MAREKO 5

₁Ba fitlha kwa moseja ga letsha, mo lefatsheng la Bagatara. ₂Ya re a tswa mo mokorong, motho yo o nang le mowa o o itshekologileng a akofa a kgatlhana nae, a tswa kwa diphupung, ₃yo boago jwa gagwe bo leng mo diphupung; mme go se ope yo o kgonang go mo golega, le fa e le ka keetane; ₄gonne o ne a golegwa gantsi ka mefiri ya maoto le dikeetane, mme dikeetane a di kgaole, le mefiri a e komoganye; go ne go se ope yo o nonofileng go mo kgwabofatsa. ₅Ka metlha yotlhe, bosigo le motshegare, o ne a nna kwa diphupung le kwa dithabeng, a ntse a goa, a ititaya ka majwe.

₆Ya re a bona Jesu a sa le kgakala, a taboga, a mo obamela, ₇a ba a goa ka lentswe le legolo a re: “O tsile go ntheng, Jesu, Morwa Modimo o o godimodimo? A Modimo o go kgone gore o se ka wa ntlhokofatsa!” ₈Wa bua jalo, ka gonne Jesu o ne a o reile a re: “Tswaa mo mothong yo, wena mowa o o itshekologileng!”

₉Jesu a o botsa a re: “Leina la gago ke mang?”

Wa mo araba wa re: “Leina la me ke ‘Mophato’; gonne re medemone e mentsi.” ₁₀Wa ba wa mo rapela thata gore a se ka a e leleka mo lefatsheng leo.

₁₁Jaanong ga bo go le motlhape o mogolo wa dikolobe teng fa thabeng di fula. ₁₂Medemone yotlhe ya mo rapela ya re: “Re romele kwa dikolobeng gore re tsene mo go tsona.” ₁₃A e letlelela. Jaanong mewa e e itshekologileng ya tswa, ya tsena mo dikolobeng, mme motlhape wa kgokologela ka fa makgotlhong mo letsheng, e ka nna di le 2 000, tsa betwa mo metsing.

₁₄Badisa ba tsona ba tshaba, ba bolela mo motseng le mo nageng. Batho ba tla go bona se se dirafetseng. ₁₅Ba tla kwa go Jesu, ba bona yo o ne a tsenywe ke medemone, a ntse fa fatshe, a apesitswe, a na le tlhaloganyo, e bong ene yo o neng a na le Mophato; mme ba boifa. ₁₆Ba ba bonyeng ba ba bolelela ka fa go dirafaletseng yo o neng a tsenywe ke medemone ka teng le ka ga dikolobe.

₁₇Ba be ba simolola go rapela Jesu gore a tloge mo dinageng tsa bone.

₁₈Ya re a tsena mo mokorong, yo o ne a tsenywe ke medemone a mo rapela gore a nne nae.

₁₉Mme Jesu a se ka a mo letlelela, mme a mo raya a re: “Yaa kwa ntlong ya gago kwa go ba ga eno, o ba bolele dilo tse dikgolo tse Morena a di go diretseng, fa a go utlwela botlhoko.”

₂₀Yoo a ya a simolola go tumisa mo nageng ya Metse-e-e-lesome dilo tse dikgolo, tse Jesu a di mo diretseng; mme botlhe ba gakgamala.

₂₁E rile Jesu a sena go tshelela gape kwa moseja ka mokoro, batho ba bantsi ba phuthegela kwa go ene, a le fa letsheng. ₂₂Jaanong ga tla mongwe wa bagolo ba senagoge yo leina la gagwe e leng Jairo. Ya re a mmona, a wela fa dinaong tsa gagwe, ₂₃a mo rapela thata a re: “Morwadiake yo monnye o gaufi le go swa; a ò ko o tle, o mmee diatla gore a fole, a phele.”

₂₄A tloga nae, batho ba bantsi ba mo sala morago, ba mo pitlaganya.

₂₅Jaanong mosadi yo o sa leng a bolawa ke madi dinyaga di le 12, ₂₆mme a bogile thata mo dingakeng tse dintsi, a bile a feletswe ke tsotlhe tse a neng a na natso, a sa bona thusego epe, mme bolwetse bo ntse bo atela pele; ₂₇ya re a utlwa ka ga Jesu, a mo tla kwa morago a le mo gare ga batho, a ama seaparo sa gagwe. ₂₈Gonne o ne a dumela gore fa nka ama le fa e le diaparo tsa gagwe fela, ke tla fola.

₂₉Ke fa kelelo ya madi a gagwe e kgala ka bonako, a ikutlwa mo mmeleng, fa a fodisitswe botlhoko jwa gagwe. ₃₀Jesu a akofa a itemoga, fa thata e dule mo go ene; a ba a retologa mo bathong a re: “Ke mang yo o amileng diaparo tsa me?”

₃₁Barutwa ba gagwe ba mo raya ba re: “O a bona, fa bontsi bo go pitlagantse, mme ò a re: ‘Ke mang yo o nkamileng?’ ”

₃₂Jesu a batlisisa go bona yo o dirileng jalo. ₃₃Jaanong mosadi a boifa, a roroma, ka a itse se se mo dirafaletseng, a tla a wela fa pele ga gagwe, a mmolelela boammaaruri jotlhe. ₃₄Jesu a mo raya a re: “Morwadiaka, tumelo ya gago e go thusitse; tsamaya ka kagiso, ò folele ruri botlhoko jwa gago.”

₃₅Ya re a sa ntse a bua, ga tla ba bangwe ba tswa kwa ntlong ya mogolo wa senagoge ba re: “Morwadio o sule; o sa tshwenyetsang Moruti?”

₃₆Ya re Jesu a utlwa lefoko le le buiwang, a raya mogolo wa senagoge a re: “Se boife, dumela fela.” ₃₇A se ka a letlela ope go mo sala morago, fa e se Petoro le Jakobo le Johane, morwa-rraagwe Jakobo. ₃₈Jaanong ba fitlha kwa ntlong ya mogolo wa senagoge; a bona khuduego, le ba ba lelang, ba goa thata. ₃₉Ke fa a tsena, a ba raya a re: “Lo huduegelang, lo lela? Ngwana ga a a swa, o robetse.”

₄₀Mme ba mo tshega. Ya re a sena go ba ntshetsa botlhe kwa ntle, a tsaya rra-ngwana le mmaagwe, le ba ba nang nae, a ba a tsena kwa ngwana a leng teng. ₄₁A tshwara seatla sa ngwana, a mo raya a re: “Talita khumi!” Fa go fetolwa ke go re: “Mosetsana, ke go raya ke re: Tsoga!”

₄₂Mme ka bonako mosetsana a tsoga, a tsamaya. O ne a na le dinyaga di le 12. Ba akofa ba gakgamala ka kgakgamalo e e fetisang. ₄₃Jesu a ba laela thata gore go se ka ga itse ope; a ba a re, ngwana a fiwe dijo.