vhana vhawe ndi vha nnḓu ya Garamu vhe vha vha vha tshi dzula Keila na vha nnḓu ya Maakha vhe vha vha vha tshi dzula Eshthemua.

₂₀Vhana vha Simoni ndi Amunoni na Rina na Beni Hanani na Thiloni.

Vhana vha Ishi ndi Zohethe na Beni Zohethe.

₂₁Vhana vha Shela ṅwana wa Juda ndi Ere mufhaṱi wa muḓi wa Lekha, na Laada mufhaṱi wa muḓi wa Maresha, na mitupo ya vhaluki vha lukhaha vhe vha vha vha tshi dzula muḓini wa Bethe Ashibia. ₂₂Vhaṅwe vhaḓuhulu vha Shela ndi Jokimu na vhathu vhe vha vha vha tshi dzula Khozeba, na Juasi na Sarafu we a vhusa Muaba, na Jashubi Leheme. Mafhungo hayo ndi a kale-kale. ₂₃Vhathu havho vho vha vhe vhavhumbi vha dzikhali vha tshi shumela khosi, vha tshi dzula miḓini ya Netaimi na Gedera.

₂₄Vhana vha Simioni ndi Jemuele na Jamini na Jaribi na Zera na Saulo. ₂₅Saulo o vha khotsi a Shalumu, khotsi a Mibisamu, khotsi a Mishima, ₂₆khotsi a Hamuele, khotsi a Zakhuru, khotsi a Shimei. ₂₇Shimei o vha e na vhana vha 16 vha vhatuka na vhananyana vhaṱanu na muthihi, hone vhaṅwe vhana vha Simioni vho vha vha si na vhana vhanzhi, ndi zwe vhathu vha mitupo ya Simioni vha si ande unga vha Juda.

₂₈Vha lutsinga lwa Simioni vho vha vha tshi dzula miḓini ya Bierisheba na Molada na Hatsara Shuala ₂₉na Biliha na Etsemu na Tholadi ₃₀na Bethuele na Horoma na Tsikilaga ₃₁na Bethe Marikhabotho na Hatsara Susimu na Bethe Biri na Shaaraimi. Yo vha yone miḓi yavho u vhuya u swika hu tshi vhusa khosi Dafita. ₃₂Vho vha vha tshi dzula na miḓi ya Etamu na Aini na Rimoni na Thokhene na Ashani, miḓi miṱanu, ₃₃na miḓanani yoṱhe ya matungo u mona na iyo miḓi u vhuya u swika vhukovhelatshipembe muḓini wa Baalathi. Vho vha vha tshi dzula henefho, vha ita na u ṅwala mutevhe wa vha lutsinga lwa havho.

₃₄Ho vha ho ṅwalwa Mishobabu na Jamulekhe na Josha ṅwana wa Amatsia ₃₅na Juele na Jehu ṅwana wa Joshibia, ṅwana wa Seraya, ṅwana wa Asiele, ₃₆na Elihwenai na Jaakoba na Jeshohaya na Asaya na Adiele na Jesimiele na Benaya ₃₇na Zisa ṅwana wa Shifi, ṅwana wa Aloni, ṅwana wa Jedaya, ṅwana wa Shimiri, ṅwana wa Shemaya. ₃₈Vhanna vho ṅwalwaho afho nga madzina vho vha vhe vharangaphanḓa vha miṱa yavho. Vha miṱa yavho vha anda zwihulu, ₃₉vha ṱanḓavhuwa vha vhuya vha ṱoḓou swika Gedoro vhubvaḓuvha ha govha vha tshi ṱoḓa pfulo ya masambi avho a nngu. ₄₀Vha wana pfulo nnzhi yavhuḓi nahone shango iḽo ḽo vha ḽo ṱanḓavhuwa, hu na mulalo, ḽo dzika. Henefho u rangani ho vha hu tshi dzula Vhahamu.

₄₁Vhanna avho vho ṅwalwaho madzina vho ḓa misi ya khosi Hiskia wa Juda, vha dia Vhahamu he vha vha vha tshi dzula hone, vha dia na Vhameunu vhe vha vha vhe henefho, vha vha lozwa tshoṱhe, na ṋamusi a vha athu vhuya. Vha dzula he vhathu avho vha vha vha tshi dzula hone nge ha vha hu na pfulo ya masambi avho a nngu. ₄₂Maḓana maṱanu a avho vhaḓuhulu vha Simioni vha dia shango ḽa makwara ḽa Seiri, vho rangwa phanḓa nga Phelatia na Nearia na Refaya na Uziele, vhana vha Ishi. ₄₃Vha vhulaha Vhaamaleke vho salaho vhe vha vha vho shavha, vha dzula henefho, na ṋamusi.