MATHEO 5

₁E rile a bona bontsintsi, a tlhatlogela kwa thabeng; ya re a sena go nna fa fatshe, barutwa ba gagwe ba tla go ene. ₂A tumolola molomo, a ba ruta a re:

₁₁“Lo sego, fa batho ba lo kgoba, ba lo bogisa, ba bua bosula jotlhe ka ga lona ka maaka, ka ntlha ya me. ₁₂Itumeleng lo ipele; gonne tuelo ya lona e kgolo kwa magodimong. Gonne ba bogisitse baporofeti jalo, ba ba neng ba le teng pele ga lona.

₁₃“Lona lo letswai la lefatshe. Fa letswai le tswapogile, le tla lokwa ka eng? Ga le tlhole le na le tiro epe, fa e se go latlhelwa kwa ntle le go gatakwa ke batho.

₁₄“Lona lo lesedi la lefatshe. Motse o o mo godimo ga thaba ga o ka ke wa fitlhega. ₁₅Le gona ga go ke go tshujwa lobone, lwa bewa ka fa tlase ga kgamelo. Lo bewa mo setlhomong; foo lo tla bonegela botlhe ba ba mo ntlong. ₁₆A lesedi la lona le bonegele batho jalo gore ba bone ditiro tsa lona tse di siameng, ba tle ba galaletse Rraalona yo o kwa magodimong.

₁₇“Lo se ka lwa gopola gore ke tsile go dirolola molao gongwe baporofeti; ga ke a tla go dirolola, ke tsile go dirafatsa. ₁₈Gonne, ammaaruri ke lo raya ke re: Fa tsotlhe di ise di dirafale pele, ga go ka ke ga feta tlhakanyana epe, le fa e le letshwaonyana lepe la molao, go tsamaya go fete legodimo le lefatshe. ₁₉Ka moo, le fa e le mang yo o tla dirololang nngwe ya ditaolo tse dipotlana tse le go ruta batho jalo, o tla bidiwa yo mmotlana mo pusong ya magodimo. Mme yo o tla di dirisang le go di ruta, ene o tla bidiwa yo mogolo mo pusong ya magodimo. ₂₀Gonne ke lo raya ke re: Fa tshiamo ya lona e sa gaise ya Baitsedikwalo le ya Bafarisai, ga lo ka ke lwa tsena mo pusong ya magodimo ka gope.

₂₁“Lo utlwile gore go reilwe ba bogologolo ga twe: ‘O se ka wa bolaya; mme le fa e le mang yo o bolayang o tla atlholelwa petso.’ ₂₂Mme nna ke lo raya ke re: Mongwe le mongwe yo o galefelang mokaulengwe wa gagwe fela, o tla atlholelwa petso; yo o rayang mokaulengwe wa gagwe a re: ‘Selo ke wena!’ o tla tshwanelwa ke katlholo ya lekgotla le legolo; yo o reng: ‘Lesilo ke wena!’ o tla tshwanelwa ke go latlhelwa kwa moleteng wa molelo. ₂₃Fa jaanong ò isa neo ya gago fa aletareng, mme ò gakologelwa teng gore mokaulengwe wa gago o ngongorega ka wena, ₂₄foo tlogela neo ya gago teng fa pele ga aletare, ò ye o agisanye le mokaulengwe wa gago pele, e be gona ò ka tlang wa isa neo ya gago.

₂₅“Akofa ò utlwane le moganetsi wa gago, o sa ntse o na nae mo tseleng, e se re gongwe moganetsi a go neela moatlhodi, mme moatlhodi a go neela motlhanka, mme wa latlhelwa mo ntlong ya kgolegelo. ₂₆Ammaaruri ke go raya ke re: Ga o ka ke wa tswa teng ka gope, o ise o lefe sente ya bofelo.

₂₇“Lo utlwile gore go tilwe: ‘O se ka wa dira boaka.’ ₂₈Mme nna ke lo raya ke re: Mongwe le mongwe yo o lebang mosadi ka go mo eletsa, o setse a dirile boaka nae mo pelong ya gagwe. ₂₉Fa leitlho la gago le le jang le go kgopisa, ò le gonye, ò le latlhe; gonne go molemo mo go wena, fa nngwe ya ditokololo tsa gago e ka senyega, gore go se latlhelwe mmele otlhe wa gago mo moleteng wa molelo. ₃₀Fa letsogo la gago le le jang le go kgopisa, ò le kgaole, ò le latlhe; gonne go molemo mo go wena, fa nngwe ya ditokololo tsa gago e ka senyega, gore go se latlhelwe mmele otlhe wa gago mo moleteng wa molelo.

₃₁“Gape go tilwe: ‘Yo o tlhalang mosadi wa gagwe, a a mo nee lokwalo lwa tlhalo.’ ₃₂Mme nna ke lo raya ke re: Mongwe le mongwe yo o tlhalang mosadi wa gagwe, e se ka ntlha ya boaka, o mo dira seaka; mme yo o nyalang yo o tlhadilweng, o dira boaka.

₃₃“Gape, lo utlwile gore go reilwe ba bogologolo ga twe: ‘O se ka wa ikana ka maaka, mme o tshegeletse Morena maikano a gago.’ ₃₄Mme nna ke lo raya ke re: Se ikaneng ka gope, le fa e le ka legodimo, ka e le sedulo sa Modimo sa bogosi, ₃₅le fa e le ka lefatshe, ka e le sebeo sa ona sa dinao, le fa e le ka Jerusalema, ka e le motse wa kgosi e kgolo. ₃₆Le gona, ò se ka wa ikana ka tlhogo ya gago, ka ò sa ka ke wa dira thiri epe tshweu gongwe ntsho. ₃₇Mme a lefoko la lona la ‘Ee’ e nne ‘Ee’, la ‘Nnyaa’ e nne ‘Nnyaa’; mme se se fetang tseo se tswa mo go yo-o-bosula.

₃₈“Lo utlwile gore go tilwe: ‘A leitlho le tswelwe ke leitlho le leino ke leino.’ ₃₉Mme nna ke lo raya ke re: Se ganetsanyeng le yo o lo direlang bosula; mme fa mongwe a go faphola lesameng le le jang, mo neele le la molema. ₄₀Yo o ratang go seka le wena go tsaya kojwana ya gago, mo leseletse go go tseela le kobo. ₄₁Gape, fa motho a go pateletsa go tsamaya le ene mmaele e le nngwe, yaa nae tse pedi. ₄₂Naya yo o go kopang; le yo o ratang go adima mo go wena, o se ka wa mo hularela.

₄₃“Lo utlwile gore go tilwe: ‘Rata mongwe-ka-wena, mme o tlhoe mmaba wa gago.’ ₄₄Mme nna ke lo raya ke re: Ratang baba ba lona, lo tshegofatseng ba ba lo hutsang; ba ba lo tlhoileng lo ba direleng molemo, lo rapelele ba ba lo kgobotlang, ba lo bogisa, ₄₅gore lo nne bana ba ga Rraeno yo o kwa magodimong; gonne o tlhabisetsa ba ba bosula le ba ba molemo letsatsi la gagwe, o nesetsa basiami le basiamolodi pula. ₄₆Gonne fa lo rata ba ba lo ratang, lo na le tuelo efe? Bakgethisi le bone a ga ba dire jalo? ₄₇Fa lo dumedisa bakaulengwe ba lona fela, lo gaisa ba bangwe ka eng? Baheitane a ga ba dire jalo le bone? ₄₈Ka moo he, siamang ka botlalo jaaka Rraeno wa legodimo a siame ka botlalo.