BAROMA 12

₁Jaanong, ba ga etsho, ke a lo kgothatsa, ka re na le kutlwelo-botlhoko ya Modimo, gore lo neele Modimo mebele ya lona go nna setlhabelo se se tshelang, se se boitshepo, se se o kgatlhang; ke yona tirelo-Modimo ya lona e e lebanyeng. ₂Lo se ka lwa tshwana le lefatshe leno, mme fetogang ka go ntšhwafadiwa maikutlo, gore lo tlhotlhomise se e leng thato ya Modimo e e molemo, e e kgatlhang, e e botlalo.

₃Gonne ke raya mongwe le mongwe wa lona ka bopelotlhomogi jo ke bo neilweng ka re: A a se ikaye mogolo go feta tshwanelo ya go ikaya, mme a a akanye go nna tekano ka fa tumelong e Modimo o e lekanyeditseng mongwe le mongwe. ₄Kana re na le ditokololo tse dintsi mo mmeleng o le mongwe fela, mme ditokololo tsotlhe ga di dire tiro e le nngwe fela, ₅rona re mmele o le mongwe jalo mo go Keresete, le fa re le bantsi, mme rotlhe re direlana re le ditokololo. ₆Jaanong re na le dineo tse di farologanyeng ka fa bopelotlhomoging jo re bo neilweng: Yo o nonotshitsweng go rera a a go dirise ka go utlwana le tumelo; ₇yo o direlang a a tlhokomele tirelo; yo o rutang a a tlhokomele go ruta; ₈yo o kgothatsang a a tlhokomele go kgothatsa; yo o atswang a a atswe ka pelo e tshweu; yo o gogang phuthego a a dire ka tlhoafalo; yo o dirang tsa kutlwelo-botlhoko a a dire a thabile.

₉A lorato e nne lo lo sa itimokanyeng; ilang bosula, kgomarelang molemo. ₁₀Mo loratong lwa bakaulengwe lo ratane ka pelo yotlhe; gaisanyang ka go tlotlana. ₁₁Se lapeng mo tlhoafalong, lo tuke mo moweng, lo direle Morena. ₁₂Itumeleng mo tsholofelong; itshokeleng tlalelo; tswelelang mo thapelong. ₁₃Abelang baitshepi ba ba tlhokang; itlwaetseng go tshola baeng.

₁₄Tshegofatsang ba ba lo bogisang; tshegofatsang, mme lo se ka lwa hutsa. ₁₅Itumeleng le ba ba itumelang, lo lele le ba ba lelang. ₁₆Nnang bopelonngwe fela. Se batleng dilo tse dikgolo, mme tsalanang le ba ba kwa tlase. Lo se ikaye botlhale ka losi.

₁₇Se busoloseng bosula jwa ga ope ka bosula; gopolang tse di molemo mo bathong botlhe. ₁₈Fa go kgonega ka fa thateng ya lona, agisanyang le batho botlhe. ₁₉Baratwi, lo se ka lwa ipusolosetsa, mme sutelang bogale jwa Modimo; gonne go kwadilwe ga twe: “Pusoloso ke ya me, nna ke tla busolosa, go bua Morena.” ₂₀“Jesa mmaba wa gago, fa a tshwerwe ke tlala; mo nose, fa a nyorilwe; gonne ka go dira jalo o tla tlhatlaganya magala a molelo mo tlhogong ya gagwe.” ₂₁O se ka wa fenngwa ke bosula, mme fenya bosula ka molemo.