Setswana 1970/1987 (TSW70)
10

Thola

101Sehularong sa ga Abimelege ga tsoga Thola morwa Phua morwa Doto, monna wa lotso lwa ga Isašare, go thusa Iseraele. O ne a agile mo motseng wa Samire kwa dithabeng tsa Eferaime. 2A siamisa Baiseraele dinyaga di le 23; a ba a swa, a fitlhwa mo Samire. 3Sehularong sa gagwe ga tsoga Jaire wa kwa Gileate, a siamisa Baiseraele dinyaga di le 22.

10:3
Num. 32:41
4O ne a na le bomorwa ba le 30 ba ba neng ba palama diesele di le 30, ba na le metse e le 30 e e bidiwang metse ya ditente ya ga Jaire go fitlhelela letsatsing la kajeno, e e kwa nageng ya Gileate.
10:4
Baatlh. 12:14
5Jaire a ba a swa, a fitlhwa kwa Kamone.

Ifetha

6Mme Baiseraele ba fela ba dira tse di bosula mo matlhong a Morena, ba direla boBaale le boAšethorethe le medimo ya Siria le ya Sitone le ya Moabe le ya Baamone le ya Bafelesita; ba tlogela Morena, ba se ka ba mo direla. 7Ke fa bogale jwa Morena bo tukela Baiseraele, mme a ba rekisa mo diatleng tsa Bafelesita le tsa Baamone. 8Ba bogisa Baiseraele, ba ba gatelela setlhogo dinyaga di le 18 ka sebaka seo, e bong Baiseraele botlhe ba ba kwa moseja ga Joretane mo nageng ya Baamori e e kwa Gileate. 9Le gona Baamone ba tshela Joretane go tlhabana le Bajuta le Babenyamene le Baeferaime, mo Baiseraele ba bileng ba pitlaganngwa thata.

10Ke fa Baiseraele ba lelela Moreneng ba re: “Re go leofetse; gonne re go tlogetse, Modimo wa rona, ra direla boBaale.”

11Mme Morena a raya Baiseraele a re: “A ga ke re, ke lo golotse mo go Baegepeto le mo go Baamori le mo go Baamone le mo go Bafelesita? 12Mme ya re Basitone le Baamaleke le Bamaone ba lo pitlaganya, lwa lelela go nna, mme ka lo pholosa mo diatleng tsa bone. 13Mme lona lo ntlogetse, lwa direla medimo e sele; ke ka moo ke sa ka keng ka tlhola ke lo thusa. 14Yaang lo lele medimong e lo e itlhophetseng! A yona e lo thuse ka sebaka sa tlalelo ya lona!”

10:14
Doit. 32:37,38
Jer. 2:28

15Mme Baiseraele ba raya Morena ba re: “Re leofile. Wena o re direle tsotlhe tse di siameng mo matlhong a gago, fela a ko o re thuse kajeno.” 16Le gona ba tlosa medimo e sele mo gare ga bona, ba direla Morena. Ke fa a tlhomoga pelo ka ntlha ya pogisego ya Baiseraele.

10:16
Gen. 35:2-4
Baatlh. 2:18

17Jaanong Baamone ba kuiwa, ba thibelela kwa Gileate. Le Baiseraele ba phuthega, ba thibelela kwa Mitsepha. 18Ke fa batho, e bong dikgosana tsa Gileate, ba raana ba re: “Ke monna ofe yo o tla simololang go tlhabana le Baamone? Ene o tla nna tlhogo ya baagi botlhe ba Gileate.”

10:18
Baatlh. 11:6-11