1 KORONIKA 24

₁Ngezwi zwigwada zwa vha lutsinga lwa Aroni. Aroni o vha e na vhana vhaṋa, ndi Nadaba na Abihu na Eliasara na Ithamara. ₂Nadaba na Abihu vho fa khotsi avho a tshi kha ḓi tshila, nahone vho vha vha si na vhana vha vhatuka; vharathu vhavho Eliasara na Ithamara vha vha vhotshifhe. ₃Khosi Dafita a vhekanya vha lutsinga lwa Aroni nga zwigwada zwi tshi ya nga mishumo yavho, a zwi ita a tshi fariswa nga Tsadoko wa lutsinga lwa Eliasara na nga Ahimelekhe, wa lutsinga lwa Ithamara. ₄Vha lutsinga lwa Eliasara vho vhekanywa nga zwigwada zwa 16, ngeno vha lutsinga lwa Ithamara vho vhekanywa nga zwigwada zwiṱanu na zwiraru, hezwo zwo itwa nge ha vha hu na vhanna vhanzhi vhe vha vha vhe ṱhoho dza miṱa kha vha lutsinga lwa Eliasara. ₅Ho vha hu na vhakoma vha thembele, vha zwa Mudzimu, kha vha lutsinga lwa Eliasara khathihi na lwa Ithamara, ndi zwe vha kovhelwa mishumo nga u ita madeṅwa. ₆Vha lutsinga lwa Eliasara na lwa Ithamara vho vha vha tshi tou sielisana u ita madeṅwa, hu tshi khethwa zwigwada zwivhili zwa Eliasara na tshithihi tsha Ithamara, zwivhili zwa Eliasara na tshithihi tsha Eliasara, vha konou ṅwalwa nga Shemaya ṅwana wa Nathaniele, muṅwaleli wa Mulivi, khosi na magota ayo na tshifhe Tsadoko na Ahimelekhe ṅwana wa Abiathara na ṱhoho dza miṱa ya vhotshifhe, vhoṱhe vha vha dziṱhanzi.

_7-18Zwigwada zwavho zwo tevhekana nga nḓila hei vhó khethwa nga madeṅwa:

₁₉Vhanna avho vho ṅwalwa madzina avho zwi tshi tevhedza mishumo yavho musi vha tshi dzhena thembeleni ya Muṋe washu, hu tshi tevhedzwa ndayo dzo vhetshelwaho vhone nga makhulukuku wavho Aroni, nga he Muṋe washu Mudzimu wa Israele a mu laya.

₂₀Vhaṅwe ṱhoho dza miṱa vha lutsinga lwa Livi ngevha: Shubaele wa lutsinga lwa Amuramu na Jedia wa lutsinga lwa Shubaele ₂₁na Ishia wa lutsinga lwa Rehabia ₂₂na Shelomithi wa lutsinga lwa Izhara na Jahathi wa lutsinga lwa Shelomithi. ₂₃Vha lutsinga lwa Hebroni ndi vhaṋa, ndi Jeria na Amaria na Jehaziele na Jekamiamu, vha tshi tevhekana nga u bebwa havho. ₂₄Wa lutsinga lwa Uziele o vha e Mika, wa lutsinga lwa Mika o vha e Shamiri. ₂₅Murathu wa Mika o vha e Ishia, ṱhoho ya muṱa wa lutsinga lwa Ishia e Zakaria. ₂₆Vha lutsinga lwa Mirari ndi Mahali na Mushi vhaḓuhulu vha Jaasia. ₂₇Vhaṅwe vhana vha Jaasia ndi Shohamu na Zakhuru na Ibiri. ₂₈Mahali o vha e na vhana vhavhili, Eliasara na Kishi, hone Eliasara o vha a si na vhana vha vhatuka. ₂₉Kishi o vha e na ṅwana muthihi we a vha tshi pfi Jeramiele. ₃₀Mushi o vha e na vhana vhararu, ndi Mahali na Edere na Jeremotho.

Ndi vhone Vhalivi vha tshi ya nga miṱa yavho.

₃₁Ṱhoho ya muṱa muṅwe na muṅwe wa vharathu vhawe vho vha vha tshi ita madeṅwa a mishumo yavho, u ḓi nga mashaka avho vhotshifhe vha lutsinga lwa Aroni, vhe vha vha vha tshi ḓi ita nga u ralo, vha zwi ita vhe na khosi Dafita na Tsadoko na Ahimelekhe na ṱhoho dza miṱa ya vhotshifhe na ya Vhalivi.