BAROMA 16

₁Ke lo laela Febe, kgaitsadia-rona, yo e leng modiredi wa phuthego ya kwa Kenegerea, ₂gore lo mo tshole mo Moreneng jaaka go tshwanetse baitshepi, le go mo thusa ka fa a batlang thuso ya lona ka teng; gonne le ene e ne e le mothusi wa ba bantsi le wa me ka nosi.

₃Dumedisang Perisila le Akwila, bathusi ba me mo go Keresete Jesu, ₄ba ba femetseng botshelo jwa me ka dithamo tsa bone, ba ke ba lebogang, mme e seng nna fela; e bile ba lebogwa ke diphuthego tsotlhe tse di tswang mo baheitaneng. ₅Dumedisang le phuthego e e kgobokanelang mo ntlong ya bone.

Dumedisang Epeneto, moratwi wa me, yo e leng ene wa ntlha yo o ineetseng Keresete kwa Asia. ₆Dumedisang Maria yo o itapisitseng gagolo ka ntlha ya rona. ₇Dumedisang Anteroniko le Junia, ba setšhaba sa ga etsho, ba ba neng ba tshwerwe mmogo le nna, ba ba tumileng mo baapostolong, ba ba bileng ba ineetse Keresete pele ga me.

₈Dumedisang Ampelea, moratwi wa me mo Moreneng. ₉Dumedisang Urubano, mothusi wa rona mo go Keresete, le Setagi, moratwi wa me. ₁₀Dumedisang Apele yo o ikanyegang mo go Keresete. Dumedisang bakaulengwe mo go ba ga Arisetobulo. ₁₁Dumedisang Herodione wa setšhaba sa ga etsho. Dumedisang ba e leng ba Morena mo go ba ga Narekiso.

₁₂Dumedisang Terefina le Terefosa, basadi ba ba direlang Morena. Dumedisang Peresise yo o rategang, mosadi yo o diretseng Morena thata. ₁₃Dumedisang Rufo, motlhaolwi wa Morena, le mmaagwe yo le nna e leng mme. ₁₄Dumedisang Asinkerito le Felegone le Hereme le Pateroba le Herema le bakaulengwe ba ba nang nabo. ₁₅Dumedisang Filologo le Julia le Nereo le kgaitsadie le Olempa le baitshepi botlhe ba ba nang nabo.

₁₆Dumedisanyang ka katlo e e boitshepo. Diphuthego tsotlhe tsa ga Keresete di a lo dumedisa.

₁₇Mme jaanong, bakaulengwe, ke lo rapela gore lo ele bone tlhoko ba ba tsosang dikgaogano le dikgopiso kgatlhanong le thuto e lo e ithutileng mo go rona, lo ba efoge. ₁₈Gonne ba ba ntseng jalo ga ba direle Keresete Morena wa rona, mme ba direla dimpa tsa bone; dipelo tsa ba ba sa sekasekeng ba di tsietsa ka mafoko a a borethe le ka dipuo tse dintle. ₁₉Kana kutlo ya lona e itsegile mo go botlhe. Ka moo ke a lo itumelela, ke bile ke eletsa gore lo tlhalefele molemo; mme lo sisimoge bosula. ₂₀Modimo wa kagiso o tla gatelela Satane ka bonako fa tlase ga dinao tsa lona.

A bopelotlhomogi jwa Morena wa rona Jesu bo nne le lona!

₂₁Timotheo, mothusi wa me, le Lukio le Jasone le Sosipatere, ba setšhaba sa ga etsho, ba a lo dumedisa.

₂₂Nna, ke le Teretio, mokwadi wa lokwalo lo, ke lo dumedisa mo Moreneng.

₂₃Gayo yo ke nnang mo ntlong ya gagwe, yo o tsholang phuthego yotlhe, o a lo dumedisa. Eraseto, motsholamadi wa motse, le Kwarato, mokaulengwe, ba a lo dumedisa. ₂₄A bopelotlhomogi jwa Morena wa rona Jesu Keresete bo nne le lona lotlhe! Amen.

₂₅Ona o o nonofileng go ka lo tiisa ka fa Efangeleng ya me, le ka fa therong ka ga Jesu Keresete, ka fa ponatshegong ya bosaitsiweng jo bo neng bo subilwe go tswa bosasimologeng, ₂₆jo jaanong bo senotsweng ka dikwalo tsa baporofeti, jwa itsisiwa merafe yotlhe ka fa taolong ya Modimo o o sa khutleng gore e ineele mo kutlong ya tumelo; ₂₇ona Modimo o o leng botlhale o le osi, a kgalalelo e nne ya ona ka Jesu Keresete ka bosakhutleng! Amen.