LUKA 3

₁E rile ka ngwaga wa 15 wa puso ya Kaisara Tiberio, fa Pontio Pilato a le molaodi wa Jutea, le Herote a le kgosi ya Galelea, le Filipo morwa-rraagwe a le kgosi ya Iturea le lefatshe la Teragoniti, le Lesania a le kgosi ya Abilene, ₂le Hanase le Kaifase e le baperesiti ba bagolo, Lefoko la Modimo la tla kwa go Johane, morwa Sagaria, a le mo sekakeng. ₃Jaanong a fitlha mo lefatsheng lotlhe le le mo tikologong ya Joretane, a rera kolobetso ya tlhabologo e e isang boitshwarelong jwa dibe, ₄ka fa go kwadilweng ka teng mo lokwalong lwa mafoko a ga Jesaya wa Moporofeti ga twe:

₇Ya baa gona a rayang masomo a batho ba ba tsileng go kolobediwa ke ene a re: “Losika lwa dinoga ke lona! Lo tlhagisitswe ke mang go tila bogale jo bo tlang? ₈Ka moo, ntshang maungo a a tshwanetseng tlhabologo. Lo se ka lwa simolola go ithaya lo re: ‘Re bana ba ga Aborahame’; gonne ke lo raya ke re: Modimo o nonofile go tsosetsa Aborahame bana ka majwe a. ₉Mme le gona selepe se setse se beilwe mo meding ya ditlhare; jaanong he, setlhare sengwe le sengwe se se sa ungweng leungo le le molemo se tla rengwa, se latlhelwa mo molelong.”

₁₀Foo batho ba mmotsa ba re: “Jaanong re dire eng?”

₁₁A ba araba re: “Yo o nang le dikobo di le pedi, a a abele yo o se nang epe; le yo o nang le dijo, a a dire jalo.”

₁₂Bakgethisi le bone ba tla go kolobediwa, ba mmotsa ba re: “Moruti, rona re dire eng?”

₁₃A ba raya a re: “Se kgethiseng go fetisa mo lo go laetsweng.”

₁₄Batlhabani le bone ba mmotsa ba re: “Mme fa e le rona, re dire eng?”

A ba raya a re: “Se gateleleng ope, se lefiseng ope ka patiko; mme lo itumelele tuelo ya lona fela.”

₁₅Ya re batho ba le mo tebelelong, mme botlhe ba akanya mo dipelong tsa bone ka ga Johane gore a jaana ga e ka ne e le ene Keresete, ₁₆Johane a ba raya botlhe a re: “Nna ke lo kolobetsa ka metsi; mme go tla tla yo o nonofileng bogolo go nna, yo ke sa lekanang go funolola kgole ya ditlhako tsa gagwe; ene yoo o tla lo kolobetsa ka Mowa o o Boitshepo le ka molelo. ₁₇Loselo lwa gagwe lo mo seatleng sa gagwe go olosetsa ruri se se mo seboaneng sa gagwe, le go phuthela mabele mo sefaleng sa gagwe, mme moko o tla o tshuba ka molelo o o sa ka keng wa tingwa.”

₁₈A nna a rerela batho Efangele, a ba laya le ka mafoko a mantsi a mangwe.

₁₉Jaanong ya re kgosi Herote a kgalemelwa ke ene ka ntlha ya ga Herodia, mosadi wa ga Filipo morwa-rraagwe le ka ntlha ya tsotlhe tse di bosula tse Herote a di dirileng, ₂₀a fela a oketsa tsotlhe tseo ka go tswalela Johane mo ntlong ya kgolegelo.

₂₁Ya re batho botlhe ba kolobediwa, Jesu le ene a sena go kolobediwa, mme a rapela, legodimo la bulega, ₂₂mme Mowa o o Boitshepo wa fologela mo go ene ka popego ya lephoi, mme ga utlwala lentswe le le tswang kwa legodimong le re: “O Morwaake yo o rategang, yo ke go itumelelang.”

₂₃E rile Jesu a simolola go ruta, a bo a na le dinyaga tse di ka neng di le 30, mme – jaaka go ne go gopolwa – ya bo e le morwa Josefa, wa ga Eli, ₂₄wa ga Mathate, wa ga Lefi, wa ga Melegi, wa ga Janai, wa ga Josefa, ₂₅wa ga Mathatia, wa ga Amose, wa ga Nahume, wa ga Esedi, wa ga Nagai, ₂₆wa ga Maathe, wa ga Mathatia, wa ga Simei, wa ga Josega, wa ga Jota, ₂₇wa ga Joanane, wa ga Resa, wa ga Serubabele, wa ga Salathiele, wa ga Neri, ₂₈wa ga Melegi, wa ga Adi, wa ga Kosame, wa ga Elematame, wa ga Ere, ₂₉wa ga Jesua, wa ga Eliesere, wa ga Jorime, wa ga Mathate, wa ga Lefi, ₃₀wa ga Simeone, wa ga Juta, wa ga Josefa, wa ga Joname, wa ga Eliakime, ₃₁wa ga Melea, wa ga Menane, wa ga Mathata, wa ga Nathane, wa ga Dafita, ₃₂wa ga Isai, wa ga Obete, wa ga Boase, wa ga Salema, wa ga Nasone, ₃₃wa ga Aminatabe, wa ga Rame, wa ga Heserone, wa ga Pherese, wa ga Juta, ₃₄wa ga Jakobe, wa ga Isaka, wa ga Aborahame, wa ga Thara, wa ga Nahore, ₃₅wa ga Seruge, wa ga Rehu, wa ga Phelege, wa ga Ebere, wa ga Sela, ₃₆wa ga Kenane, wa ga Arephagasadi, wa ga Seme, wa ga Noa, wa ga Lamege, ₃₇wa ga Methusala, wa ga Henoge, wa ga Jarete, wa ga Mahalalele, wa ga Kenane, ₃₈wa ga Enose, wa ga Sethe, wa ga Atame, wa Modimo.