BAHEBERE 9

₁Mme jaanong le yona kgolagano ya ntlha e ne e na le dithulaganyo tsa tirelo-Modimo le Felo-ga-Boitshepo ga lefatshe. ₂Gonne go ne go tlhongwa Tempelana: Go le karolo ya botlhabatsatsi e go neng go le setlhomo sa lobone le tafole le dinkgwe tsa tshupo mo go yona e e bidiwang Felo-ga-Boitshepo; ₃mme fa morago ga lesire la bobedi go le Tempelana e e bidiwang Felo-ga-Boitshepo-jwa-Maitshepo; ₄mo go neng go na le aletare ya maswalo ya gouta le Letlole la Kgolagano le le manegilweng gouta gotlhe, le mo go lone go neng go le nkgwana ya gouta e e nang le Mmana le thobane ya ga Arone e e kileng ya tlhoga, le matlapa a kgolagano. ₅Kwa godimo ga lone go ne go le boKerubime ba kgalalelo, ba okame sekhurumelo sa thuanyo; mme ga go ka ke ga buiwa ka ga sengwe le sengwe sa dilo tseo jaanong.

₆Mme e rile dilo tseo di sena go baakanngwa jalo, baperesiti ba nna ba tsena ka gale mo Felong-ga-Boitshepo, e le go dirafatsa tsa tirelo-Modimo, ₇mme mo Felong ga bobedi go tsena moperesiti yo mogolo a le esi fela gangwe ka ngwaga, e se kwa ntle ga madi a o a isang teng ka ntlha ya maleo a gagwe le a batho a a dirilweng ka go sa itemoge. ₈Ka tseo Mowa o o Boitshepo o ne o supa gore tsela e e yang kwa Felong-ga-Boitshepo e ne e ise e bonatsege, fa Taberenakele ya ntlha e sa ntse e le teng, ₉e e leng sekao se se lebileng sebaka seno, e ka fa mokgweng wa yona go isiwang dineo le ditlhabelo teng tse di sa ka keng tsa dira gore modiredi a nne yo o tletseng ka fa segakoloding. ₁₀Kana ke dithulaganyo tsa nama fela ka ga dijo le dino le ditlhapiso tsa mefutafuta, tse di beilweng fela go ya go fitlha sebakeng sa tlhabololo.

₁₁Mme Keresete o tsile go nna moperesiti yo mogolo wa masego a a tla tlang, a ralala Felo-ga-Boitshepo fa go gaisang ga pele ka bogolo le botlalo, fa go sa dirwang ka diatla, ke go re, fa e seng ga tlholego eno. ₁₂Le gona, ga a a tsena ka madi a diphoko le a dinamane, mme o tsenye ka madi a e leng a gagwe gangwe fela mo Felong-ga-Boitshepo-jwa-Maitshepo, a dira kgololo e e sa khutleng. ₁₃Gonne fa madi a diphoko le a dipoo le molora wa namane ya moroba o o gasiwang mo go ba ba kgotlelegileng, di ba itshepisa gore ba nne phepa mo mmeleng, ₁₄madi a ga Keresete yo o ineetseng Modimo ka Mowa o o sa khutleng go nna setlhabelo se se se nang bogole, ona a tla phepafatsa bogolo jang ne digakolodi tsa rona go tswa ditirong tse di suleng gore re direle Modimo o o tshelang!

₁₅Ke ka ntlha ya moo Keresete e leng Moruanyi wa kgolagano e ntšhwa gore bone ba ba biditsweng ba amogele boswa jo bo sa feleng, jo bo boleletsweng pele, loso lwa gagwe lo sena go dirafala go nna kgololo ya ditlolo tsa sebaka sa kgolagano ya ntlha.

₁₆Gonne kwa lokwalo lwa boswa lo leng teng, loso lwa yo o lo kwadileng lo tshwanetse lwa supiwa. ₁₇Kana lokwalo lwa boswa lo amogela thata ka loso, ka lo sa ka ke lwa nna le thata ka gope, fa yo o lo dirileng a sa ntse a tshela. ₁₈Ka ntlha ya moo kgolagano ya pele le yona ga e a ka ya kgakolwa kwa ntle ga madi. ₁₉Gonne e rile taolo nngwe le nngwe e sena go bolelelwa morafe otlhe ke Moše ka fa molaong, a tsaya madi a dinamane le a diphoko mmogo le metsi le boboa jo bohibidu le mosiama, a ba a kgatsha lokwalo ka losi le morafe otlhe ka tsona, ₂₀a re: “Ke ona madi a kgolagano e Modimo o e lo laetseng.” ₂₁Le yona Taberenakele le didiri tsotlhe tsa tirelo-Modimo a di kgatsha fela jalo ka madi. ₂₂Dilo tse di phepafadiwang ka madi ka fa molaong e batlile go nna tsotlhe, mme kwa ntle ga go tsholola madi ga go na boitshwarelo bope.

₂₃Jaanong go ne go batlega gore ditshwantsho tsa dilo tse di kwa legodimong di phepafadiwe ka ditlhabelo tseo, mme dilo tsa legodimo ka tsosi tsone ka ditlhabelo tse di phalang tsele. ₂₄Gonne Keresete ga a ka a tsena mo Felong-ga-Boitshepo fa go dirilweng ka diatla, fa e leng setshwantsho fela sa felo ga boammaaruri, mme o tsenye mo legodimong tota gore jaanong a bonale fa pele ga sefatlhego sa Modimo ka ntlha ya rona. ₂₅Le gona e ne e se gore a itire setlhabelo gantsi, jaaka moperesiti yo mogolo a tsena mo Felong-ga-Boitshepo-jwa-Maitshepo ka ngwaga le ngwaga ka madi a e seng a gagwe. ₂₆Gonne foo o ka bo a ne a na le go boga gantsi go tswa tlholegong ya lefatshe. Mme jaanong o bonetse gangwe fela mo bokhutlong jwa metlha gore a tlose boleo ka go itira setlhabelo. ₂₇Mme go tla dirafala jaaka batho ba beetswe go swa gangwe fela, mme go tla katlholo morago ga moo: ₂₈Keresete le ene yo o dirilweng setlhabelo gangwe fela gore a tlose maleo a ba bantsi, o tla bonala la bobedi, e se ka ntlha ya boleo mo go bone ba ba mo lebeletseng go ba isa phologong.