MAREKO 15

₁E rile ka moso phakela baperesiti ba bagolo ba na le bagolo ba morafe le Baitsedikwalo le botlhe ba lekgotla ba akofa ba dumelana; mme ya re ba sena go golega Jesu, ba ya go mo neela Pilato. ₂Pilato a mmotsa a re: “A ke wena kgosi ya Bajuta?”

A mo araba a re: “O bolela jalo.”

₃Baperesiti ba bagolo ba mmaya melato ka dilo tse dintsi. ₄Pilato a mmotsa gape a re: “A ga o arabe sepe? Kana ba go baya melato e e kana kang!”

₅Mme Jesu a se ka a tlhola a araba sepe, Pilato a ba a tla a gakgamala.

₆Jaanong e ne e a tle e re ka moletlo a ba gololele mogolegwi yo ba mo kopang. ₇Ga bo go le mongwe yo o bidiwang Barabase, a golegilwe le ba ba dirileng khuduo, ba e rileng mo khuduong ba bolaya motho. ₈Jaanong lesomo la tlhatlogela teng, la simolola go mo kopa gore a dire ka fa a tle a ba direle ka teng. ₉Pilato a ba fetola a re: “A lo rata ka lo gololela kgosi ya Bajuta?” ₁₀A re jalo, gonne o ne a itse gore baperesiti ba bagolo ba mo neetse tshekisong ka lefufa.

₁₁Mme baperesiti ba bagolo ba tlhotlheletsa batho gore bogolo a ba gololele Barabase. ₁₂Pilato a ba fetola gape a re: “Mme jaanong ke tla dirang ka ene yo lo mmitsang Kgosi ya Bajuta?”

₁₃Ba goa gape ba re: “Mmapolele sefapaanong!”

₁₄Mme Pilato a ba raya a re: “Naare o dirile bosula bofe?”

Ba goa thata thata ba re: “Mmapolele sefapaanong!”

₁₅Ya re ka Pilato a rata go kgatlha bontsi, a ba gololela Barabase; mme ya re a sena go seola Jesu, a mo neela gore a bapolwe.

₁₆Ke fa batlhabani ba mo isa kwa teng ga lelapa, e bong kwa kagong ya molaodi, ba be ba phutha mophato otlhe. ₁₇Ba mo apesa kobo e khibidu, ba loga serwalo sa mitlwa, ba se mo rwesa; ₁₈ba simolola go mo dumedisa ba re: “Dumela, Kgosi ya Bajuta!” ₁₉Le gona ba mmetsa mo tlhogong ka lotlhaka, ba mo kgwela mathe, ba wa ka mangole, ba mo obamela. ₂₀Ya re ba sena go mo sotla, ba mo apola kobo e khibidu, ba boa ba mo apesa diaparo tsa gagwe. Jaanong ba mo gogela kwa ntle, gore ba mmapole.

₂₁Foo ba pateletsa mongwe yo o fetang a tswa kwa nageng, e bong Simone wa Kirene, rraagwe Aleksantere le Rufo, gore a mo sikarele sefapaano. ₂₂Ba mo isa kwa felong fa go tweng Golegotha, mo phetolong ke go re: “Felo ga logata.” ₂₃Ba mo naya weine e tlhakantswe le mera; mme a se ka a e nwa. ₂₄Jaanong ba mmapola, ba be ba kgaogana diaparo tsa gagwe ka go di tlhamela tengwa gore mongwe le mongwe a tsee sa gagwe. ₂₅E ne e le nako ya borobongwe fa ba mmapola. ₂₆Sekwalo sa molato wa gagwe sa bo se kwadilwe fa godimo se re: “KGOSI YA BAJUTA.” ₂₇Ba bapola dinokwane di le pedi nae, sengwe ka fa letsogong la gagwe le le jang, se sengwe ka fa go la molema. ₂₈Lokwalo lwa ba lwa dirafala lo lo reng: O baletswe le baikepi.

₂₉Ba ba fetang ba mo kgala, ba thukhutha ditlhogo ba re: “Auwi, wena yo o senyang Tempele, o be o e age ka malatsi a le mararo, ₃₀ipholose, o fologe mo sefapaanong.”

₃₁Baperesiti ba bagolo le bone le Baitsedikwalo ba sotla fela jalo, ba raana ba re: “O ne a thusa ba bangwe, mme o palelwa ke go ithusa. ₃₂A Keresete, Kgosi ya Iseraele, a fologe jaanong mo sefapaanong gore re bone, re tle re dumele.”

Le ba ba bapotsweng nae ba mo kgoba.

₃₃Ya re ka nako ya motshegare ga nna lefifi mo lefatsheng lotlhe go ya nakong ya boraro thapama. ₃₄Ya re ka nako ya boraro thapama Jesu a kua ka lentswe le legolo a re: “Eloi, Eloi, lama sabagathani?” fa go fetolwa ke go re: “Modimo wa me, Modimo wa me, o ntlogeletseng?”

₃₅Ba bangwe ba bone ba ba emeng teng, ya re ba utlwa, ba bua ba re: “Utlwang, o bitsa Elia.” ₃₆Mongwe a taboga, a ina ngami mo motatseng, a e tlhomela mo lotlhakeng, a mo nosa a re: “Lesang, re boneng gore a Elia o tla tla go mo pagolola.”

₃₇Mme Jesu a goa ka lentswe le legolo, a ntsha mowa.

₃₈Ke fa lesire la Tempele le gagoga, go simolola kwa godimo go ya kwa tlase. ₃₉Mme molaodi-wa-lekgolo yo o emeng fa teng a lebaganye nae, ya re a bona gore o ntshitse mowa ka mokgwa oo, a bua a re: “Ammaaruri, motho yo e ne e le Morwa Modimo.”

₄₀Le gona ga bo go le basadi teng, ba lebile ba le kwa kgakala; mo go bone go le Maria Magtalena le Maria mmaagwe Jakobo yo mmotlana le Jose, le Salome, ₄₁ba e rileng a le kwa Galelea, ba mo sala morago, ba mo direla; le basadi ba bangwe ba bantsi ba ba ileng kwa Jerusalema le ene.

₄₂E rile jaanong go setse go le maitsiboa, ka e le la iketleetso, e bong letsatsi le le latelwang ke la Sabata, ₄₃ga tla Josefa wa Arimathea, e le mongwe yo o tlotlegang wa lekgotla, yo le ene o ne a lebeletse puso ya Modimo; a tsena ka bopelokgale kwa go Pilato, a kopa serepa sa ga Jesu. ₄₄Pilato a gakgamala, fa a setse a sule. A bitsa molaodi-wa-lekgolo, a mmotsa gore a e setse e le sebaka a ntse a sule. ₄₅Ya re a sena go utlwa mo molaoding-wa-lekgolo, a neela Josefa serepa. ₄₆Yo a reka lesela, a mo pagolola, a mo phuthela ka lone, a ba a mmaya mo lebitleng le le neng le gabilwe mo lefikeng; a ba a pitikela lentswe mo mojakong wa lone. ₄₇Maria Magtalena le Maria mma Jose ba bona fa a fitlhilweng teng.