MAREKO 6

₁Jesu a tloga teng, a ya kwa motseng wa ga gabo; barutwa ba gagwe ba mo sala morago. ₂E rile ka Sabata a simolola go ruta mo senagogeng; mme ba le bantsi, ya re ba utlwa, ba gakgamala ba re: “Yo, dilo tseo o di tsere kae, le botlhale jo o bo neilweng ke jo bo ntseng jang? Kana ditiro tsa thata tse a di dirang ka diatla tsa gagwe di kana kang! ₃A yo ga se ene mmetli, morwa Maria, mogoloa boJakobo le Josefa le Juta le Simone? Le bokgaitsadie a ga ba nne le rona mono?” Ba be ba kgopisega ka ga gagwe.

₄Jesu a ba raya a re: “Moporofeti ga a nke a nyatsega gope, fa e se mo lefatsheng la ga gabo le mo lapeng la ga gabo.”

₅Mme a palelwa ke go dira tiro ya kgakgamatso teng, fa e se go baya balwetse ba se kae diatla le go ba fodisa. ₆A gakgamalela go sa dumeleng ga bone. Jaanong a ralala metsana e e mo tikologong, a ntse a ruta.

₇Ya baa gona a ipiletsang ba ba 12, a simolola go ba roma ka bobedi le bobedi, a ba naya thata mo meweng e e itshekologileng. ₈A ba laela gore ba se ka ba tseela leeto sepe, fa e se tsamma fela; e seng senkgwe, le fa e le kgwatlha, le fa e le madi mo moitlamong. ₉Ba rwale ditlhako, mme ba se ka ba apara dikobo di le pedi. ₁₀A ba raya a re: “Gongwe le gongwe kwa lo tsenang mo ntlong teng, lo nne gona go tsamae lo tloge teng. ₁₁Mme gongwe le gongwe kwa lo sa tsholweng teng, ba sa lo utlwe, e re lo tswa teng, lo itlhotlhore lorole lo lo fa tlase ga dinao tsa lona, go nna tshupo mo go bone.”

₁₂Ba bolola, ba rera gore batho ba tlhabologe. ₁₃Ba kgarameletsa medemone e mentsi ntle, ba tshasa balwetse ba bantsi lookwane, ba ba fodisa.

₁₄Kgosi Herote a utlwa ka ga Jesu; gonne leina la gagwe le ne le itsege. Mme a re: “Johane Mokolobetsi o tsogile mo baswing, ke ka moo dithata di itshupang mo go ene.”

₁₅Ba bangwe ba re: “Ke Elia.” Ba bangwe ba re: “Ke moporofeti jaaka mongwe wa baporofeti.”

₁₆Mme Herote, ya re a utlwa, a re: “Ke ene Johane yo ke mo kgaotseng tlhogo; o tsogile.” ₁₇Herote o ne a romile go tshwara Johane, a mo golega mo ntlong ya kgolegelo ka ntlha ya ga Herodia, mosadi wa ga Filipo morwa-rraagwe; ka gonne o ne a mo nyetse. ₁₈Gonne Johane o ne a reile Herote a re: “Ga o a letlelelwa go nna le mosadi wa ga morwa-rraago.”

₁₉Mme Herodia a mo tlhoa, a batla go mmolaya, mme a palelwa; ₂₀gonne Herote o ne a boifa Johane, ka a itse gore ke monna yo o siameng, yo o boitshepo; a ba a mo sireletsa. E ne ya re fa a mo utlwa, a akabale thata, mme a rate go mo utlwa.

₂₁E rile go tla letsatsi le le lebanyeng, e leng la botsalo jwa ga Herote, le a direlang dikgosana tsa gagwe le balaodi-ba-sekete le batlotlegi ba Galelea moletlo ka lone, ₂₂morwadia Herodia a tsena, a bina, a kgatlha Herote le ba ba ntseng nae fa dijong. Mme kgosi ya raya morweetsana ya re: “Nkopa se o se ratang, le fa e ka nna eng, ke tla se go naya.” ₂₃A ba a mo ikanela a re: “Se o tla se nkopang ke tla se go naya, le fa e ka nna bontlhanngwe jwa puso ya me.”

₂₄Mosetsana a tswa, a botsa mmaagwe a re: “Nka kopang?”

Ene a re: “Tlhogo ya ga Johane Mokolobetsi.”

₂₅A tsena ka bonako, a itlhaganelela kwa kgosing, a kopa a re: “Ke rata gore o nnee tlhogo ya ga Johane Mokolobetsi e sa le jaanong ka mogopo.”

₂₆Kgosi ya hutsafala thata, mme ka ntlha ya maikano le ka ntlha ya ba ba ntseng nayo fa dijong ya se ka ya rata go gana kopo ya gagwe. ₂₇Kgosi ya akofa ya roma motlhabani, ya laola gore a tsise tlhogo ya gagwe; a ya, a mo kgaola tlhogo mo ntlong ya kgolegelo, ₂₈a e tlisa ka mogopo, a e naya morweetsana, mme morweetsana a e naya mmaagwe. ₂₉Ya re barutwa ba gagwe ba utlwa, ba tla ba tsaya serepa sa gagwe, ba ya go se fitlha mo lebitleng.

₃₀Jaanong baapostolo ba phuthegela kwa go Jesu, ba mmolelela tsotlhe tse ba di dirileng le tse ba di rutileng. ₃₁Mme a ba raya a re: “Tlaang lona lo le losi, a re yeng kwa felong fa go senya, lo ikhutse go le gonnye.” A re jalo ka gonne go ne go le ba bantsi ba ba tlang le ba ba tlogang, e bile ba se na sebaka, le fa e le sa go ja. ₃₂Ke fa ba tloga ka mokoro, ba ya kwa thoko kwa felong gongwe fa go senya.

₃₃Mme ba bantsi ba ba bona ba tsamaya, ba ba lemoga, ba taboga ka dinao ba tswa kwa metseng yotlhe, ba phuthegela teng, ba ba raka. ₃₄Ya re Jesu a fologa, a ba bona e le bontsi jo bogolo, a ba tlhomogela pelo, ka ba ntse jaaka dinku tse di se nang modisa. A ba a simolola go ba ruta dilo tse dintsi. ₃₅Ya re letsatsi le setse le ngotlegile, barutwa ba gagwe ba ya go ene ba re: “Felo fa ke sekaka, le letsatsi le setse le ngotlegile. ₃₆Ba phatlalatse gore ba ye kwa merakeng le kwa metsaneng tikologong, ba ithekele se ba ka se jang.”

₃₇A ba araba a re: “A ba fiwe ke lona, ba je!”

Ba mo raya ba re: “A ò raya gore re ye go reka dinkgwe tsa diranta di le 20, re tle go ba fa, ba je?”

₃₈A ba raya a re: “Lo na le dinkgwe di le kae? Yaang lo bone!” Ya re ba sena go bona, ba mo raya ba re: “Di tlhano le ditlhapi tse pedi.”

₃₉Jaanong a ba laela gore ba nne botlhe mo bojannye jo botala ka masomo. ₄₀Ba nna fatshe e le ditlhopha tsa ba makgolo le ba masome a matlhano. ₄₁Foo a tsaya dinkgwe tse tlhano le ditlhapi tse pedi, a lelala legodimong, a leboga, a nathoganya dinkgwe, a di neela barutwa gore ba di ba bee pele; le ditlhapi tse pedi a di kgaoganyetsa botlhe. ₄₂Mme ba ja botlhe, ba kgora, ₄₃ba ba ba sela masadisa, a tlala ditlatla di le 12, le a ditlhapi. ₄₄Ba ba jeleng dinkgwe e ne e le banna ba ba dikete tse tlhano.

₄₅Jaanong a akofa a kgola barutwa ba gagwe go palama mokoro le go mo etelela pele kwa moseja kwa Betsaita, ene a sa ntse a phatlalatsa batho. ₄₆Ya re a sena go kgaogana nabo, a ya kwa thabeng go rapela. ₄₇Ya re go le maitsiboa, mokoro wa bo o le fa gare ga letsha, ene a le esi kwa lefatsheng. ₄₈A ba bona ba tshwere bothata ka go tsamaisa mokoro; gonne ba ne ba tlhabaganye le phefo. A tla kwa go bone, e ka ne e le ka tebelo ya bone bosigo, a tsamaya mo godimo ga letsha; a ba a rata go ba feta. ₄₉Ya re ba mmona a tsamaya mo godimo ga letsha, ba itlhoma e le sedimo, mme ba kua. ₅₀Gonne ba ne ba mmona botlhe, ba be ba tshoga.

Mme a akofa a bua nabo, a ba raya a re: “Namatshegang! Ke nna: se boifeng!” ₅₁A ba a tsena kwa go bone mo mokorong, phefo ya ba ya khutla; mme ba tseana thata thata. ₅₂Gonne ba ne ba sa rutega ka dinkgwe, dipelo tsa bone di ne di thatafetse.

₅₃Ya re ba sena go tshelela kwa lefatsheng, ba fitlha kwa Genesareta, ba be ba gokelela mokoro. ₅₄Ya re ba fologa mo mokorong, batho ba akofa ba mo lemoga, ₅₅ba taboga le lefatshe leo lotlhe, ba simolola go rwalela balwetse ka malao kwa ba mo utlwelang teng. ₅₆Le gongwe le gongwe kwa a tsenang teng, mo metsaneng gongwe mo metseng gongwe mo merakeng, ba baya balwetse mo patlelong, ba mo rapela gore ba ke ba ame le fa e ka bo e le kola ya seaparo sa gagwe fela, mme botlhe ba ba mo amileng ba fola.