JONA 2

“Ke ne ka rapela Morena

ke le mo tlalelong,

mme a nkutlwa;

ka goa ke le mo felong ga baswi,

mme wa utlwa lentswe la me.

₃O ne o ntatlhetse kwa tengteng

mo gare ga lewatle;

morwalela o ne o ntikanyetsa.

Dintelo tsotlhe tsa gago

le makhubu a gago a metsi

tsa feta godimo ga me.

₄Mme ke itheile ka re:

‘Ke lelekilwe

ka tlosiwa fa pele ga gago.

A ke tla tlhola ke bona Tempele

e e Boitshepo ya gago gape?’

₅Metsi a ne a ntikaganyetsa,

a batla go mpeta,

morwalela o le mo tikologong

ya me,

motlhaka wa lewatle

o ntharile tlhogo.

₆Ka fologela kwa metheong

ya dithaba,

ka tswalelwa ke lefatshe

ka go sa feleng,

mme wena o ntshitse

bophelo jwa me mo bodibeng,

Morena, Modimo wa me.

₇E rile mowa wa me o tlhoboga

mo teng ga me,

ka gakologelwa Morena;

thapelo ya me ya fitlha

koo go wena mo Tempeleng

e e Boitshepo ya gago.

₈Ba ba tlotlang medimo

ya boithamako,

ba tlogela

yo o bopelotlhomogi le bone.

₉Mme nna ke rata

go go direla setlhabelo

ka lentswe le le lebogang.

Se ke se ikanetseng

ke tla se dirafatsa.

Thuso e mo Moreneng.”