1 KORONIKA 11

₁Vhaisraele vhoṱhe vha ya ha Dafita muḓini wa Hebroni vha swika vha mu vhudza vha ri, “Riṋe ri malofha mathihi na vhone. ₂Zwiḽa kale, na musi Saulo a tshi kha ḓi vha khosi, ndi vhone vhe vha vha vha tshi ranga Vhaisraele phanḓa vha tshi bva pfumo, nahone Muṋe washu Mudzimu wavho o vha vhudza a ri, ‘U ḓo lisa vhathu vhanga Vhaisraele, wa vha murangaphanḓa wavho.’ ”

₃Vhahulwane vhoṱhe vha Israele vho vha vho ya ha khosi Dafita muḓini wa Hebroni, ene a vhofha mulanga phanḓa ha Muṋe washu henefho Hebroni, vha ta Dafita a vha khosi ya Israele, nga he Muṋe washu a fulufhedzisa nga mulomo wa Samuele.

₄Khosi Dafita na Vhaisraele vhoṱhe vha bva vha ya muḓini wa Jerusalema (wo vha u tshi pfi Jebusi). Vhajebusi vhe vha vha vha tshi dzula henefho ₅vha vhudza Dafita vha ri, “Hafhano u nga si dzhene.” Hone Dafita a thuba dzhavhelo ḽa Tsioni, wone Muḓi wa Dafita. ₆Dafita o vha o ri, “Munna ane a ranga u vhulaha Mujebusi u ḓo vha mulangammbi muhulwane!” Juaba ṅwana wa Tseruya a vha ene wa u thoma u gonya hone, a vha ene mulangammbi. ₇Dafita a yo dzula dzhavheloni ḽeneḽo, ha vho pfi Muḓi wa Dafita. ₈Dafita a fhaṱa muḓi u mona naho, a thoma he shango ḽa linganela u swika nga mutsheṱo wo u tangedzaho, Juaba ene a vusa muḓi woṱhe wo salaho. ₉Maanḓa a Dafita a ḓi hula a tshi ya ngauri Muṋe washu Mulangazwoṱhe o vha e nae.

₁₀Dafita o vha e na vhahali vha bvumo. Vhenevho khathihi na Vhaisraele vhoṱhe, vho tikedza vhuhosi hawe ha khwaṱha, nga he Muṋe washu a vha o fulufhedzisa.

₁₁Asuyu mutevhe wa vhahali vha Dafita, ndi Jashobiamu wa mutupo wa Hakhimoni, ene o vha e ene murangaphanḓa wa vhahali vha 30 vho rangiwaho. O vhuya a lwa na vhanna vha 300 nga pfumo, a vha vhulaha vhoṱhe nndwani nthihi. ₁₂A mu tevhelaho o vha e Eliasara ṅwana wa Dodo, wa mutupo wa Ahoho, muṅwe wa Vhararu vha Bvumo. ₁₃O vha e na Dafita musi e Phasi Damimu zwiḽa Vhafilista vho kuvhangana henefho uri vha bve pfumo. Mmbi dza shavha Vhafilista fhethu he ha vha hu na tsimu ya baḽi. ₁₄Hone vhone vha imedzana navho vhukati ha tsimu. Vha i lwela, vha vhulaha Vhafilista, Muṋe washu a ita uri vha kunde zwihulu.

₁₅Muṅwe musi vhararu vha vhahulwane vha 30 vha ya tomboni he Dafita a vha a tshi dzula hone tsini ha bako ḽa Adulamu, tshigwada tsha Vhafilista tsho vha tsho ṱoka mishasha Govhani ḽa Refaimi. ₁₆Tshifhinga tshenetsho Dafita o vha e dzhavheloni, tshigwada tsha Vhafilista tshi Betlehema. ₁₇Dafita a pfa ḓora a ri, “Ngavhe muṅwe a tshi yo nkela maḓi a u nwa bidzini ḽi re tsini ha khoro ya Betlehema!” ₁₈Vhaḽa vhahali vha bvumo vhararu vha fuḓekanya vhukati ha mishasha ya Vhafilista vha fhira, vha yo ka maḓi afho bidzini ḽi re tsini ha khoro ya Betlehema, vha a hwala vha humela nao ha Dafita. Hone Dafita a hana u nwa ayo maḓi, a a shululela fhasi a vha nduvho i ṋekedzwaho Muṋe washu. ₁₉Dafita a ri, “Maḓi aya ndi nga si a nwe! Zwi nga ḓo nga ndi khou nwa malofha a avha vhanna vhe vha ḓifunga vha ṅaledza vhutshilo havho!” Dafita a si nwe ayo maḓi nge avho vhanna vha ḓifunga vha ṅaledza vhutshilo havho vha tshi yo a ka uri vha vhuye nao. Uho ndi hone vhuhali ha avho vhahali vhararu.

₂₀Abishai murathu wa Juaba o vha e ene muhulwane wa avho vhararu. O lwa na vhanna vha 300 nga pfumo ḽawe a vha vhulaha, ngauralo a vha na bvumo unga avho Vhararu. ₂₁Kha avho vhararu ndi ene we a vha e na bvumo ḽihulu, a vha ene mulangi wavho, naho o vha a sa swiki kha Vhararu vha Bvumo.

₂₂Benaya ṅwana wa Jehoyada wa Kabusiele o vha e muhali wa bvumo unga khotsi awe Jehoyada, o sumbedza vhuhali vhuhulu. O vhulaha vhahali vhavhili vha Muaba vhe vha vha vha tshi pfi “Ndau dza Muaba”. O vhuya a dzhena mulindini musi hu na gabugu a vhulaha ndau e eṱhe. ₂₃O vhuya a vhulaha muswonḓa wa Muegipita wa vhulapfu ha mitha mbili na hafu. Naho uyo Muegipita o vha o fara pfumo ḽihulu ḽi no nga luṱanga lwa muluki, Benaya a mu dzhena nga mugopi, a dzhavhulela uyo Muegipita pfumo, a mu vhulaha nga pfumo ḽawe. ₂₄Uho ndi hone vhuhali ha Benaya ṅwana wa Jehoyada, na ene o vha e na bvumo unga vhanna vhararu vha bvumo. ₂₅O vha a tshi huliswa zwihulu u fhira vhoṱhe vha 30, hone o vha a songo katelwa kha Vhararu vha Bvumo. Dafita a mu vhea uri a vhe ene mulangi wa vhalindi vhawe.

₂₆Vhanna vhaṅwe vha bvumo ndi Asaele murathu wa Juaba na Elihanani ṅwana wa Dodo wa Betlehema ₂₇na Shamotho wa Harodo na Helese wa Phelethe ₂₈na Ira ṅwana wa Ikeshe wa Thekua na Abiesere wa Anathotho ₂₉na Sibekhai wa Husha na Ilai wa Ahoho ₃₀na Maharai wa Netofa na Helede ṅwana wa Baana wa Netofa, ₃₁na Ithai ṅwana wa Ribai wa Gibia kha ḽa Benyamini, na Benaya wa Phirathoni ₃₂na Harai wa magovhani a Gaashi na Abiele wa Araba ₃₃na Asimavethe wa Bahurimu na Eliahaba wa Shaaliboni, ₃₄na vhana vha Hasheme wa Gizoni na Jonathani ṅwana wa Shagee wa Harare, ₃₅na Ahiamu ṅwana wa Sakhara wa Harare na Elifala ṅwana wa Uru, ₃₆na Hefere wa Mekhera na Ahia wa Pheloni ₃₇na Hetsiro wa Kharamele na Naarai ṅwana wa Ezibai, ₃₈na Juele murathu wa Nathani na Mibihare ṅwana wa Hagari ₃₉na Tseleke wa Amoni na Naharai wa Bierotho, muhwalazwihali wa Juaba ṅwana wa Tseruya, ₄₀na Ira wa Jathiri na Garebe wa Jathiri ₄₁na Uria wa Muhithi na Zabadi ṅwana wa Ahilai, ₄₂na Adina ṅwana wa Shisa wa tsinde ḽa Rubeni, we a vha e murangaphanḓa wa tsinde ḽa Rubeni, e na tshigwada tshawe tsha vhahali vha 30, ₄₃na Hanani ṅwana wa Maakha na Josafati wa Mithani ₄₄na Uzia wa Ashtharotho na Shama na Jeiele vhana vha Hothamu wa Aruere, ₄₅na Jediele na Joha vhana vha Shimiri vha Thitsi ₄₆na Eliele wa Mahava na Jeribai na Joshavia vhana vha Elinaamu na Ithima wa Muaba ₄₇na Eliele na Obede na Jaasiele vha Tsoba.