Setswana 1970/1987 (TSW70)
25

Pako ya Morena yo o fenyang baba le go pholosa ba gagwe

251Morena, o Modimo wa me!

Ke tla go tumisa,

ke baka leina la gago;

gonne o dirafaditse dikgakgamatso,

e leng maikaelelo a kgale

a a ikanyegang a boammaaruri.

2Gonne o fetotse motse

mokoa wa matlapa;

motse o o femetsweng

o o fetotse marope.

Matlo a borena a baikepi

ga e tlhole e le motse;

ga o na go agiwa gape

ka bosakhutleng.

3Ka ntlha ya moo

morafe o o tiileng

o tla go galaletsa;

motse wa ditšhaba

tse di gatelelang

o tla go boifa.

4Gonne o no o le thata

ya yo o bokoa

le phemelo ya mohumanegi

mo tlalelong ya gagwe

le botshabelo mo puleng

ya matsubutsubu

le moriti mo bolelong

jwa letsatsi.

Gonne theregiso ya barena

ba ba setlhogo

e tshwana le pula

ya matsubutsubu mo loboteng;

5e tshwana le bolelo jwa naga

e e omeletseng.

O kokobeditse modumo

wa baikepi jaaka bolelo

bo fokodiwa ke moriti wa leru;

wa didimatsa sebôkô sa barena

ba ba peloethata.

Moletlo wa merafe mo Sione

6Morena wa masomosomo o tla etleeletsa merafe yotlhe moletlo wa dijo tse di mafura mo thabeng e; moletlo wa weine e e itshekileng, wa tse di mafura tse di tletseng moko, wa weine e e buduleng sentle.

25:6
Pes. 22:27-30
Math. 22:2
7Le gona mo thabeng e o tla nyeletsa lesire le le adilweng godimo ga merafe yotlhe, le kobo e ditšhaba tsotlhe di bipilweng ka yona.
25:7
2 Bakor. 3:14-16
8O tla nyeletsa loso ka go sa feleng. Modimo, Morena o tla phimola dikeledi mo difatlhegong tsotlhe, a tlosa kgobo ya morafe wa gagwe mo lefatsheng lotlhe. Gonne Morena o buile jalo.
25:8
1 Bakor. 15:55
Tshen. 7:17

9Mo metlheng eo ba tla re: “Bonang, Modimo wa rona ke oo, o re neng re solofela mo go ona gore o re pholose. Morena ke yoo, yo re neng re mo lebeletse. Jaanong a re duduetseng, re itumelele thuso ya gagwe!”

25:9
Pes. 48:15

Modimo o tla betsa Moabe

10Gonne seatla sa Morena se tla nna mo thabeng e, mme Moabe o tla gatakelwa fa fatshe mo felong ga gagwe jaaka go gatakwa dikokole mo metsing a kgatampi ya malôkô. 11Le fa a phutholola mabogo a le mo teng jaaka mothumi a a phutholola a ntse a šapa, Morena o tla mo gatelela, le fa ene a ntse a leka go tswa, a itapisa mabogo. 12Phemelo ya dipota tsa gagwe tse di godimo Morena o tla e diga, a e kokobetsa, a e digela fa fatshe mo leroleng.