OBATYA 1

Morongwi o romilwe

kwa ditšhabeng a re:

“Nanogang, a re bololeng

go tlhabana nae!”

₂“Bona, ke go dirile yo monnye

mo ditšhabeng,

o a nyatsega thata.

₃Boikgogomoso jwa pelo ya gago

bo go tsieditse,

wena yo o agileng mo dikgageng

tsa mafika,

yo o nnang mo mafelong

a a kwa godimo,

yo o buang mo pelong ya gago

o re: ‘Ke mang

yo o ka ntigelang fa fatshe?’

₄Le fa o dira sentlhaga sa gago

kwa godimodimo jaaka ntsu;

le fa e le se se tlhomilweng

mo gare ga dinaledi,

ke tla go folosa teng,”

go bua Morena.

₅“Fa magodu a tla kwa go wena,

le fa e le dinokwane bosigo

– kana o nyalediwa jang! –

ga ke re, ba tla utswa

ka fa go ba lekanyeng ka teng?

Fa bafudi ba maungo a moweine

ba tla kwa go wena, ga ke re,

ba tla tlogela maronopo?

₆Kana ba fukutsa Esau jang,

ba batla mahumo a gagwe

a a fitlhilweng!

₇Banna botlhe

ba ba ikopantseng nao

ba go buseditse

kwa molelwaneng;

banna ba o tsalanyeng nabo

ba go tsieditse,

ba go gatelela,

ba go beela seru fa tlase ga gago

boemong jwa go go naya

dijo tsa gago.

Mme Esau ga a lemoge sepe.

₈“A ga nkitla ke fedisa matlhale

mo go Etomo

le tlhaloganyo mo dithabeng

tsa ga Esau ka letsatsi leo?”

go botsa Morena.

₉“Wena motse wa Themane,

bagale ba gago

ba tla bo ba nyemile moko

gore mongwe le mongwe

a bolawe

mo dithabeng tsa ga Esau

ka polao e e setlhogo.

₁₀“Ditlhong di tla go khurumetsa,

o nyelediwa ka go sa feleng

ka ntlha ya go gatelela

Jakobe monnao.

₁₁E rile ka letsatsi lele,

fa o ne o eme kwa thoko;

ka letsatsi lele, fa baeng

ba ne ba tlosa batlhabani ba gagwe

e le batshwarwi;

fa ba ditšhaba di sele

ba ne ba tsena

mo dikgorong tsa gagwe,

ba tlhamela Jerusalema tengwa,

le wena wa bo o le jaaka

mongwe wa bone.

₁₂Kana o ne o sa tshwanela

go leba letsatsi la tatlhego

ya ga monnao ka boitumelo;

o ne o sa tshwanela go itumela

ka letsatsi la nyelelo

ya bana ba Juta;

o ne o sa tshwanela go ikgantsha

ka letsatsi la pitlagano.

₁₃O ne o sa tshwanela go tsena

mo kgorong ya morafe wa me

ka letsatsi le ba neng

ba le mo bothateng ka lone;

wena o ne o sa tshwanela go leba

botlhoko jo bo ba dirafalelang

ka kgatlhego

ka letsatsi la tlalelo ya bone;

o ne o sa tshwanela go thopa

lehumo la bone ka letsatsi

la tlalelo ya bona.

₁₄O ne o sa tshwanela go ema,

fa ditsela di kgabaganyang teng

go bolaya ba ba falotseng

ba bone;

o ne o sa tshwanela go neela

baba bafalodi ba bone

ka letsatsi la pitlagano.

₁₅“Gonne letsatsi la Morena la go

atlhola ditšhaba tsotlhe le gaufi:

O tla direlwa jaaka o dirile,

tiro ya gago e tla boela

mo tlhogong ya gago.

₁₆Gonne ditšhaba tsotlhe

di tla nwa ka gale,

jaaka lo nwele mo thabeng

e e boitshepo ya me;

di tla nwa,

di minolosa

gore di be di nne jaaka ekete

ga di ise di ke di nne teng.

₁₇“Mme mo thabeng ya Sione

go tla nna pholoso,

Sione e tla nna

felo fa go boitshepo,

mme ba ntlo ya Jakobe

ba tla rua boswa jwa bone.

₁₈Foo ba ntlo ya Jakobe

ba tla nna molelo,

ba ntlo ya Josefa ba nne kgabo,

mme ba ntlo ya Esau

ba tla nna dirite:

Ba tla tshujwa, ba jewa ka bone,

go se ke go nne masalela

a ba ntlo ya Esau,”

gonne Morena o buile jalo.

₁₉“Ba ntlheng ya borwa

ba tla rua dithaba tsa Esau,

ba naga e e kwa tlase

ba rua naga ya Bafelesita;

ba ba mo dithabeng ba tla rua

naga ya Eferaime le ya Samaria,

Babenyamene ba rua Gileate.

₂₀Mme batshwarwi ba mophato

o wa Baiseraele

ba tla thopa naga ya Bakanana

go fitlha kwa Sarefathe;

batshwarwi ba Jerusalema

ba ba kwa Sefarada,

ba tla rua metse e e kwa borwa.

₂₁Mme bapholosi ba tla tlhatlogela

mo thabeng ya Sione,

gore ba buse dithaba tsa Esau,

mme bogosi e tla nna

jwa Morena.”