Nzudzanyo ya zwa mmbi na zwa vhudzulapo
1Ho vha hu na mutevhe wa Vhaisraele wa ṱhoho dza miṱa na vhalangammbi na vhalangagomane na vhakoma vhavho, vhe vha vha vha tshi shumela khosi kha zwoṱhe zwe zwa vha zwi tshi kwama zwigwada zwa mmbi dze dza vha dzi mushumoni ṅwedzi nga ṅwedzi ṅwaha woṱhe. Tshigwada tshiṅwe na tshiṅwe tsho vha tshi na vhanna vha 24 000. Ngoyu mutevhe na vharangaphanḓa vhavho:
2-15Ṅwedzi wa u thoma: Jashobiamu ṅwana wa Zabudiele, wa lutsinga lwa Pheretse. O vha e ene muhulwane wa vhalangammbi vhoṱhe vha tshigwada tshawe.
Ṅwedzi wa vhuvhili: Dodai wa lutsinga lwa Ahohi. Murangaphanḓa wa vhalangammbi o vha e Mikilotho.
Ṅwedzi wa vhuraru: Benaya ṅwana wa tshifhe Jehoyada. Ene o vha e muṅwe wa Vhahali vha 30. Musi a tshi vha murangaphanḓa wavho ṅwana wawe Amizabadi a vha murangaphanḓa wa itsho tshigwada vhudzuloni hawe.
Ṅwedzi wa vhuṋa: Asaele murathu wa Juaba, ngavhuya ṅwana wawe Zebadia a vha mulangi wa itsho tshigwada vhudzuloni hawe.
Ṅwedzi wa vhuṱanu: Shamuhuthu wa lutsinga lwa Izhara.
Ṅwedzi wa vhuṱanu na vhuthihi: Ira ṅwana wa Ikeshe wa Thekua.
Ṅwedzi wa vhuṱanu na vhuvhili: Heletse a no bva Pheloni, wa tsinde ḽa Efraimi.
Ṅwedzi wa vhuṱanu na vhuraru: Sibekhai a no bva Husha, wa mutupo wa Zera.
Ṅwedzi wa vhuṱanu na vhuṋa: Abiesere wa Anathotho kha ḽa Benyamini.
Ṅwedzi wa fumi: Maharai wa Netofa, wa mutupo wa Zera.
Ṅwedzi wa fumi na vhuthihi: Benaya wa Phirathoni kha ḽa Efraimi.
Ṅwedzi wa fumi na vhuvhili: Heledai wa Netofa, wa lutsinga lwa Othoniele.
Magota a matsinde a 12 a Vhaisraele
16Magota a matsinde a Vhaisraele ndi haya:
Hayo ndi one magota a Vhaisraele.
23Khosi Dafita a tshi vhala vhathu ho ngo ṅwala vhe vha vha vha sa athu vha na miṅwaha ya 20 kana vhaṱuku kha avho, nge Muṋe washu a vha o fulufhedzisa uri u ḓo andisa Vhaisraele vha nga ṋaledzi dza lutomboni. 24Juaba, ṅwana wa musadzi we a vha a tshi pfi Tseruya, a thoma u vhala vhanna, hone a si fhedze. Vhaisraele vha welwa nga khombo nga mulandu wa u vhalwa uho ha vhathu, tshivhalo tsha vhathu tsha si ṅwalwe kha bugu ya Histori ya khosi Dafita.
Vhalangi vha thundu ya musanda
25Nnḓu dza mbulungelo dza musanda dzo vha dzi tshi langwa nga Asimavethe ṅwana wa Adiele.
Nnḓu dza mbulungelo madzinguni a re nnḓa na dziḓoroboni na miḓanani na thawarani dza u linda dzo vha dzi tshi langwa nga Jonathani ṅwana wa Uzia.
26Vhashumi vha masimuni vho vha vha tshi langwa nga Esri ṅwana wa Khelubu.
27Masimu a minḓirivhe o vha a tshi langwa nga Shimei wa Rama.
Waini i tshee masimuni a minḓirivhe yo vha i tshi langwa nga Zabudi wa Shefamu.
28Miri ya miolivi na mihuyu zwigodini yo vha i tshi langwa nga Baali Hanani wa Gedere.
Mapfura a miolivi o vha a tshi langwa nga Juashi.
29Masambi a kholomo dzi fulaho mudavhini wa Sharoni o vha a tshi langwa nga Shitirai wa Sharoni.
Masambi a kholomo dzi re magovhani o vha a tshi langwa nga Shafati ṅwana wa Adilai.
30Gamela dzo vha dzi tshi langwa nga Obili wa Muishmaele.
Donngi dzo vha dzi tshi langwa nga Jedaya wa Meronotho.
31Masambi a nngu o vha a tshi langwa nga Jazisi wa Muhagara.
Avho vho vha vhe vhone vhalangi vha thundu ya khosi Dafita.
Vhaeletshedzi vha Dafita
32Jonathani khotsimunene wa khosi Dafita, o vha e mueletshedzi a re na vhuṱali nahone e muḓivhi wa maṅwalo. Onoyo Jonathani na Jehiele ṅwana wa Hakhamoni vho vha vha tshi funza vhana vha khosi vha vhatuka. 33Mueletshedzi wa khosi o vha e Ahithofele, ngeno Hushai wa Muarakhi o vha e khonani ya khosi a dovha a vha mueletshedzi. 34Ahithofele o ri u fa, Jehoyada ṅwana wa Benaya na Abiathara vha vha vhaeletshedzi vhudzuloni hawe. Mulangammbi wa mmbi ya Dafita o vha e Juaba.
