MIGA 6

₁A ko lo utlwe se Morena a se buang: Nanoga ò seke fa pele ga dithaba; a dithabana di reetse kodu ya gago!

₂Lona dithaba, utlwang kgang ya Morena, le lona metheo ya lefatshe e e sa fetogeng; gonne Morena o na le tsheko le morafe wa gagwe; o tla sekisanya le Iseraele.

₃“Wena morafe wa me, ke go dirile eng? Ke go lapisitse ka eng? Supa ka ga me! ₄Kana ke go ntshitse kwa lefatsheng la Egepeto, ka go rekolola mo ntlong ya botlhanka; ka roma Moše le Arone le Miriame gore ba go etelele pele! ₅Morafe wa me, a ko ò gakologelwe se Balake, kgosi ya Moabe, o neng a se ikaeletse le se Bileame, morwa Beore, o se mo arabileng le se se dirafetseng go tswa kwa Sitime go fitlha kwa Gilegala gore lo tle lo itse ditiro tse di siameng tsa Morena.”

₆Ke tla kgatlhantsha Morena ka eng? Ke tla ikoba jang fa pele ga Modimo wa bogodimo? A nka mo kgatlhantsha ka ditlhabelo tsa phiso, ka dinamane tsa ngwaga? ₇A Morena o tla kgatlhwa ke diphelehu di le dikete gongwe dinoka tsa lookwane di le dikete tse? A nka ntsha morwaake yo mogolo ka ntlha ya tlolo ya me? Gongwe leungo la mmele wa me ka ntlha ya boleo jwa mowa wa me? ₈Wena motho, Morena o go itsisitse tse di leng molemo le tse a di batlang mo go wena: O batla gore ò dire tse di siameng, ò rate bopelotlhomogi, o tsamaya le Modimo wa gago ka boikokobetso!

₉Utlwang! Morena o tlhabela motse mokgosi! – Ke botlhale go boifa leina la gago. – Utlwang, lotso le phuthego ya motse. ₁₀“A nka lebala ntlo ya moikepi e e kgobokanyang mahumo a tshiamololo le selekanyo sa tsietso se se hutsitsweng? ₁₁Yo o nang le sekale se se tsietsang le ditshipi tse di lekanyang tse e seng tsona mo kgetsaneng, a nka mo kaya yo o phepa? ₁₂E re ka bahumi ba motse ba tletse kgatelelo, baagi ba ona ba bua maaka, ba na le diteme tsa bolotsana mo maganong a bona, ₁₃le nna ke tla go itaya botlhoko, ke go fetola sekaka ka ntlha ya maleo a gago. ₁₄Wena ò tla ja, mme ò sa kgore; tlala ya gago e ntse e le mo teng ga gago. O tla ipeela, mme ò sa boloke sepe, mme tse ò di bolokang ke tla di neela tšhaka. ₁₅Wena ò tla jwala, mme ò sa robe; ò gata maungo a olefa segatelong, mme ò sa tlole lookwane; ò tlhotlha maungo a moweine, mme ò sa nwe weine. ₁₆Gonne melao ya ga Omeri e a tshegediwa, le ditiro tsotlhe tsa ntlo ya ga Ahabe; lo sepela ka fa dikgakololong tsa bone gore ke tle ke go dire sekaka se se tshosang, le baagi ba sona ke ba dire tshotlego; lo tla rwala kgobo ya morafe wa me.”