SAGARIA 7

₁E rile ka ngwaga wa bone wa kgosi Dario, ka kgwedi ya borobongwe e e bidiwang Khiselefe, ka letsatsi la bone, Lefoko la Morena la tlela Sagaria.

₂Ba Bethele ba ne ba romile Saresere le Regeme-Melege le banna ba gagwe go lopa bopelotlhomogi mo Moreneng, ₃le go botsa baperesiti ba Ntlo ya Morena wa masomosomo le baporofeti go re: “A re na le go lela mo kgweding ya botlhano le go ilela jaaka re setse re dirile ka dinyaga tse dintsintsi?”

₄Ke fa Lefoko la Morena wa masomosomo le ntlela le re: ₅“Raya morafe otlhe wa lefatshe le baperesiti o re: ‘A e rile fa lo ilela, lo hutsafala mo kgweding ya botlhano le ya bosupa ka dinyaga tse di 70, lwa bo lo ilela ka ntlha ya me? ₆Mme fa lo ja, fa lo nwa, a ga se lona ba lo jang, a ga se lona ba lo nwang?’ ”

₇A ga se mafoko a Morena o a begileng ka baporofeti ba pele, jale fa Jerusalema a sa ntse a tletse batho, a bile a le mo kagisong mmogo le metse e e mo tikologong ya gagwe, fa naga ya borwa le e e kwa tlase e sa ntse e na le batho?

₈Mme Lefoko la Morena la tlela Sagaria la re: ₉“Morena wa masomosomo o buile jaana a re: ‘Atlholang ka katlholo ya tshiamo, lo direlane ka lorato le kutlwelo-botlhoko. ₁₀Lo se ka lwa gatelela motlholagadi gongwe khutsana gongwe moeng gongwe mohumanegi; lo se ka lwa logelana maano a a bosula mo dipelong tsa lona.’

₁₁“Mme ba ganne go reetsa, ba gagamatsa melala, ba ithiba ditsebe gore ba se ka ba utlwa. ₁₂Ba thatafaditse dipelo tsa bone jaaka taemane gore ba se ka ba utlwa molao le mafoko a Morena wa masomosomo o a ba rometseng ka Mowa wa gagwe ka baporofeti ba pele. Ke ka moo go duleng bogale jo bogolo mo go Morena wa masomosomo. ₁₃Mme go dirafetse jaana: E rile fa Morena a ba bitsa, ba gana go mo utlwa; le nna e rile ba mpitsa, ka gana go ba utlwa,” go buile Morena wa masomosomo. ₁₄“Mme ka ba falaletsa kwa ditšhabeng tsotlhe tse ba neng ba sa di itse jaaka ka ledimo, lefatshe la sala le fetotswe sekaka kwa morago ga bona, go se yo o tsamayang le yo o boang. Lefatshe le lentlentle ba le fetotse sekaka ka go dira jalo.”