JOELE 1

₂Utlwang, lona banna bagolo!

Sekegang ditsebe,

lona baagi botlhe ba lefatshe!

A selo se, se kile sa dirafala

mo metlheng ya lona,

gongwe mo sebakeng

sa borraeno?

₃Se boleleleng bana ba lona!

Bana ba lona ba se bolelele

bana ba bone!

Bana ba bone ba se bolelele

losika lo lo ba latelang!

₄Se se tlogetsweng ke boijane

se jewa ke segongwane;

se se tlogetsweng ke segongwane

sa jewa ke molome;

se se tlogetsweng ke molome

sa jewa ke tsie.

₅Tsogang, lona matagwa, lo lele!

Gwetlang lotlhe

ba lo nwang weine

ka ntlha ya matute a moweine,

gonne a tlositswe

mo melomong ya lona.

₆Gonne setšhaba se se thata

se se se nang palo

se tlile mo lefatsheng la me;

meno a sona a tshwana le a tau;

se na le meno a ditlhaa

jaaka tau e namagadi.

₇Se sentse setlhare sa moweine

sa me,

se robile setlhare sa feie sa me,

se se obotse makwati go gotlhe,

sa a latlha.

Dikala tsa sona di ditshweu.

₈Hutsafala jaaka lekgarebe

le le apereng diaparo

tsa khutsafalo,

le le hutsafalelang monyadi

wa lone.

₉Ditshupelo tsa dijo le dino

di khutlisitswe

mo Ntlong ya Morena;

baperesiti, badiredi ba Morena,

ba hutsafetse.

₁₀Naga e fetotswe sekaka,

masimo a tlhomola pelo,

gonne mabele a sentswe,

matute a moweine a kgadile,

lookwane lo fedile.

₁₁Balemi ba swabile,

balemi ba meweine ba lela

ka ntlha ya mabele le garase,

gonne ga go na kotulo

mo masimong.

₁₂Setlhare sa moweine se omeletse,

sa feie se swabile;

le sa garanata le sa mokolane

le sa apole le ditlhare tsotlhe

tsa naga di omeletse;

boitumelo bo tlogile jalo

mo bathong.

₁₃Itlameng, lo lele, lona baperesiti,

lona badiredi ba aletare!

Tlaang lo lale lo apere

diaparo tsa khutsafalo,

lona ba lo direlang

Modimo wa me;

gonne Ntlo ya Modimo wa lona

e timiwa ditshupelo

tsa dijo le dino.

₁₄Bayang sebaka sa go itima go ja,

bitsang phuthego,

lo phuthele banna bagolo

le baagi botlhe ba lefatshe

kwa Ntlong ya Morena,

Modimo wa lona,

lo goeleng kwa Moreneng.

₁₅Joo, letsatsi le, wee!

Gonne letsatsi la Morena

le gaufi;

le tla tla jaaka kgatelelo

e e tswang

mo go Mong-wa-thata-yotlhe.

₁₆A dijo ga di a tlosiwa

fa pele ga matlho a rona?

A boitumelo le meduduetso

ga di a tlosiwa

mo Ntlong ya Modimo wa rona?

₁₇Dipeo di boletse mo mmung,

difala ga di na sepe,

matlo a mabele a rutlilwe;

gonne mabele a swabile.

₁₈Diruiwa di lela jang!

Matlhape a dikgomo a a kaila,

ka a tlhoka mafulo;

matsomane le ona a a bogisega.

₁₉Morena, ke kuela kwa go wena,

gonne molelo o jele

mafulo a naga;

dikgabo tsa molelo di fisitse

ditlhare tsotlhe tsa naga.

₂₀Diphologolo tsa naga

le tsona di go nyoretswe;

gonne dinoka tsa metsi

di kgadile,

mme molelo o jele

mafulo a naga.