GENESI 15

₁Morago ga dilo tseo Lefoko la Morena la tla kwa go Aborame ka pono la re: “Aborame, se boife! Ke nna thebe ya gago; tuelo ya gago e kgolo thata.”

₂Mme Aborame a re: “Morena Modimo, o tla mpha eng, ka e le fa ke tla tsamaya, ke se na bana? Mme Eliesere yo wa kwa Damaseko o tla ja boswa jwa lapa la me.” ₃Aborame a ba a re: “Bona, nna ga o a mpha ngwana; mme motlhanka wa lapa la me o tla rua tsa me.”

₄Ke fa Lefoko la Morena le tla kwa go ene le re: “Nnyaya, yoo ga a nke a rua tsa gago, mme yo o tswang mo mmeleng wa gago, ke ene yo o tla jang boswa jwa gago.” ₅A ba a mo ntshetsa kwa ntle a mo raya a re: “A ko o lelale kwa legodimong, o bale dinaledi, fa o ka kgona go di bala!” A ba a mo raya a re: “Losika lwa gago lo tla nna kalo.”

₆Aborame a dumela Morena; mme tumelo eo ya kaiwa tshiamo ya gagwe.

₇A ba a mo raya a re: “Ke nna Morena ke go ntshitseng kwa Ure wa Kalatea go tla go go naya lefatshe le, go le rua.”

₈Mme a re: “Morena Modimo, ke tla itse ka eng, fa ke tla le rua?”

₉A mo araba a re: “Ntlisetse kgomo ya dinyaga di le tharo le podi ya ngwaga tse tharo le phelehu ya ngwaga tse tharo le lephoi le leeba.” ₁₀Aborame a mo tsisetsa tsotlhe tseo, a di fatola ka bogare; a baya mefama a e lebagantse. Fela dinonyane a se ka a di fatola. ₁₁Jaanong dinonyane tse di jang nama tsa fologela mo ditotong tseo, mme Aborame a di koba.

₁₂Jaanong ya re letsatsi le batla go phirima, Aborame a welwa ke boroko jo bogolo, mme letshogo le lefifi le legolo tsa mo tlela. ₁₃Ke fa Morena a raya Aborame a re: “O tshwanetse go itse gore losika lwa gago e tla nna baeng mo lefatsheng le e seng la bone. Ba tla nna batlhanka teng, ba gatelelwa dinyaga di le 400. ₁₄Mme le setšhaba seo se ba tla nnang batlhanka ba sona ke tla se otla; morago ga moo ba tla huduga ka dithoto tse dikgolo. ₁₅Mme wena o tla ya kwa go borraago ka kagiso; o tla fitlhwa o tsofetse ka botlalo. ₁₆Ba tla boela kwano e le ba losika lwa bone. Gonne kajeno molato wa Baamori ga o ise o tlale.”

₁₇Jaanong ya re letsatsi le sena go phirima, go le lefifi thata, ga bonala sebeso se se kuang musi le kgabo ya molelo e raletse fa gare ga mehama ele. ₁₈Ka letsatsi leo Morena a dira kgolagano le Aborame a re: “Lefatshe le ke tla le naya losika lwa gago go simolola kwa nokeng ya Egepeto go fitlha kwa nokeng e kgolo, nokeng ya Ferathe, ₁₉e bong lefatshe la Bakeni le Bakenisi le Bakatemoni ₂₀le Bahethe le Baferesi le Barefaime ₂₁le Baamori le Bakanana le Bagiregasi le Bajebusi.”