SAGARIA 12

₁Taelo ya Modimo. Lefoko la Morena ka ga Iseraele. Go buile Morena yo o phuthololang legodimo, yo o thayang motheo wa lefatshe, yo o bopang mowa wa motho mo teng ga gagwe a re: ₂“Bonang, ke tla dira Jerusalema senwelo se se theekedisang merafe yotlhe e e mo tikologong; go lebile Juta le ene, fa Jerusalema a dikanyediwa ke ntwa. ₃Ka letsatsi leo ke tla dira Jerusalema lentswe le le bokete thata mo merafeng yotlhe; mongwe le mongwe yo o reng, o a le kuka, o tla ikhutla ka lone mo go botlhoko. Mme ditšhaba tsotlhe tsa lefatshe di tla phuthega go mo tlhasela.” ₄Morena a re: “Ka letsatsi leo ke tla itaya dipitse tsotlhe ka letshogo, ke betsa bapalami ba tsona ka botsenwa; mme ke tla bo ke budulogetse Bajuta matlho, mme dipitse tsotlhe tsa merafe ke tla di betsa ka bofofu. ₅Dikgosana tsa Juta di tla bua mo pelong tsa tsona di re: ‘Baagi ba Jerusalema ke nonotsho ya rona ka Morena wa masomosomo, Modimo wa bone.’

₆“Ka letsatsi leo ke tla dira dikgosana tsa Juta jaaka lengetana le le tshotseng molelo le le mo dikgonnye, le jaaka serumola se se tukang se se mo dingateng tsa korong; di tla nyeletsa merafe yotlhe tikologong mo ntlheng ya le le jang le mo go ya la molema; mme ba Jerusalema ba tla sala ba agile mo felong ga bone mo Jerusalema.”

₇Mme Morena o tla thusa maobo a Juta pele, e se re gongwe tumiso ya ba ntlo ya ga Dafita le tumiso ya baagi ba Jerusalema ya gaisa ya Juta. ₈Ka letsatsi leo Morena o tla sireletsa baagi ba Jerusalema mo ntlheng tsotlhe; yo o bokoa mo go bone ka letsatsi leo o tla nna thata jaaka Dafita, mme ba ntlo ya ga Dafita ba tla nna jaaka baengele ba ba kwa legodimong le jaaka moengele wa Morena yo o fa pele ga bone.

₉“Ka letsatsi leo ke tla batla go nyeletsa ditšhaba tsotlhe tse di tlileng go tlhasela Jerusalema. ₁₀Mme Mowa wa kutlwelo-botlhoko le wa go rapelela boitshwarelo ke tla o tshela mo go ba ntlo ya ga Dafita le mo baaging ba Jerusalema, mme ba tla nteba ke le yo ba mo tlhabileng; ba tla mo hutsafalela jaaka go hutsafalelwa loso lwa ngwana yo o esi; ba tla mo lelela ka bogalaka jaaka ngwana yo o tsetsweng pele a lelelwa. ₁₁Ka letsatsi leo go tla nna selelo se segolo (sa loso) mo Jerusalema jaaka selelo sa kwa Hataterimone mo leboeng la Megito. ₁₂Lefatshe le tla hutsafala, losika longwe le longwe lo tla lela ka bolone, losika lwa ba ntlo ya Dafita ka bolone, le basadi ba bone ka bobone, losika lwa ba ntlo ya Nathane ka bolone, le basadi ba bone ka bobone, ₁₃losika lwa ba ntlo ya Lefi ka bolone, le basadi ba bone ka bobone, losika lwa Simei ka bolone, le basadi ba bone ka bobone, ₁₄ditshika tsotlhe tse di setseng, losika longwe le longwe ka bolone, le basadi ba bone ka bobone.