SAGARIA 3

₁Jaanong a mpontsha Jošua, moperesiti yo mogolo, a eme fa pele ga moengele wa Morena, le Satane a eme ka fa letsogong le le jang la gagwe go mmaya molato. ₂Mme moengele wa Morena a raya Satane a re: “A Morena a go kgalemele, wena Satane! Ee, Morena yo o itlhophetseng Jerusalema a a go kgalemele! Yoo a ga se motswaiso o o swatotsweng mo molelong?”

₃Mme Jošua a bo a apere diaparo tse di maswe a ntse a eme fa pele ga moengele, ₄mme moengele a fetola, a raya ba ba emeng fa pele ga gagwe a re: “Mo apoleng diaparo tse di maswe!” A ba a mo raya a re: “Bona, ke tlositse molato wa gago mo go wena, ke go apesa diaparo tsa moletlo.”

₅Mme ka re: “A ba mo rwese tlhoro ya boperesiti e e phepa mo tlhogong!” Ke fa ba mo rwesa tlhoro e e phepa me tlhogong, ba mo apesa diaparo, moengele wa Morena a ntse a eme gona.

₆Mme moengele wa Morena a tiisetsa Jošua a re: ₇“Morena wa masomosomo o bua jaana a re: ‘Fa o sepela mo ditseleng tsa me, fa o boloka thulaganyo ya me, o tla nna mookamedi mo Ntlong ya me; le gona o tla disa malapa a me, mme ke tla go naya tetlelelo ya go ka tsamaya mo go bone ba ba emeng fa. ₈A ko o utlwe, Jošua, moperesiti yo mogolo, wena le baperesiti ka wena ba ba ntseng fa pele ga gago; gonne bone ke banna ba sesupo se se gakgamatsang; gobane bonang, ke tla tlisa Letlhogela, motlhanka wa me. ₉Ee, bonang lentswe le ke le beileng fa pele ga Jošua; mo lentsweng le le lengwe le go na le matlho a supa; bonang, ke tla gwaya mafoko mo go lone,’ go bua Morena wa masomosomo. ‘Ke tlosa molato wa lefatshe le ka letsatsi le le lengwe fela.’ ₁₀Morena wa masomosomo o bua a re: ‘Ka letsatsi leo lo tla laletsanya fa tlase ga setlhare sa moweine le fa tlase ga setlhare sa feie.’ ”