BAGALATIA 6

₁Ba ga etsho, e re fa motho a tlhagetswe ke molato mongwe ka tshoganyetso, lona ba lo leng ba mowa, siamisang yo o ntseng jalo ka mowa o o bonolo ka go ikgopola gore le wena o se raelwe. ₂Rwadisanyang merwalo, ke gone lo tla bong lo dirafatsa molao wa ga Keresete. ₃Gonne fa motho a itlhoma a le sengwe, etswe a se sepe, o a itsietsa. ₄A mongwe le mongwe a tlhotlhomise tiro ya gagwe, foo o ka nna le tlotlo mo go ene ka esi, mme e seng mo go yo mongwe. ₅Gonne mongwe le mongwe o tla rwala morwalo wa gagwe.

₆Yo o rutwang Lefoko a a fe yo o mo rutang kabelo ya dilo tsotlhe tse di molemo.

₇Se tsietsegeng, Modimo ga o sotlwe; gonne se motho o se jwalang, e bile ke sona se o tla se robang. ₈Kana yo o jwalelang nama ya gagwe o tla roba tshenyego mo nameng, mme yo o jwalelang Mowa o tla roba botshelo jo bo sa khutleng mo Moweng. ₉A re se lapeng go dira tse di molemo; gonne re tla roba ka sebaka sa teng, fa re sa itsemeletse. ₁₀Jaanong he, a e re ka re na le sebaka, re direleng botlhe molemo, mme bogolo bone ba e leng ba ga rona ka tumelo.

₁₁Bonang gore ke lo kwaletse ka ditlhaka tse dikgolo jang ne ka seatla sa me! ₁₂Botlhe ba ba ratang go kgatlha batho ka tsa nama, bone ba lo pateletsa go rupa, e le fela gore ba se bogisiwe ka ntlha ya sefapaano sa ga Keresete. ₁₃Le bone ka bosi ba ba rupang ga ba tshegetse molao; mme ba batla gore lona lo rupe, ba tle ba ipoke ka lona. ₁₄Mme a go nne kgakala le nna go ipoka, fa e se fela ka sefapaano sa Morena wa rona Jesu Keresete, se lefatshe le mpapoletsweng ka sona, le nna ke bapoletswe lefatshe ka sona. ₁₅Gonne mo go Keresete Jesu go rupa ga se sepe le go sa rupeng ga se sepe; se segolo ke go bopiwa sešwa. ₁₆A jaanong botlhe ba ba tla phelang ka fa kaelong eo, kagiso le kutlwelo-botlhoko di nne mo go bone ba e leng bone Baiseraele ba Modimo.

₁₇Jaanong a ke se tlhole ke tshwenngwa ke ope; gonne ke na le dipadi tsa ga Jesu mo mmeleng wa me.

₁₈Bakaulengwe, a bopelotlhomogi jwa Morena wa rona Jesu Keresete bo nne le mewa ya lona! Amen.