LUKA 20

₁Ka lengwe la malatsi ao, ya re a ruta batho mo Tempeleng, a rera Efangele, baperesiti ba bagolo le Baitsedikwalo ba tla go ene, ba na le bagolo ba morafe, ₂ba bua nae ba re: “Re bolelele gore dilo tse o di dira ka thata efe? Gongwe ke mang yo o go neileng thata eo?”

₃A ba araba a re: “Le nna ke tla lo botsa lefoko lengwe; mpolelelang: ₄Kolobetso ya ga Johane a e ne e tswa kwa legodimong gongwe mo bathong?”

₅Ba ikakanya ba re: “Fa re ka re: ‘Kwa legodimong,’ o tla re: ‘Lo ne lo sa mo dumeleleng?’ ₆Mme fa re ka re: ‘Mo bathong,’ batho botlhe ba tla re kgobotletsa; gonne ba dumetse ruri gore Johane e ne e le moporofeti.” ₇Foo ba araba ba re: “Ga re itse gore e ne e tswa kae.”

₈Jesu a ba raya a re: “Gona le nna ga ke lo bolelele thata e ke dirang dilo tse ka yona.”

₉Jaanong a simolola go bolelela batho setshwantsho se a re: “Motho mongwe o ne a lema tshimo ya moweine, a e neela balemi, a ba a eta sebaka se seleele. ₁₀Ya re ka nako ya teng a roma motlhanka kwa baleming gore ba mo nee mangwe a maungo a tshimo ya moweine. Mme balemi ba mo itaya, ba mmusa a iphotlhere. ₁₁A boa a roma motlhanka yo mongwe; mme le ene ba mo itaya, ba mo dira mo go tlhabisang ditlhong, ba mmusa a iphotlhere. ₁₂A boa a roma wa boraro; mme le yoo ba mo ntsha dintho, ba mo lelekela kwa ntle. ₁₃Foo mong wa tshimo ya moweine a ikakanya a re: ‘Ke tla dirang? Ke tla roma morwaake yo o rategang. E ka re gongwe ba mo tlotla.’ ₁₄Mme ya re balemi ba mmona, ba ikakanya ba re: ‘Yo ke ene moja-boswa; tlaang re mmolaeng gore boswa e nne jwa rona.’ ₁₅Mme ba mo kgarameletsa kwa ntle ga tshimo ya moweine, ba mmolaya.

“Jaanong mong wa tshimo ya moweine o tla ba dirang? ₁₆O tla tla, a bolaya balemi bao; mme tshimo ya moweine o tla e neela ba sele.”

Ya re ba utlwa, ba re: “A go se nne jalo!”

₁₇Mme a ba leba a re: “Go kaya eng fa go kwadilwe ga twe:

₁₈“Mongwe le mongwe yo o welang mo letlapeng leo o tla thubagana; mme yo le tla mo welang le tla mo tšhwetlakanya.”

₁₉Ka yona nako eo Baitsedikwalo le baperesiti ba bagolo ba batla go mo tshwara, mme ba boifa batho, ka gonne ba ne ba lemoga gore o iteisa bone ka setshwantsho se. ₂₀Jaanong ba mo lepa, ba roma balaledi ba ba itimokanyang ka go ipaya basiami, gore ba mo tshware mo lefokong lengwe, ba be ba mo neele mmuso, e bong mo thateng ya molaodi. ₂₁Ba mmotsa ba re: “Moruti, re itse gore o bua, o ruta ka tshiamo, o sa gobelelele ope, mme o ruta tsela ya Modimo ka boammaaruri. ₂₂A re letleletswe go neela Kaisara lekgetho gongwe nnyaya?”

₂₃Ya re ka a lemoga bolotsana jwa bone, a ba raya a re: ₂₄“Ntshupetseng ledi la lekgetho! Le na le setshwantsho le sekwalo sa ga mang?”

Ba re: “Sa Kaisara.”

₂₅A ba raya a re: “Ka moo he, ntshetsang Kaisara tse e leng tsa Kaisara, le Modimo tse e leng tsa Modimo.”

₂₆Mme ba retelelwa ke go mo tshwara mo polelong ya gagwe fa pele ga batho, ba be ba gakgamalela karabo ya gagwe, ba didimala.

₂₇Jaanong ga tla go ene Basadukai bangwe ba ba latolang tsogo ya baswi, ba mmotsa ba re: ₂₈“Moruti, Moše o re laetse go re: ‘Fa motho a swa, a na le mosadi, mme a se na ngwana, a morwa-rraagwe a tsee mosadi yoo, a tsosetse morwa-rraagwe losika.’ ₂₉Jaanong go kile ga bo go le bomorwa monna ba ba supang. Wa ntlha a tsaya mosadi; mme a swa a se na ngwana. ₃₀Le wa bobedi a tsaya mosadi yoo, ₃₁le wa boraro a mo tsaya; ga nna fela jalo mo go bone ka bosupa jwa bone; ba se ka ba tlogela bana, mme ba swa. ₃₂La bofelo mosadi le ene a swa. ₃₃Mosadi yoo jaanong mo tsogong ya baswi e tla nna mosadi wa ga mang mo go bone? Ka gonne ba ne ba mo nyetse ka bosupa jwa bone.”

₃₄Jesu a ba araba a re: “Bana ba lefatshe leno ba a nyala, ba a nyalwa; ₃₅mme ba ba kaiwang ba siametse go abelwa lefatshe lele le tsogo ya baswi ga ba nyale, ga ba nyalwe, ₃₆le gona ga ba ka ke ba tlhola ba a swa; gonne ba tshwana le baengele, e bile ke bana ba Modimo, ka e le bana ba tsogo ya baswi. ₃₇Mme fa e le gore baswi ba a tsosiwa, Moše le ene o supile jalo fa setlhareng sa mitlwa, fa a bitsa ‘Morena Modimo wa ga Aborahame, Modimo wa ga Isaka, Modimo wa ga Jakobe.’ ₃₈Ke go re, Modimo ga se wa baswi, ke wa baphedi; gonne botlhe ba phelela ona.”

₃₉Foo bangwe ba Baitsedikwalo ba mo raya ba re: “Moruti, o buile sentle.” ₄₀Gonne ba ne ba tshaba go mmotsa sengwe gape.

₄₁Jaanong a ba botsa a re: “Ba raya jang, fa ba re: Keresete ke morwa Dafita? ₄₂Kana Dafita ka esi o bua mo lokwalong lwa Dipesalome a re:

₄₄“Jaanong he, fa Dafita a mmitsa ‘Morena’, e ka nna morwawe jang?”

₄₅Ya re batho botlhe ba utlweletse, a raya barutwa a re: ₄₆“Itiseng mo go Baitsedikwalo ba ba ratang go tsamaya ka dikobo tse di kgokgothang, ba bile ba rata ditumediso mo dipatlelong, le ditulo tse di kwa pele mo disenagogeng, le manno a a kwa pele mo meletlong; ₄₇ba metsa matlo a batlholagadi, mme ba itimokanya ka go rapela go le goleele. Bone ba tla bona petso e kgolo bogolo mo katlholong.”