LUKA 22

₁Jaanong moletlo wa Dinkgwe tse di sa bedisiwang o o bidiwang Tlolaganyo wa bo o atametse. ₂Mme baperesiti ba bagolo le Baitsedikwalo ba batla ka fa ba ka mmolayang ka teng; gonne ba ne ba boifa morafe.

₃Jaanong Satane a tsena mo go Jutase yo o bidiwang Isekariote, e le mongwe wa ba ba 12. ₄Yoo a ya a bua le baperesiti ba bagolo le balaodi ba Tempele ka fa a ka mo ba neelang ka teng. ₅Bone ba itumela, ba be ba dumelana go mo naya madi. ₆A ba a dumela. Jaanong a batla nako e e lebanyeng ya go mo ba neela, bontsi bo se yo.

₇Jaanong ga tla letsatsi la Dinkgwe tse di sa bedisiwang, le kwana ya Tlolaganyo e tshwanetseng go tlhajwa ka lone. ₈Jesu a roma Petoro le Johane a re: “Yaang lo re baakanyetse Tlolaganyo gore re e je.”

₉Ba mmotsa ba re: “O rata gore re e baakanyetse kae?”

₁₀A ba raya a re: “Bonang, e tla re lo sena go tsena mo motseng, lo kgatlhane le monna a rwele nkgwana ya metsi; lo mo sale morago go ya mo ntlong e o tsenang mo go yona, ₁₁lo ree mong wa ntlo lo re: ‘Moruti o a go botsa a re: Ntlwana ya baeti e kae, kwa nka jelang Tlolaganyo teng le barutwa ba me?’ ₁₂Ene o tla lo supetsa ntlwana e kgolo e e fa godimo, e e adilweng mesamo; lo baakanyetse teng.”

₁₃Ba ya ba fitlhela go ntse fela jaaka a ba boleletse, ba baakanyetsa Tlolaganyo.

₁₄Ya re nako e sena go fitlha, a rapama fa dijong, a na le baapostolo ba ba 12. ₁₅Jaanong a ba raya a re: “Ke eleditse thata go ja Tlolaganyo e le lona, ke ise ke boge; ₁₆gonne ke lo raya ke re: Ga nke ke tlhola ke e ja ka gope, go tle go tsamae e dirafale ka botlalo mo pusong ya Modimo.”

₁₇Ke fa a tsaya senwelo, a leboga a re: “Se tseeng, lo se hupalane. ₁₈Gonne ke lo raya ke re: Go tloga jaanong ga nke ke tlhola ke nwa leungo la moweine, go tle go tsamae puso ya Modimo e tle.”

₁₉A ba a tsaya senkgwe, a leboga, a se nathoganya, a se ba naya a re: “Se ke mmele wa me o o neelwang lona; dirang jalo gore e nne go nkgopola.” ₂₀Fela jalo le sona senwelo a se tsaya morago ga selalelo a re: “Senwelo se ke kgolagano e ntšhwa ka madi a me a lo a tshololelwang.

₂₁“Mme itseng, seatla sa yo o ntswang se na le nna mo tafoleng. ₂₂Tota Morwa-Motho o tsamaya jaaka go laotswe; fela go latlhega motho yoo yo o mo tswang.”

₂₃Ke fa ba simolola go botsanya gore e ka nna ofe wa bone yo o tla dirang jalo.

₂₄Le gona ga tsoga kgang mo go bone ya gore ke ofe wa bone yo o ka kaiwang yo mogolo. ₂₅Jesu a ba raya a re: “Dikgosi tsa merafe di a e busa, e bile ba ba setlhogo mo go bone ba bidiwa ‘Bababaledi ba bone.’ ₂₆Fela lona lo se nne jalo, mme yo mogolo mo go lona a a nne jaaka yo mmotlana, le yo e leng moeteledipele a a nne jaaka modiredi. ₂₇Kana yo mogolo ke ofe? A ke yo o ntseng fa dijong, gongwe yo o direlang? A ga se yo o ntseng fa dijong? Mme nna ke mo gare ga lona jaaka yo o direlang.

₂₈“Ke lona ba lo itshokileng le nna mo dipitlaganong tsa me. ₂₉Mme ke lo abela puso fela jaaka Rre a e nkabetse, ₃₀gore lo je lo nwe fa tafoleng ya me mo pusong ya me. Lo tla nna mo ditulong tsa bogosi, lo atlhola ditso tse di 12 tsa Iseraele.”

₃₁Jaanong Morena a re: “Simona, Simona, bona, Satane o lo ipatletse gore a lo olose jaaka mabele; ₃₂mme nna ke go rapeletse gore tumelo ya gago e se khutle. Mme wena e re o sena go sokologa, o tiise bakaulengwe ba gago.”

₃₃Ene a mo fetola a re: “Morena, fa ke na nao, ke iketleeditse go ya le mo ntlong ya kgolegelo le mo losong.”

₃₄Mme Jesu a re: “Ke a go bolelela, Petoro, mokoko ga o nke o lela kajeno, wena o ise o intatole gararo o re, ga o nkitse.”

₃₅A boa a ba raya a re: “E rile ke lo roma, lo se na sekgwama le kgwatlha le ditlhako, a lo ne lwa tlhoka sengwe?”

Ba re: “Le e seng sepe.”

₃₆A ba raya a re: “A jaanong yo o nang le sekgwama, a se tsee, le kgwatlha jalo. Yo o tlhokang, a a rekise kobo ya gagwe, a reke tšhaka. ₃₇Gonne ke lo raya ke re: Se se kwadilweng se se reng: ‘O baletswe le baikepi’ se sa ntse se tshwanetse go wediwa mo go nna. Gonne tse di kwadilweng ka ga me di a dirafala.”

₃₈Foo ba re: “Morena, bona, ditšhaka tse pedi ke tse.”

A ba raya a re: “Go lekanye.”

₃₉Jaanong a tswa, a ya kwa Thabeng ya Diolefa ka fa a tlwaetseng ka teng, barutwa ba mo sala morago. ₄₀Ya re a sena go fitlha felong foo, a ba raya a re: “Rapelang gore lo se tsene mo thaelong!”

₄₁A ba a katogana nabo, go ka nna kana ka makonopelo a lentswe, a khubama ka mangole, a rapela ₄₂a re: “Rara, fa o rata, tlosa senwelo se mo go nna; fela a go se dirafale thato ya me, mme go dirafale ya gago!” ₄₃Jaanong ga bonala moengele kwa go ene, a tswa legodimong, a mo thatafatsa. ₄₄Ya re a le mo tlalelong e kgolo, a rapela ka bojotlhe jwa gagwe; mofufutso wa gagwe wa nna jaaka marothodi a madi a a rothelang fa fatshe.

₄₅Ya re a tsoga mo thapelong, a tla kwa barutweng, a fitlhela ba robetse ka ntlha ya bohutsana. ₄₆A ba raya a re: “Lo robaletseng? Tsogang lo rapele go re lo se tsene mo thaelong.”

₄₇E rile a sa ntse a bua, ba bona go tla letshuti la batho, mme yo o bidiwang Jutase, mongwe wa ba 12, a bo a ba eteletse pele, a ba a atamela Jesu go mo atla. ₄₈Ke fa Jesu a mo raya a re: “Jutase, a o tshwarisa Morwa-Motho ka katlo?”

₄₉Ya re ba ba mo dikanyeditseng ba bona se se tla dirafalang, ba botsa ba re: “Morena, a ke re reme ka tšhaka?” ₅₀Mme mongwe wa bone a rema motlhanka wa moperesiti yo mogolo, a mo kgaola tsebe ya le le jang.

₅₁Mme Jesu a araba a re: “Lesang, go lekanye.” A ba a ama tsebe ya gagwe, a mo fodisa.

₅₂Jaanong Jesu a raya baperesiti ba bagolo le balaodi ba Tempele le bagolo ba morafe ba ba tsileng go ene a re: “A lo bolotse ka ditšhaka le melamu, jaaka e kete lo tsoma senokwane? ₅₃E rile ke ntse ke na le lona ka malatsi otlhe mo Tempeleng, lwa se ka lwa ntshetsa diatla; mme nako eno ke nako ya lona le thata ya lefifi.”

₅₄Foo ba mo tshwara, ba tsamaya ka ene, ba mo isa kwa ntlong ya moperesiti yo mogolo. Petoro a ba latela a le kgakala. ₅₅Ya re ba sena go gotsa molelo fa gare ga lelapa, ba ntse mmogo, Petoro a nna mo gare ga bone. ₅₆Jaanong ya re lelata lengwe le mmona a dutse fa molelong, la tlhoma matlho mo go ene, la bua la re: “Yo le ene o ne a na nae.”

₅₇Mme a mo itatola a re: “Mosadi, ga ke mo itse.”

₅₈Morago ga sebakanyana yo mongwe a mmona a re: “Le wena o mongwe wa bone.”

Mme Petoro a re: “Monna, ga ke ene.”

₅₉Ya re go sena go feta e ka nna nako e le nngwe fela, yo mongwe a tlhomamisa a re: “Ammaaruri, yo le ene o ne a na nae, gonne le ene ke Mogalelea.”

₆₀Mme Petoro a re: “Monna, ga ke itse se o se buang.”

Mme ka bonako, ya re a sa ntse a bua, mokoko wa lela. ₆₁Ke fa Morena a retologa, a leba Petoro, mme Petoro a gakologelwa lefoko la Morena ka fa a mo reileng ka teng a re: “E tla re mokoko o ise o lele kajeno, o intatole gararo.” ₆₂Petoro a tswela kwa ntle, a lela mo go botlhoko.

₆₃Jaanong banna ba ba tshwereng Jesu ba mo sotla, ba mo itaaka, ₆₄ba be ba mo fapa matlho, ba mo faphola sefatlhegong, ba mmotsa ba re: “Bolela gore ke mang yo o go iteileng?” ₆₅Le dilo tse dingwe tse dintsi ba mo kgoba ka tsona, ba mo kgala.

₆₆E rile bo sena go sa, ga phuthega bagolo ba morafe, e bong baperesiti ba bagolo le Baitsedikwalo, ba mo isa kwa lekgotleng la bone, ₆₇ba re: “Fa o le Keresete, re bolelele.”

A ba raya a re: “Le fa nka lo bolelela, ga lo nke lo dumela; ₆₈mme fa nka botsa, ga lo nke lo nkaraba, le fa e le go nkgolola. ₆₉Mme go tlogeng fano Morwa-Motho o tla nna ka fa letsogong le le jang la thata ya Modimo.”

₇₀Botlhe ba re: “Mme a o Morwa Modimo?”

A ba araba a re: “Lo a bolela, ke nna ene.”

₇₁Bone ba re: “Re sa batlelang tshupo? Gonne re e utlwile ka rosi ka molomo wa gagwe.”