AMOSE 8

₁Morena Modimo a ntshupetsa jaana: Ka bona tlatlana e e nang le maungo a letlhafula. ₂Mme a re: “O bona eng, Amose?”

Ka re: “Ke bona tlatlana e e nang le maungo a letlhafula.”

Ke fa Morena a nthaya a re: “Bokhutlo bo gorogetse morafe wa me wa Iseraele; ga nkitla ke tlhola ke ba rekegela. ₃Difela tsa ntlo ya borena di tla fetoga selelo ka sebaka se,” go bua Morena Modimo. “Ditoto tse dintsi di tla gasanngwa go ntse go rile tu!”

₄Utlwang, lona ba lo gatelelang bahumanegi, ba lo bogisang batlhoki mo lefatsheng, ₅lo re: “Ngwedi o tla rogiwa leng gore re rekise mabele? Sabata o tla fela leng gore re bule difala tsa mabele, re fokotse seelo, re godise tlhwatlhwa, re tsietse ka dikale tse e seng tsona; ₆gore re reke ba ba kwa tlase ka madi le mohumanegi ka ditlhako tse pedi; le gona re tla rekisa dikgofa jaaka mabele.”

₇Morena o ikanne ka bogolo jwa ga Jakobe a re: “Ruri, ga nkitla ke lebala ditiro dipe tsa bone ka go sa feleng. ₈Lefatshe a ga le na go roroma ka ntlha ya tseo? Ba ba agileng mo go lone a ga ba na go hutsafala botlhe? – Ee, le tla gogomoga lotlhe jaaka noka ya Nile, le huduiwa, le be le kokobela jaaka noka ya Egepeto.” ₉Morena Modimo a re: “Ka letsatsi leo ke tla phirimisa letsatsi motshegare, ke fifatsa lefatshe go sa le lesedi. ₁₀Ke tla fetola meletlo ya lona khutsafalo, le difela tsotlhe tsa lona dilelo; ke apesa matheka otlhe ka diaparo tsa khutsafalo, ke dira ditlhogo tsotlhe mafatla; ke lo tlisetsa khutsafalo ya ba ba swetsweng ke ngwana yo o esi, mme bokhutlo jwa teng bo tshwana le letsatsi le le galakang.”

₁₁Morena Modimo o bua a re: “Bonang, malatsi a e tla a ke tla romelang tlala mo lefatsheng ka ona, e seng tlala ya bogobe le e seng lenyora la metsi, mme e le leuba la go utlwa mafoko a Morena. ₁₂Ba tla kgarakgatshega ba tswa lewatleng ba ya lewatleng, ba tswa kwa bokone ba ya kwa botlhabatsatsi, ba kaila go batla Lefoko la Morena, mme ga ba kitla ba le bona. ₁₃Ka sebaka seo, makgarebe a mantle le makau a tla idibala ka lenyora, ₁₄a a ikanang ka ‘Boleo-jwa-Samaria’ a re: ‘Ka bophelo jwa modimo wa gago, Dane!’ Gape: ‘Ka bophelo jwa Tsela-ya-Bereseba!’ a tla wa, mme ga a kitla a tlhola a tsoga.”