GENESI 7

₁Jaanong Morena a raya Noa a re: “Tsena mo mokorong, wena le ba lapa la gago botlhe; gonne ke go bonye o le mosiami mo gare ga ba metlha eno. ₂Tsaya tse ditonanyana tse supa le tse dinamagadi tse supa tsa mefuta yotlhe ya diphedi tse di itshekileng; gape o tseye e tonanyana le e namagadi ya mefuta yotlhe ya diphedi se di sa itshekang; ₃le gona mo mefuteng yotlhe ya dinonyane tsa legodimo o tseye tse ditonanyana tse supa le tse dinamagadi tse supa, e le go boloka losika lwa tsona mo lefatsheng lotlhe. ₄Gonne e tla re malatsi a supa a sena go feta, ke nese pula mo lefatsheng malatsi a le 40 le masigo a le 40; ke tla nyeletsa tsotlhe tse di phelang tse ke di dirileng, ke di tlosa mo lefatsheng.” ₅Noa a dira tsotlhe ka fa Morena a mo laetseng ka teng.

₆Noa o ne a le dinyaga di le 600, fa metsi a morwalela a tla mo lefatsheng. ₇Noa a tsena mo mokorong a na le bomorwawe le mosadi wa gagwe le betsi ba gagwe, metsi a morwalela a ise a tle. ₈Diphedi tse di itshekileng le diphedi tse di sa itshekang le dinonyane le tsotlhe tse di gagabang fa fatshe ₉tsa tla kwa go Noa ka bobedi le bobedi, tsa tsena mo mokorong, e tonanyana le e namagadi, jaaka Modimo o laetse Noa. ₁₀Ya re malatsi a supa a sena go feta, metsi a morwalela a tla mo lefatsheng.

₁₁Ka ngwaga wa 600 wa bophelo jwa ga Noa, ka kgwedi ya bobedi, ka letsatsi la some supa; ka lone letsatsi leo ga phunyega metswedi yotlhe ya madiba a magolo, ga bulega maroba a legodimo. ₁₂Pula ya tshologela mo lefatsheng malatsi a le 40 le masigo a le 40. ₁₃Ka lone letsatsi leo Noa a tsena mo mokorong le bomorwa Noa Seme le Hame le Jafethe le mosadi wa ga Noa le basadi ba le bararo, e bong betsi ba gagwe. ₁₄E ne e le bone le mefuta yotlhe ya diphologolo le mefuta yotlhe ya diruiwa le mefuta yotlhe ya digagabi tse di gagabang fa fatshe le mefuta yotlhe ya dinonyane ka fa mebaleng ya mafofa a tsona. ₁₅Tsa tsena kwa go Noa mo mokorong, e le bobedi le bobedi jwa nama yotlhe e mowa wa bophelo o leng mo go yona. ₁₆Tse di tsenyeng e ne e le e tonanyana le e namagadi tsa nama yotlhe, jaaka Modimo o mo laetse. Ya re a sena go tsena natso, Morena a tswala.

₁₇Ke fa morwalela o tla mo lefatsheng malatsi a le 40; metsi a nna a golela godimo, a tsholetsa mokoro, wa tlhatloga wa katoga lefatshe. ₁₈Metsi a kokomoga, a nna magolo thata mo lefatsheng; mokoro ole wa kokobala mo godimo ga metsi. ₁₉Metsi a kokomoga thata thata mo lefatsheng, mo a bileng a khurumetsa dithaba tsotlhe tse dikgolo tse di fa tlase ga legodimo lotlhe. ₂₀Metsi a nna magolo, a khurumetsa dithaba, a di feta ka mabogo a le some tlhano. ₂₁Ke fa go swa nama yotlhe e e itshikinyang mo lefatsheng, e bong dinonyane le diruiwa le diphologolo le tsotlhe tse di gagabang fa fatshe le batho botlhe. ₂₂Tsotlhe tse di neng di na le mowa wa bophelo mo dinkong tsa tsona, tsotlhe tse di neng di le fa go omileng tsa swa. ₂₃Modimo wa nyeletsa jalo diphedi tsotlhe tse di mo lefatsheng, e leng batho le diruiwa le digagabi le dinonyane tsa legodimo, tsa fedisiwa mo lefatsheng; ga bolokega Noa fela le tse di neng di na nae mo mokorong. ₂₄Metsi a bo a le magolo mo lefatsheng malatsi a le 150.