TSHENOLO 15

₁Jaanong ka bona sesupo se sengwe mo legodimong se segolo se se gakgamatsang: ka bona baengele ba supa, ba tshotse dipetso di supa tsa bofelo; ka gonne bogale jwa Modimo bo fediwa ka tsona.

₂Ka ba ka bona sengwe, e kete lewatle la galase le le tlhakanyeng le molelo, le ba ba fentseng sebata le setshwantsho sa sona le palo ya leina la sona ba eme fa lewatleng la galase, ba tshotse diharepa tsa go baka Modimo. ₃Ba opela sefela sa ga Moše, motlhanka wa Modimo, le sefela sa Kwana ba re:

₅Morago ga dilo tseo ka bona Tempele ya motlaagana wa tshupo mo legodimong e bulwa. ₆Baengele ba supa ba ba tshotseng dipetso tse di supang ba tswa mo Tempeleng ba apere masela a a phepa a a phatsimang, ba itlamile dihuba ka meitlamo ya gouta. ₇Sengwe sa diphedi tse nne sa neela baengele ba supa megotšwana e supa ya gouta, e tletse bogale jwa Modimo o o tshelang go ya bosakhutleng. ₈Tempele ya tlala musi o o tswang mo kgalalelong ya Modimo le mo thateng ya ona, mme ga bo go se ope yo o ka tsenang mo Tempeleng, dipetso di supa tsa baengele ba supa di ise di wediwe.