JAKOBO 5

₁Jaanong he, lona bahumi, lelang lo bokolelele ditatlhego tse di tlang go lo wela. ₂Khumo ya lona e bodile, diaparo tsa lona di jelwe ke motoutwana. ₃Gouta ya lona le selefera di jelwe ke morodu, mme morodu wa tsona o tla supa ka ga lona, o ja nama ya lona jaaka molelo. Lo kgobokantse mahumo mo malatsing a bofelo! ₄Bonang, tuelo ya badiri ba ba robileng masimo a lona, e lo ganneng ka yona, e a kua, le go goa ga barobi go tsenye mo ditsebeng tsa Morena wa masomosomo. ₅Lo phedile mo lefatsheng ka monatenate le mo tlhapelong, lo otla dipelo tsa lona, lo di otlela letsatsi la tlhabo. ₆Lo atlhotse mosiami, lwa ba lwa mmolaya, a sa ganele le lona.

₇Jaanong he, ba ga etsho, nnang pelotelele, go tsamae Morena a tle. Bonang, molemi o a tle a lebelele leungo le le molemolemo la tshimo, a le pelotelele ka ntlha ya lone go tsamae le be le bone pula ya ntlha le ya morago. ₈Le lona nnang pelotelele, lo tiise dipelo tsa lona, ka go tla ga Morena go le gaufi.

₉Ba ga etsho, lo se ka lwa ngongoregelana, lo tle lo se ka lwa atlholwa. Bonang, moatlhodi o eme fa mojako. ₁₀Ba ga etsho, tsayang sekao sa pogo le sa bopelotelele mo baporofeting ba ba neng ba bua ka leina la Morena. ₁₁Bonang, re kaya lesego ba ba itshokileng. Lo utlwile ka ga boitshoko jwa ga Jobe, lwa bona ka fa Morena a mo diretseng ka teng bofelong; gonne Morena o tletse bopelotlhomogi, o bile o kutlwelo-botlhoko.

₁₂Ba ga etsho, se segolo bogolo ke go re, lo se ikane ka gope, e seng ka legodimo le e seng ka lefatshe le e seng ka ikano e sele. Mme a “ee” ya lona e nne “ee,” le “nnyaya” a e nne “nnyaya,” gore lo se ka lwa wela mo molatong.

₁₃A mongwe wa lona o a boga? A a rapele! A mongwe o a itumela? A a opele difela! ₁₄A mongwe wa lona o a lwala? A a bitse bagolo ba phuthego, ba mo rapelele, ba mo tlotse lookwane ka leina la Morena. ₁₅Thapelo ya tumelo e tla thusa molwetse, mme Morena o tla mo tsosa. Fa a dirile maleo, o tla itshwarelwa. ₁₆Ka moo, ipobolelaneng dibe, lo rapelelane gore lo fole. Thapelo ya mosiami e nonofile go dira tse dikgolo, fa e le ya tlhoafalo. ₁₇Elia e ne e le motho jaaka rona, mme o ne a rapela thata gore pula e se ka ya na, mme ya se ka ya na mo lefatsheng dinyaga di le tharo le dikgwedi di le thataro. ₁₈A ba a rapela gape, mme legodimo la nesa pula, lefatshe la ntsha leungo la lone.

₁₉Ba ga etsho, fa mongwe wa lona a timeletswe ke boammaaruri, mongwe a mo sokolola, ₂₀a a itse gore yo o sokololang moleofi mo tseleng ya gagwe ya timelo o tla pholosa mowa wa gagwe mo losong, a bipa dibe tsotlhe.