TSHENOLO 21

₁Jaanong ka bona legodimo le lešwa le lefatshe le lešwa gonne legodimo la ntlha le lefatshe la ntlha di fetile, le lewatle ga le tlhole le le teng. ₂Ka ba ka bona motse o o boitshepo wa Jerusalema o mošwa o fologa kwa legodimong, o tswa kwa Modimong, o etleetsegile jaaka monyalwi yo o kgabetseng monna wa gagwe. ₃Jaanong ka utlwa lentswe le legolo le tswa sedulong sa bogosi le re: “Bona, boago jwa Modimo bo mo bathong! O tla aga nabo; bona ba tla nna batho ba one; mme Modimo ka osi o tla nna nabo. ₄Modimo o tla phimola dikeledi tsotlhe mo matlhong a bone; loso ga lo ne lo tlhola lo nna teng, le bohutsana le selelo le botlhoko ga di ne di tlhola di nna teng; gonne dilo tsa ntlha di fetile.”

₅Yo o ntseng mo sedulong a bua a re: “Bona, dilo tsotlhe ke a di ntšhwafatsa!” Gape a re: “Kwala! Gonne mafoko ao ke a boikanyo le boammaaruri.” ₆A ba a nthaya a re: “Go dirafetse. Ke nna Alefa le Omega, tshimologo le bokhutlo. Yo o nyorilweng ke tla mo nosa mo motsweding wa metsi a botshelo, e se ka sepe. ₇Yo o fenyang o tla rua dilo tseo; ke tla nna Modimo wa gagwe, mme o tla nna morwaake. ₈Mme fa e le ba ba boi le ba ba sa dumeleng le ba ba maswe le babolai le diaka le baloi le ba ba direlang medimo e sele le baaki botlhe, bone kabelo ya bone e mo letsheng le le tukang molelo le sebabole; gona moo ke loso lwa bobedi.”

₉Jaanong ga tla moengele mongwe wa ba supa ba ba neng ba tshotse megotšwana e supa e e tletseng dipetso tse supa tsa bofelo; a bua le nna a re: “Tlaya ke go bontshe monyalwi, mosadi wa Kwana.” ₁₀A ba a nkisa kwa thabeng e kgolo e e godimo, ke le mo moweng, a mpontsha motse o mogolo o o boitshepo wa Jerusalema, o fologa kwa legodimong, o tswa kwa Modimong, ₁₁o na le kgalalelo ya Modimo. Phatsimo ya ona e tshwana le ya lentswe le le tlhokegang thata thata, jaaka letlapa la jasepise le le lesweu jaaka legakwa. ₁₂O na le lobota lo logolo lo lo godimo, o na le dikgoro di le 12 le baengele ba le 12 mo godimo ga dikgoro, mme go kwadilwe maina mo go tsona a e leng a ditso di le 12 tsa bomorwa Iseraele; ₁₃mo ntlheng ya botlhabatsatsi go na le dikgoro di le tharo, mo ntlheng ya bokone go na le dikgoro di le tharo, mo ntlheng ya borwa go na le dikgoro di le tharo, mo ntlheng ya bophirimatsatsi go na le dikgoro di le tharo. ₁₄Lobota lwa motse lo na le matlapa a motheo a le 12, mo go ona go gwailwe maina a le 12 a baapostolo ba ba 12 ba Kwana.

₁₅Yo o neng a bua le nna a bo a na le selekanyo sa lotlhaka lwa gouta gore a lekanye motse le dikgoro tsa ona le lobota lwa ona. ₁₆Motse wa bo o agilwe, o lebile kwa ntlheng di le nne, boleele jwa ona bo lekana le boatlhamo. A lekanya motse ka lotlhaka, wa fitlhelwa o le distadia di le 12 000; fa e le boleele le boatlhamo le bogodimo jwa ona, tsa bo di lekalekana. ₁₇Jaanong a lekanya lobota lwa ona, lwa fitlhelwa lo na le selekanyo sa mabogo a le 144 ka fa selekanyong sa motho se se lekanang le sa moengele. ₁₈Lobota lwa ona lwa bo lo agilwe ka jasepise; mme motse e le wa gouta e e sa pekwang e e tshwanang le galase e e phepa. ₁₉Matlapa a motheo wa lobota lwa motse a kgabisitswe ka mefutafuta ya majwana a a tlhokegang: Letlapa la ntlha la motheo ke jasepise; la bobedi ke safire; la boraro ke galesetone; la bone ke semarage; ₂₀la botlhano ke saredonikese; la borataro ke kareneole; la bosupa ke kerisolite; la borobedi ke berile; la borobongwe ke topase; la some ke kerisoperase; la some nngwe ke hiasinte; la some pedi ke amethisete. ₂₁Dikgoro tse di 12 ke ditalama di le 12, kgoro nngwe le nngwe ke talama e le nngwe. Mmila wa motse ona ke gouta e e sa pekwang jaaka galase e e galalelang. ₂₂Mme ga ke a ka ka bona Tempele mo go ona; gonne Tempele ya ona ke Morena, Modimo, Mothatayotlhe le Kwana. ₂₃Ga go batlege gore letsatsi le ngwedi di phatsimele motse; ka gonne o bonesiwa ke kgalalelo ya Modimo; Kwana ke lobone lwa ona. ₂₄Merafe e tla tsamaya mo leseding la ona, dikgosi tsa lefatshe di isa kgalalelo ya tsona kwa go ona. ₂₅Dikgoro tsa ona ga di ne di tswalwa motshegare motlha ope, gonne bosigo ga bo nke bo nna teng koo. ₂₆Ba tla isa kgalalelo le tlotlo ya merafe kwa go ona. ₂₇Ga go ne go tsena sepe se se itshekologileng mo go ona, le fa e le yo o dirang makgapha, le fa e le moaki, fa e se fela ba ba kwadilweng mo lokwalong lwa botshelo lwa Kwana.