Phemelo ya Iseraele

125¹Sefela sa go ya Tempeleng.

Ba ba ikanyang Morena,

ba tshwana le thaba ya Sione

e e sa reketleng,

e e tlhomameng ka bosakhutleng.

²Jerusalema o dikanyeditswe

ke dithaba;

Morena o dikanyeditse

batho ba gagwe jalo

go tloga jaanong

le go ya bosakhutleng.

³Gonne thobane

ya bogosi ya boikepo

ga e kitla e nna

mo kabelong ya basiami,

gore basiami ba se ka ba otlololela

diatla kwa bosuleng.

⁴Morena, bona ba ba molemo

le ba ba dipelo tsa nnete

o ba direle molemo.

⁵Mme ba ba fapogelang

mo ditseleng tse di kgopo tsa bona,

Morena o tla ba lesa

go ya tatlhegong

mmogo le ba ba dirang boikepo.

A kagiso e nne le Iseraele!

Peo ya dikeledi le thobo ya boitumelo

126¹Sefela sa go ya Tempeleng.

E rile Morena a fetola

tatlhego ya Sione,

ra tshwana le ba ba lorang.

²Foo melomo ya rona

e ne ya tlala setshego,

le diteme tsa rona tuduetso.

Foo go ne go buiwa mo ditšhabeng

go twe:

“Morena o ba diretse

dilo tse dikgolo.”

³Morena o re diretse

dilo tse dikgolo, ra itumela.

⁴Morena, fetola tatlhego ya rona

jaaka dinokana tsa kwa borwa.

⁵Ba ba jwalang ka dikeledi,

ba tla roba ka tuduetso.

⁶Ba a tle ba ye ba gase peo

ba ntse ba lela,

mme ba boe ka tuduetso

ba tshotse dingata tsa bona.

Ntle ga tshegofatso ya Morena tsotlhe di lefelafela

127¹Sefela sa go ya Tempeleng sa ga Salomo.

Fa Morena a sa age ntlo,

baagi ba yona

ba tla bo ba itapisetsa lefela;

fa Morena a sa dise motse,

modisa o tla bo

a itlhobaeletsa lefela.

²Ke lefela, fa lo tsoga phakela,

lo itima boikhutso,

lo ja dijo tsa matsapa;

gonne Morena

o tla naya baratwi ba gagwe

ba ntse ba robetse.

³Bona, basimane

ke neo ya Morena;

leungo la sebopelo ke tuelo.

⁴Basimane ba bošwa jwa motho

ba tshwana le metsu

mo seatleng sa mogale.

⁵Go sego monna yo o e tladitseng

mokotlopo wa gagwe;

ga a nke a tlhajwa ke ditlhong,

fa a bua le baba ba gagwe

mo kgotleng.