BAEFESO 5

₁Ka moo he, nnang baetsi ba Modimo jaaka bana ba ba rategang, ₂lo tsamae mo loratong jaaka Keresete le ene a lo ratile, a ineela ka ntlha ya rona go dirwa tshupelo le setlhabelo go nna monko o o monate mo Modimong.

₃Boaka le maswe otlhe le fa e le bogagaru di se ka tsa dirwa, le e seng go umakwa mo go lona, gonne ga go a tshwanela baitshepi; ₄le boatla le mafoko a bosilo le fa e le metlae ke tse di sa tshwanelang; mme bogolo lebogang. ₅Gonne moo lo go itse sentle gore ga go ope yo e leng seaka gongwe yo o maswe gongwe yo o megagaru yo o ka nnang le boswa mo pusong ya ga Keresete le Modimo, ka e le modiredi wa medimo e sele.

₆Se tsiediweng ke ope ka mafoko a boithamako; gonne bogale jwa Modimo bo tla mo baneng ba ba sa utlweng ka ntlha ya dilo tseo. ₇Ka moo he, se tlhakaneng nabo! ₈Gonne lo kile lwa bo lo le lefifi, mme jaanong lo lesedi mo Moreneng; tsamayang jaaka bana ba lesedi – ₉gonne leungo la lesedi ke molemo otlhe le tshiamo le boammaaruri – ₁₀lo tlhotlhomise se se kgatlhang Morena. ₁₁Lo se ka lwa tlhakanela ditiro tsa lefifi tse di sa ungweng sepe, mme bogolo lo di kgalemele; ₁₂gonne tse di dirwang ke bone mo sephiring, tota le go di bolela go tlhabisa ditlhong. ₁₃Mme dilo tsotlhe tse di kgalemelwang ke lesedi di a senoga; gonne sengwe le sengwe se se senolwang se tswela leseding. ₁₄Ke ka moo go tweng:

₁₅Tlhokomelang thata he ka fa lo tshelang ka teng, e seng jaaka masilo, mme e nne jaaka matlhale; ₁₆lo dirise nako ka tshwanelo, gonne malatsi a bosula. ₁₇Ka moo he, se nneng bosilo, mme tlhaloganyang se e leng go rata ga Morena.

₁₈Se tagweng ke bojalwa, ka botlhaswa bo tswa mo go jona; mme tlalang Mowa; ₁₉lo buisanye ka dipesalome le difela tsa pako le dikopelo tsa mowa, lo opelele Morena, lo mo dudueletse ka dipelo tsa lona, ₂₀lo leboge Modimo Rraetsho ka gale ka ntlha ya tsotlhe mo leineng la Morena wa rona Jesu Keresete, ₂₁lo ikokobeletsanye ka go boifa Keresete.

₂₂Lona basadi, ikokobeletseng banna ba e leng ba lona, jaaka lo ikokobeletsa Morena; ₂₃gonne monna ke tlhogo ya mosadi, jaaka Keresete le ene e le tlhogo ya phuthego, ene yo e leng Mopholosi wa mmele. ₂₄A basadi ba ikokobeletse banna ba bone mo dilong tsotlhe, jaaka phuthego e ikokobeletsa Keresete.

₂₅Lona banna, ratang basadi ba lona, jaaka Keresete le ene a ratile phuthego, a ineela losong ka ntlha ya yona ₂₆gore a e itshepise, a sena go e itshekisa ka tlhapiso ya metsi ka Lefoko, ₂₇gore a itlhomele phuthego e e tlotlegang e e se nang sebala, le fa e le matsutsuba, gongwe se sengwe se se ntseng jalo, mme e nne e e boitshepo, e e sa nyatsegeng. ₂₈Ke ka ntlha ya moo banna ba tshwanetseng go rata basadi ba bone jaaka ba rata mebele ya bone. Yo o ratang mosadi wa gagwe o a ithata. ₂₉Kana ga go ope yo o kileng a tlhoa mmele wa gagwe, mme o a o otla, o a o babalela, jaaka Keresete le ene a direla phuthego; ₃₀gonne re ditokololo tsa mmele wa gagwe, re ba nama ya gagwe, ba marapo a gagwe. ₃₁“Ke ka ntlha ya moo monna o tla tlogelang rraagwe le mmaagwe, a ngaparela mosadi wa gagwe, mme ba babedi bao ba tla nna nama e le nngwe fela.” ₃₂Bosaitsiweng joo ke jo bogolo, mme kana ke raya Keresete le phuthego. ₃₃Mme jaanong le lona, a mongwe le mongwe a rate mosadi wa gagwe jaaka a ithata; mosadi ene a tlotle monna wa gagwe.